Angela * iei sister men me sounpar 30 samwa. E ekis saloh pwe elder kan pahn mwemweitla reh. E kin medewe, ‘Dahme elder kan pahn ndaiong ie? I ese me I sohte towehda ekei mihting kan, ahpw mwurin ei kin doadoahk rahn ehu pwon en apwahpwalih aramas mah kan, I kin uhdahn pwangada ni ei lella ni imweio.’ Kaidehn ihte met ahpw e pil pwunodki me eh nohno soumwahu.

Ma kowe emen elder ko me pahn mwemweitla rehn Angela, ia duwen omw pahn kangoange ih? Ahpw keieu, dahme ke kak wia pwehn kaunopada mwohn omw mwemweitla rehn emen me “pwangadahr” duwehte ih?​—Ser. 31:25.

Ekei pak, kitail koaros kin pwangada pwehki atail doadoahk en mwohni de pwukoahn Kristian kan. Karasepe, soukohp Daniel “uhdahn pwangada” ni eh kilangada kaudiahlo me e sohte kak wehwehki. (Dan. 8:27, NW) Dahme sewese ih? Koht ketin poaronehla reh tohnleng Kapriel en kawehwehda soahng kan ong Daniel oh padahkihong me Siohwa ketin karongehier eh kapakap kan. Tohnlengo pil padahkihong me e wiahte emen me Siohwa ‘ketin loalloale.’ (Dan. 9:21-23) Mwuhr, emen tohnleng tohrohr pwarala rehn Daniel oh ndaiong lokaiahn kangoang kan.​—Dan. 10:19.

Ke pil kak wia met ni omw mwemweitla rehn emen nan mwomwohdiso me pwangada de mworusala. Mwohn omw mwemweitla rehn riomwo, kihong ahnsou ken medewe eh irairo. Soangen kahpwal dah kan me e ahneki? Ia duwen kahpwal pwukat eh kamworusehla? Soahng mwahu dah kan duwen ih  me e kin kasalehda? Richard, emen me wiahkier elder daulih sounpar 20 koasoia me e kin song medewe duwen soahng mwahu kan en Kristian men mwohn e mwemweitla reh. E pil kin medewe mwahu duwen ahn Kristiano irair. Met kin kamengeila eh pahn kihong soangen mehn kangoang me anahn. Ma kowe oh emen elder koasoanehdi en mwemweitla rehn emen, e pahn mwahu ma kumwa koasoiapene en aramaso irair mwohn amwa kohla reh.

Emen Kristian kak namenek en koasoia eh pepehm ong elder men. Eri ia duwen omw kak sewese riomw Kristian men en dehr soansuwed? Ele e pahn sawas ma ke sirei oh doadoahngki ekei lokaia kadek ni omw tapiada omw mwemweito. Michael me wia elder men daulih sounpar 40, kin kalapw tepikihda eh koasoi duwehte met: “Ke ese, ehu kisehn pwais kaselel kan en elder men iei eh kin mwemweitla rehn rie Kristian kan ni imwarail oh kalaudehla eh esehla irail. Kahrehda, I uhdahn kasikasik at pahn mwemweitdo rehmw rahnwet.”

Ni tepidahn mwemweito, ke kak kapakap. Nan kapakapo, ke pahn kak nda soahng mwahu kan duwen ih me duwehte eh pwoson, limpoak de eh kin dadaur pahn kahpwal. Ih met me wahnpoaron Pohl wia ni eh kapakapki rie Kristian ko. (1 Des. 1:2, 3) Ni omw kin kapakap rehn riomwo duwehte met, ke kin sewese kumwa koaros en ahneki madamadau pwung duwen mwemweito. Amwa koasoipene pahn imwila kangoange kumwa koaros. Omw kapakap pil kak kamweitala ih. Elder koahiek men me ede Ray koasoia me ekei pak, kitail koaros kin manokehla soahng mwahu kan me kitail kin wia nan atail papah Koht, oh kitail kin nsenamwahula ni emen eh kin katamankin kitail soahng pwukat.

