1. Dahme pali laud en aramas kin medewehkihong lidu kan? Dahme pidada en wia soangen lidu me Rom 6:22 kasalehda?

 ARAMAS tohto medewehki me lidu men kin mihla pahn eh soumaso oh e soumaso kin lemeiong. Ahpw en wia emen sapwellimen Koht lidu uhdahn weksang met. Paipel mahsanih me Kristian men kak pilada en wiahla lidun Soumas limpoak men. Ni mehlel, ni wahnpoaron Pohl eh kangoange Kristian kan ren wiahla “lidun” Siohwa kei, e ndindaiong irail ren papah Koht pwehki arail limpoak ong Ih. (Rom 6:22) Dahme kin pidada en wia soangen lidu menet? Ia duwen atail kak tehk mwahu me kitail en dehr wiahla lidun Sehdan oh eh sampah? Oh ia kamwahu kan me kohsang atail wia sapwellimen Siohwa lidu oh papah ih ni lelepek?

2. (a) Dahme kahrehda mehn Israel men ele pilada en pousehlahte wia emen lidu? (b) Ma lidu men men doaksaleng, dahme met kasalehda?

² Sapwellimen Koht Kosonned ong mehn Israel ko sewese kitail en wehwehki dahme anahn pwehn wiahla sapwellime lidu. Lidu mehn Ipru men kak saledekla sang eh papah eh soumaso ni keisuhwen sounpar. (Eks. 21:2) Ahpw ma liduo uhdahn poakohng eh soumaso oh sohte men kohkohsang, e kak mihmi. Sapwellimen Siohwa Kosonnedo mweidada met en wiawi. Soumaso pahn kahrehla liduo ni wenihmw de uhr en ihmwo pwehn doaksaleng. (Eks. 21:5, 6) Dahme kahrehda e pahn wia met? Pwehki ni lokaiahn Ipru, madamadau en peik kin dokedoke emen eh kin rong. Eri ni eh doaksalengehr, liduo pahn kasalehda me e men pousehlahte papah eh soumaso ni peik. Met duwehte atail inoukihong Siohwa atail mour. Ni atail wia met, kitail kasalehda atail men peikiong ih pwehki atail poakohng.

3. Dahme kahrehda kitail inoukihong Siohwa atail mour?

³ Mwohn atail papidaisla, kitail pilada kitail en papah Siohwa, de wiahla sapwellime lidu. Ni atail inoukihong ih atail mour, kitail inoukihda me kitail pahn peikiong oh wia dahme e kupwurki kitail en wia. Sohte me idingkihong kitail en wiahda pilipil wet. Pil ni me pwulopwul kan ar papidaisla,  re wia met pwehki pein nsenarail a kaidehn pwehn kaperenda arail pahpa oh nohno kan. Kitail koaros pein pilada en inoukihong atail Soumaso nanleng, Siohwa, atail mour pwehki atail poakohng. Wahnpoaron Sohn ntingihedi: “Iet duwen wehwehn poakohng Koht: kitail en peikiong sapwellime kosonned akan.”​—1 Sohn 5:3.

4. Dahme kitail anahne wia pwehn wiahla “lidun pwung” kei?

⁴ Kitail uhdahn kalahngankihong Siohwa eh ketikihong kitail dahme kitail anahne pwehn wia sapwellime lidu kan! Atail pwoson sapwellimen Sises meirong kak kahrehda kitail en dehr mi pahn kaundahn dihp. Met wehwehki me mendahki atail wiahte aramas soh unsek kei, kitail pilada en peikiong Siohwa oh Sises nin duwen atail Soumas. Wahnpoaron Pohl kawehwehda met nan ehu nah kisinlikou ko. E nda: “Kumwail en kin wiahkin kumwail aramas mehla kei me mehsangehr dihp, ahpw aramas momour kei me kin miniminiong Koht rehn Krais Sises.” E pil kihda mehn kataman: “Pwe mehlel kumwail eseier met: ni amwail mweidohng pein kumwail pwe en wiahla lidun emen oh peikiong, eri, mehlel kumwail me lidun me kumwail kin peikiong—ma ong dihp, me imwilah mehla, de ong peik, me imwilah pwung rehn Koht. Ahpw kalahngan en Koht! Pwe mahso kumwail me lidun dihp, ahpw met kumwail kin peikiong mehlel en padahk me kumwail aleier nan mohngiongimwail kan. Kumwail kasaledeksangehr dihp oh wialahr lidun pwung.” (Rom 6:11, 16-18) Tehk me Pohl kasalehda me kitail anahne ‘peikiong mehlel . . . nan mohngiongitail kan.’ Eri ni atail inoukihong Koht pein kitail, kitail wiahla “lidun pwung” kei.

