OARALAP | KE KAK KARANIHALA KOHT
Ke Kin Ese oh Doadoahngki Mwaren Koht?
Ke kak medewehla emen kompoakepahmw keren me ke sehse ede? Mwein soh. Emen lih en Bulgaria me adaneki Irina koasoia, “Ke sohte kak karanihala Koht ma ke sehse mware.” Nin duwen iren onop en mwoweo kasalehda, e kaperen en ese me Koht kin ketin kupwurki kitail en karanihala ih. Ihme kahrehda, Koht ketin doadoahngki Paipel pwehn padahkihong kitail ihs ih ni eh mahsanih: “Ngehi, KAUN-O, * . . . Ih mwarei en met kohkohlahte; ih me dih koaros pahn kin kamwarehkin ie kohkohlahte.”—Eksodus 3:15.
Koht ketin doadoahngki Paipel pwehn padahkihong kitail me mware iei Siohwa.
Ia duwe, e uhdahn kesempwal ong Siohwa ma kitail esehla de doadoahngki mwareo, de soh? Medewehla met: Mwaren Koht, me ntingdi ni mesen nting pahieu YHWH, de Tetragrammaton, pwarada nan Palien Paipel ni Lokaiahn Ipru kereniong pak 7,000. Mwar wet pwarada pak tohtohsang ahd teikan me ntingdi nan Paipel. Met uhdahn kadehdehda me Siohwa ketin kupwurki kitail en esehla oh doadoahngki mware. *
Kompoakepahnkihla emen kin kalapw tepikihda aramas riemen ara esehla edera ko. Ke ese mwaren Koht?
Ahpw ele ekei medewe me pwehki Koht ketin sarawi oh me keieu lapalap, e sohte pahn kasalehda wahu ma kitail doadoahngki mwareo. Met mehlel, e pahn sapwung en doadoahngki mwaren Koht ni ahl me sohte konehng, duwehte omw sohte pahn doadoahngki eden kompoakepahmw keren men ni ahl me sohte konehng. Ahpw, kupwuren Siohwa iei me irail koaros me poakohng ih en kawahuihala oh kasalehda mware. (Melkahka 29:2; 96:2, 8) Tamanda me Sises ketin padahkihong sapwellime tohnpadahk ko ren kapakapki: “Samat me ketiket nanleng: Mwaromwi en sarawihla rehn aramas koaros.” Kitail pil kak iang kasarawihala mwaren Koht sang ni atail padahkihong meteikan. Atail wia met pahn kahrehda kitail en karanihala ih.—Madiu 6:9.
Paipel kasalehda me Koht kin ketin tetehk kanahieng “irail kan me kin medemedewe mware.” (Malakai 3:16, NW) Siohwa ketin inoukihong irail: “I pahn sinsile irail kan me ese me ngehi iei KAUN-O. Ni ar pahn likwerih ie, I pahn sapeng irail; ni ar pahn lelohng apwal, I pahn ieiang irail.” (Melkahka 91:14, 15) En esehla oh doadoahngki mwaren Siohwa kin uhdahn kesempwal ma kitail men ahneki nanpwungmwahu keren reh.
^ Nan Kawehwehpen Lepin Mahsen kan nan Paipel en Pohnpei: “KAUN-O – Nan kawehwe wet lepin mahsen lepet wiliandi Iahweh, mwaren [Koht] ni mahsen en Ipru.”
^ Ahpw kawehwehn Paipel tohto kihsang mwaren Koht, mendahki mwar wet kin kalapw pwarada nan Palien Paipel ni Lokaiahn Ipru, de me tohto kin kahdaneki Kadehde Mering. Ahpw re uhd wiliankihdi lengileng kan me duwehte “Kaun” de “Koht.” Pwehn kalaudehla omw wehwehki ire wet, menlau kilang pali 225-227 en pwuhken Dahme Paipel Uhdahn Padahngki? me Sounkadehdehn Siohwa kan wiahda.