Ehu ahl me ke kak kihong riomw Kristiano “kapai” ehu, de kangoange ih, iei omw  doadoahngki Paipel pwehn sewese ih, mehnda ma pil iretikitik ehute. (Rom 1:11) Karasepe, brother men me uhdahn nsensuwedla ele pehm me pein ih sohte kesempwal. Ele kumwa kak wadekpene duwen sounmelkahkao me pehm me e rasehng “ehd kilin mahn mering me pahn lekdekla.” Mendahki sounmelkahkao ahneki pepehm wet, e koasoia: “I sohte patohwan manokehla sapwellimomwi mahsen kan.” (Mel. 119:83, 176) Mwurin omw kawehwehda ni mwotomwot iren Paipelo, ke kak ndaiong me ke kamehlele me e pil “sohte patohwan manokehla” sapwellimen Koht kosonned kan.

Ia duwen omw pahn kak doadoahngki Paipel pwehn kangoange sister men me solahr kin iang kalohk oh mihting de sohla ngoangki papah Koht? Mwein karasaras en mwohni silper me salongalahro pahn kangoange ih. (Luk 15:8-10) Mwohnio ele wia kisehn mwaramwar kesempwal ehu me wiawihkihda mwohni silper tohto. Ni amwa koasoiapene karasaras wet, ele ke sewese ih en wehwehkihda me e wia emen kisehn mwomwohdiso me kesempwal. Eri, ke kakete sewese ih en kilang me ih emen sapwellimen Siohwa kisin sihpw oh me e ketin nsenohki ih laud.

Riatail Kristian kan kin perenki koasoia duwen iren Paipel kan me re wadekier. Eri kaidehn kowehte me pahn koasoakoasoi! Mwurin amwa wadekpene ehu iretikitik, ke kak pilada lepin lokaia ehu de lokaia kei nan ireo oh idek reh ia eh madamadau. Karasepe, mwurin amwa wadekpene 2 Korint 4:16, ke kak idek, “Ke kak medewehla ia duwen Siohwa eh kin ketin kahrehiong uhk ken ‘kekehlailla,’ de ketikihong uhk kehl?” Soangen peidek wet kak imwikihla amwa koasoipene en kangoange kumwa koaros.​—Rom 1:12.

Ke pil kak kangoange riomw Kristiano sang omw koasoia duwen emen sang nan Paipel me eh irair duwehte aho. Emen me nsensuwedla ele ahneki pepehm duwehte Ana de Epaprodaitus. Ira koaros kin nsensuwedla ekei pak, ahpw ira kesempwalte rehn Koht. (1 Sam. 1:9-11, 20; Pil. 2:25-30) Mie karasaras mwahu tohto teikan en Paipel me ke kak doadoahngki.

Mwurin omw mwemweitla rehn emen, doulahte kasalehda me ke nsenohkin ih. (Wiewia 15:36) Karasepe, ni kaimwiseklahn mwemweito, ke kak wiahda koasoandi ken iangih kalohk. Ni Bernard, elder koahiek men, eh tuhwong emen Kristian me e ahpwtehn mwemweitla reh, ele e kin idek reh ni kadek duwen kaweido me e kihong ni eh koasoia, “Ia duwe, e mwahu omw doadoahngki ireo?” Sang omw kasalehda omw nsenoh ni ahl pwukat, ke pahn kak diarada ma pil mie mehkot ke kak sewesehki ih.

Keieu kesempwal, riatail Kristian kan anahne pehm me ke nsenohki irail, wehwehki irail, oh poakohng irail. (1 Des. 5:11) Eri mwohn omw pahn mwemweitla rehn riomwo, medewe duwen eh irairo. Kapakapki duwen omw pahn mwemweitla. Pilada mwahu iren Paipel kan me ke pahn doadoahngki. Eri ke pahn diarada lepin lokaia konehng kan me pahn kakehlakahda “me pwangadahr kan.”