5. Dahme kitail koaros anahne pelianda, oh dahme kahrehda?

⁵ Nin duwen sapwellimen Koht lidu kei, kitail anahne pelianda soahng riau. Keieu iei atail soh unsek. Pohl pil anahne pelian soahng wet. E nda: “Nan kapehdi kin perenkihda kosonned en Koht. Ahpw I kin kilang ehu soangen koasoandi tohrohr me kin wia eh doadoahk ni paliwereiet—ehu soangen koasoandi me kin uhwong kosonnedo me mohngiongi kin pwungki. Koasoandi tohrohr wet kahrehiong ei selidi pahn kosonned en dihp me kin wia doadoahk ni paliwereiet.” (Rom 7:22, 23) Pwehki atail soh unsek, kitail anahne pelipelian atail ineng kan en paliwar, de ineng kan en wia dahme Koht sohte ketin kupwurki. Wahnpoaron Piter kangoangehki kitail: “Kumwail en kin mour saledek; ahpw kumwail dehpa kin doadoahngki amwail saledek pwehn wia mehn pwaindi mehkot suwed, ahpw kumwail en kin momour nin duwen lidun Koht kei.”​—1 Pit. 2:16.

6, 7. Ia duwen Sehdan eh wiahiong sampah en mwomwen lingan?

⁶ Keriau, kitail anahne pelianda sampah wet me mi pahn manaman en ngehn saut akan. Sehdan iei kaunen sampah wet oh e kin doadoahngki soangen tehtehn mahwen koaros me e ahneki pwehn kauwehla atail loalopwoat ong Siohwa oh Sises. Sehdan men kitail en wiahla eh lidu kan sang ni eh kin kasonge kitail en wiahla kisehn eh sampah. (Wadek Episos 6:11, 12.) Ehu ahl e kin wia met iei sang ni eh wiahiong sampah en mwomwen lingan ong mesetail, duwehte mehkot me kitail men iangala. Wahnpoaron Sohn katamankin kitail: “Ma kumwail kin poakohng sampah, poakepen Sahmo sohte mi loalamwail. Pwe mepwukat koaros kisehn sampah: dipen ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda—mepwukat koaros sohte kohsang rehn Sahm, re kohsang nin sampah.”​—1 Sohn 2:15, 16.

⁷ Nan sampah pwon, aramas akan men ahneki dipwisou tohto. Sehdan kahrehiong irail ren kamehlele me arail naineki mwohni tohto pahn kihong irail nsenamwahu. Sidohwa laud kan inenen tohto. Pesines kan kin kangoange soangen madamadau me dahme keieu kesempwal iei en ahneki soahng tohto oh peren tohto. Karasepe, nuhspehpa kan kin kihda pakair kan pwe  kitail en men pwainda soahng kapw kan oh likou kan. Ei, soahng tohto kin kangoange kitail en wekidala mwomwen atail mour pwehn pahrekiong madamadau en sampah.

8, 9. Soangen keper dahieu mie? Dahme kahrehda e keper?

⁸ Ni mwehin tepin Kristian ko, Piter katamanki Kristian ko duwen irail kan nan mwomwohdiso me tepida ahneki madamadau en sampah. E nda: “Ih ar peren en wiahda mehkoaros ni sansal me paliwararail kan inangih; re me kanamenek oh kasaroh ni ar kin iang kumwail sak, oh pereperenki ar pitipitih kumwail ni ahnsowo! Re kin wiahda kapahrek en pohnmwahso kei me soh-audepe, oh kin doadoahngki tiahk suwed pwelipwel kan en paliwar pwe en kainangihodohng rehrail irail kan me ahpwtehn mweidohsang nan mour sapwung. Re kin inoukihong irail saledek, ni pein irail ar kin wiewia lidun kaupahr—pwe aramas kin liduwih mehkot me e lohdier pah.”​—2 Pit. 2:13, 18, 19.

⁹ Ma kitail song en kaitarala ineng en ahneki “mehkan me aramas kin kilang oh ahnehda,” de ahneki mehkoaros me kitail mwahuki, kitail sohte pahn ahneki saledek. Kitail pahn wiahla lidun Sehdan me Tepil, kaunen sampah wet me soh sansal. (1 Sohn 5:19) Uhdahn mie keperpen wiahla lidun men kepwehpwehla. Ma kitail lohdi pahn keper wet, e kak apwal en pitsang.

10, 11. Ihs me Sehdan keieu men uhwong? Ia duwen sukuhl laud kan ar kak kahrehda kahpwal ong Kristian pwulopwul kan?

