Kaweid en Paipel kin doadoahk mwahu ong wiahda mouren pwopwoud nsenamwahu pwehki e kohsang rehn Siohwa Koht me ketin tapiada koasoandi en pwopwoud. E padahkihong kitail en kakairada irair kaselel kan me kak kahrehiong mouren pwopwoud nsenamwahu oh pil padahkihong kitail duwen madamadau de wiewia kan me kak kauwehla pwopwoud. E pil padahkihong kitail en ahneki koahiek en koasoakoasoipene me pahn kalaudehla peren nan mouren pwopwoud.​—Wadek Kolose 3:8-10, 12-14.

Pwopwoud ehu anahne wahupene nanpwungara. Ni ara kin kapwaiada ara pwukoahn pwopwoud me Koht ketikihong ira, ira kak nsenamwahu.​—Wadek Kolose 3:18, 19.

Pwopwoud ehu kak mihmihpene werei ma ira limpoakpene. Koht ketin padahkihong kitail ia duwen atail en kasalehda limpoak. Ih oh sapwellime Ohlo, Sises ketin wia mehn kahlemeng mwahu en wiahda tounmetei kan pwehki limpoak.​—Wadek 1 Sohn 4:7, 8, 19.

Ni pwopwoud ehu ara kin wauneki koasoandi en pwopwoud me Koht ketikihda, ira sohte pahn mweipeseng. Koht ketin wiahda pwopwoud ehu en mihmihpene erein ara mour pwe mouren peneinei en nsenamwahu oh sohte perki mehkot. Mouren pwopwoud kak werei pwehki Koht ketin kapikada ohl oh lih ira en sawaskipene ara anahn en paliwar oh pepehm. E pil ketin kapikada ira rasehng ih, me iei ira en ahneki koahiek en alasang sapwellime limpoak.​—Wadek Senesis 1:27; 2:18, 24.