DAHME KAHREHDA EKEI KIN PEIKASAL: Ekei aramas, mehnda ma irail uhdahn anahne emen en kamweitirailla, re kin pehm me re roporop ma re peki rehn Koht en ketin sewese irail en apwalihala arail kahpwal kan. Emen lih me ede Raquel nda: “Ni ei kin medewehla uwen tohto en aramas nin sampah oh kahpwal laud kan me re ahneki, mwomwen me ei kahpwal kan sohla kesempwal kahrehda I kin pweiek en peki sawas sang rehn Koht.”

DAHME MAHSEN EN KOHT PADAHNGKI: Ni ahl kaselel ehu, Koht ketin wiahdahr koasoandi ehu pwehn sewese oh kamweitala aramas akan. Aramas koaros nan sampah rahnwet sohsohki dihp. Met kahrehda re sohte kak kapwaiada ni unsek dahme Koht ketin kupwurki. Ahpw Koht ketin “poakohng kitail, oh ketin poaronehdo Sapwellime Iehros [Sises Krais] pwe en wiahla tomwpen dipatail kan.” (1 Sohn 4:10) Pwehki meirong en Sises, Koht ketin kahrehda kitail en kak ale mahkpen dipatail, ahneki nsenmwakelekel, oh koapworopwor en mour soutuk nan sampah kapw meleilei ehu. * Ahpw ia duwe, meirong wet kin ongete kamwahupen tohnsampah pwon, de e pil kin kasalehda duwen Koht eh ketin nsenohki pein emenemen kitail?

Medewehla duwen wahnpoaron Pohl. E uhdahn mwekidki sapwellimen Sises meirong kahrehda e ntingihedi: “I momourki sang ni ei pwoson sapwellimen Koht Iehroso, me ketin loalloale ie oh meirongkihong Koht pein ih pwehki ngehi.” (Kalesia 2:20) Mehlel, Sises ketin pwoula mwohn Pohl wiahla Kristian men. Ahpw Pohl kin kilangwohng meirongo nin duwen kisakis ehu ong pein ih sang rehn Koht.

Sapwellimen Sises meirongo kin wia kisakis ehu ong pein uhk sang rehn Koht. Kisakis wet kin kadehdehda ia uwen Koht eh ketin kesempwalkin uhk. E kak kihong uhk “roson soutuk oh koapworopwor kehlail,” oh kahrehda ‘ke en kak wia oh koasoia mehkoaros me mwahu.’​—2 Deselonika 2:16, 17.

Sises tounmeteikihla moure nin duwen meirong ehu kereniong sounpar 2,000 samwalahro. Mehn kadehde dah me mie me Koht ketin kupwurki ken ahneki nanpwungmwahu reh rahnwet?