¹⁰ Sehdan kin peiong irail me sohte koahiek. Irail me pwulopwul kan iei me e keieu men uhwong. E sohte perenki ni me pwulopwul men, de sohte lipilipil ihs, eh pilada en wiahla sapwellimen Siohwa lidu. Sehdan men irail me inoukihong Siohwa arail mour ren sohla loalopwoat oh sohla poadidiong Koht.

¹¹ Ni lidu men eh doaksaleng, ele e ekis medekla. Ahpw mwuhr, mie lipwe me pahn kasalehiong koaros me e piladahr en mi rehn eh soumaso. E kak apwal de kamedek ong me pwulopwul kan ren wiahda pilipil kan nan arail mour me weksang ahn meteikan. Karasepe, Sehdan kin kangoange madamadau me en ahneki doadoahk nan eh sampah pahn wiahiong omw mour en uhdahn mie katepe. Ahpw atail mour pahn uhdahn mie katepe ihte ma kitail wiahki Siohwa me keieu kesempwal nan atail mour. Sises mahsanih: “Meid pai me koapworopworki Koht ni mehkoaros.” (Mad. 5:3) Kristian kan inoukihda arail mour ren wia kupwuren Siohwa, kaidehn Sehdan. Re kin wadek Paipel oh doudouloale “nin rahn oh nipwong.” (Wadek Melkahka 1:1-3.) Ahpw pali laud en sukuhl laud  kan kin kihda kasukuhl kan me kihsang en lidun Koht men eh ahnsou laud en doudouloale Mahsen en Koht oh papah Siohwa.

12. Pilipil dahieu me me pwulopwul tohto ahneki rahnwet?

¹² Soumas men me ahneki madamadau en sampah kak kahrehda mouren Kristian men en apwal. Nan nah keieun kisinlikou ong mehn Korint ko, Pohl nda: “Ladu men kowe ahnsou me Koht ketin malipeiuko? Me mwahu, ke dehr nsensuwedki; ahpw ma ke kak maiaudahsang, eri, me pil mwahu, isaneki.” (1 Kor. 7:21) Ma liduo mi pahn soumas men me kahrehiong eh mour en apwal, e pahn mwahu ong liduo en saledeksang. Rahnwet, kosonned en sahpw tohto kin nda me me pwulopwul kan anahne kohla sukuhl erein sounpar kei. Mwurin mwo, mie pilipil ehu me re ahneki. Re kak pilada ma re men kalaudehla arail sukuhl de soh. Ni Kristian men eh pilada en kohla iang sukuhl laud ongete pwehn ahneki doadoahk nan sampah wet, e pahn kak uhdahn apwal ong ih en ahneki saledek en doadoahngki pali laud en eh ahnsou ong papah Siohwa.​—Wadek 1 Korint 7:23.

13. Kasukuhl dah kan me keieu sewese sapwellimen Siohwa ladu kan?

¹³ Pohl katamanki Kristian ko me kousoan Kolose: “Eri, kumwail kanahieng pwe emen de pitihkinkumwaildi loalokong widing mwahl en aramas akan, me re kin alehdi sang ni padahk kodoudou en mehn kawa ko, oh sang rehn ngehn suwed akan me kin kakaun wasa nin sampah, a kaidehn sang rehn Krais.” (Kol. 2:8) Sounpadahk tohto kin padahngki “loalokong widing mwahl en aramas akan, me re kin alehdi sang ni padahk kodoudou en mehn kawa ko.” Sukuhl laud kan, me pil kin kalapw padahngki soangen padahk pwukat, sohte kin ahnsou koaros sewesehki tohnsukuhl kan kasukuhl kan me pahn kaunopada irail ong dahme kin uhdahn wiwiawi nan mour. Ahpw Kristian kan kin pilada soangen kasukuhl kan me pahn kihong irail koahiek pwe ren kak ahneki dahme re uhdahn anahne oh papah Koht. Re kin kesempwalki kaweid me Pohl kihong Timoty: “Eri, pelien lamalam [“poadidi ong Koht,” NW] kin uhdahn kakepwehpwehla aramas, ma re itarki soahng kan me re ahnekier. Eri, ma kitail tungoalenki kisin tungoal akan oh likou, met e itarohng kitail.” (1 Tim. 6:6, 8) Kristian mehlel kan kin kilangwohngete ren alehdi “kisinlikoun kapehse oh kaping” sang ni arail iang kalohk ni uwen arail kak, a kaidehn ren alehdi kisinlikou en sukuhl laud kan.​—Wadek 2 Korint 3:1-3.

