Ia duwe, e pwung Depit en kasik me Koht en ketin nsenohkin ih oh sohte meliehla ih? Koht kin ketin nsenohkin uhk? Aramas tohto kin apwalki kamehlele me Koht wasa lapalahpie kin ketin kupwurki esehla irail. Dahme kahrehda?

Ehu kahrepe iei me Koht ketin lapalap oh ileile sang aramas akan. Mwohn mwoale ileile, wehi kan koaros kin “rasehngete kisin dingiding en pihl kis . . . rasehng kisin weren pwelpar kei.” (Aiseia 40:15) Emen sounnting en pwuhk me kin koasoia duwen pelien lamalam nda me ma kitail kamehlele me Koht emen kin nsenohkin kitail oh men ese dahme kitail wiewia, kitail nohn daulihala.

Ahpw ekei aramas kin pehm me arail wiewia kan me kahrehda re sohte warohng sapwellimen Koht kupwuramwahu. Karasepe, emen ohl me ede Jim koasoia: “I kin kalapw kapakapki ien meleilei oh kanengamah, ahpw ahnsou koaros I kin pwurehng lingeringerda. Mwuhr, I medewehda me I uhdahn suwed oh me Koht sohte pahn kak ketin sewese ie.”

Ia duwe, Koht uhdahn ketin dohsang aramas akan me kahrehda e sohte kin ketin tetehk irail? Ia uhdahn sapwellime pepehm ong aramas soh unsek kan? Ma Koht sohte ketin padahkihong aramas akan duwen ih, sohte emen kak kawehwehda ni pwung duwen Koht oh sapengala peidek pwukat. Ahpw mahsen en Koht ong aramas akan, Paipel, kin kamehlelehiong kitail me kaidehn ih Koht emen me sohte kin ketin nsenohki emenemen aramas. Paipel mahsanih: “Koht sohte dohsang emenemen kitail.” (Wiewia 17:27) Nan oaralap pahieu mwurin met, kitail pahn koasoiapene dahme Koht ketin padahkihong kitail duwen eh kin ketin nsenohki emenemen kitail oh pil ia duwen eh ketin kasalehda soangen nsenoh wet ong aramas akan.