14. Ni atail wadek Pilipai 3:8, dahme kitail sukuhlki duwen Pohl eh medewehiong eh wia lidun Koht oh Krais?

¹⁴ Kitail kak sukuhlki ahn Pohl mehn  kahlemeng. E ale kasukuhl sang Kamaliel, sounpadahk en Kosonned kan en mehn Suhs. Sukuhl me e iang kak kapahrekiong sukuhl laud kan rahnwet. Ahpw ia eh madamadau ni eh kapahrekihong kasukuhl wet ong ahneki pwais kaselel en wia lidun Koht oh Krais? E ntingihedi: “I . . . mwamwahlkihla soahng koaros pwehki soahngteieu me inenen katapansang oh kesempwalsang, iei marain en Krais Sises, ei Kaun.” E doula nda: “I keselahr soahng koaros pwehki ih, I wiahki soahng koaros mehn lekdekla kei, pwe I en kak ale Krais.” (Pil. 3:8) Ahn Pohl madamadau kak sewese Kristian pwulopwul kan oh arail pahpa nohno kan ren wiahda pilipil mwahu me pid sukuhl. (Menlau kilang kilel kan.)

15, 16. Soangen kasukuhl dah me sapwellimen Siohwa pwihn kihda? Ia kahrepen kasukuhl pwukat?

¹⁵ Soangen madamadau dah me aramas akan ahneki nan wasahn sukuhl laud tohto? Tohnsukuhl kan sou kin kalapw wia tiahk samin oh kamamsakau? Sukuhl pwukat sou pil kin padahngki padahk me dene mour pein miehla? (Ep. 2:2) Weksang met, sapwellimen Siohwa pwihn kin kihda kasukuhl me keieu mwahu nan arail mwomwohdiso kan, wasa me mie popohl. Kitail koaros kak paiekihda Sukuhl ong Sapwellimen Koht Doadoahk me kin wiawi wihk koaros. Pil mie kasukuhl teikan me kitail kak paiekihda. Karasepe, mie kasukuhl ehu ong brother kiripw pioneer kan me adaneki Sukuhl en Paipel ong Brother Kiripw kan. Pil mie sukuhl ehu ong pwopwoud pioneer kan me adaneki Sukuhl en Paipel ong Pwopwoud Kristian kan. Sukuhl pwukat koaros sewese kitail en peikiong atail Soumaso nanleng, Siohwa.

¹⁶ Kitail kak diarada padahk mehlel kesempwal tohto ni atail wia roporop nan neitail sawaspen Paipel kan oh doadoahngki neitail mehn sawas en roporop teikan me mie. Uhdahn kahrepen atail ale kasukuhl en Paipel iei pwehn kaudokiong Siohwa. E padahkihong kitail duwen atail pahn sewese meteikan wiahla kompoakepahn Koht. (2 Kor. 5:20) Eri irail kan me kitail padahki pahn kak padahki meteikan.​—2 Tim. 2:2.

17. Ma kitail pilada kasukuhl me keieu mwahu, soangen kapai dah kan me kitail alehdi?

¹⁷ Sapwellimen Sises karasaras en papah silimeno kasalehda me ladu lelepek riemen alehdi kaping pwehki ara doadoahk. Met kaperenda ira oh pil ara soumaso. Pwehn kasalehda eh pwungki ara doadoahk, soumaso katohtohihala ara pwukoa kan. (Wadek Madiu 25:21, 23.) Kitail kak peren oh ahneki mour me mie katepe ma kitail pilada kasukuhl me keieu mwahu. Karasepe, Michael uhdahn pweida nan sukuhl. Ni eh sounpadahk ko luke ih ong tuhpene ehu pwe ren kak koasoiapene eh pahn kak kohla iang sukuhl laud kan, re pwuriamweikihla me e pilada en sohte ale sukuhl laud. Ahpw e ale soangen kasukuhl me sohte anahne ahnsou laud pwe en koahiekla nan soangen doadoahk kan me kak apwalih eh anahn kan ni eh pioneer. Ia duwe, e medewe me e wiahda pilipil sapwung? E nda me kasukuhl me e alehsang nan Paipel oh pil ni eh wia elder men nan mwomwohdiso uhdahn kesempwal. E nda: “Kapai kan oh pwais kaselel kan me I ahneki uhdahn kesempwal sang mwohni koaros me I kakete koadoahkihada. I uhdahn kalahnganki ei sohte pilada en kohla sukuhl laud.”

18. Dahme kahrehda kitail en pilada kasukuhl me keieu mwahu?

¹⁸ Kasukuhl me keieu mwahu padahkihong kitail kupwuren Siohwa oh sewese kitail en wia sapwellime lidu kan. E kihong kitail koapworopwor en “maiaudahsang mouren liduwih mehla” oh mwuhr “iang sapwellimen Koht seri kan nan arail saledek lingan.” (Rom 8:21) Ahpw keieu kesempwal, met iei ahl me keieu mwahu en kasalehda me kitail uhdahn poakohng atail Soumaso, Siohwa.​—Eks. 21:5.