Mwohn omw tepida wia mehkot sohte lipilipil, ke ele kin medewe, ‘Ia duwen ei kak paiekihda met?’ Ia duwe, e mwomwen roporop en idek peidek wet duwen kapakap? Soh. Kitail kin men ese ma mie katepen atail kin wia met. Pil ohl mwahwo Sohp peikasalki ma Koht pahn ketin sapengala eh kapakapo.​—Sohp 9:16.

Nan oaralap kan mwoweo, kitail koasoiapene mehn kadehde kan me kasalehda me kapakap wia laudsang ihte tiahk ehu me pelien lamalam kan kin wia de mehn kansenamwahwihalahte aramas. Koht mehlelo uhdahn kin ketin karonge atail kapakap kan. Ma kitail kapakap ni ahl pwung oh kapakapki soahng kan me konehng, e pahn ketin karonge kitail. Ni mehlel, e kin ketin kangoange kitail en karanihala ih. (Seims 4:8) Eri, dahme kitail kak kasik ma kitail wiahki kapakap kisehn atail mour? Kitail kilang ekei kamwahu kan.

Ia duwe, ni kahpwal kan ar pwarada nan omw mour, ke kin pehm me ke sohla kakohng omw pwunod kan? Nan soangen ahnsou kan me duwehte met, Paipel kangoange kitail en “poadidiong kapakap pil ahnsou koaros” oh ‘peki dahme kitail kin anahne’ rehn Koht. (1 Deselonika 5:17; Pilipai 4:6) Paipel kamehlelehiong kitail me ma kitail sohpeiong Koht ni kapakap, ‘sapwellimen Koht popohl, me inenen laudsang uwen atail dehdehki, ahpw pahn nekinekid mohngiongitail oh pil atail lamalam.’ (Pilipai 4:7) Kitail kak ahneki mour nsenamwahu oh meleilei sang atail kin patohwanohng Samatailo nanleng atail iren kapwunod kan. Koht ketin kangoange kitail en wia met. Melkahka 55:22 mahsanih: “Mweidohng KAUN-O omw kahpwal akan, eri e pahn ketin doareiukala.”

Aramas tohtohie nan sampah pwon iangehr ahneki  pepehm meleilei wet. Hee Ran, sang Palieir en Korea, nda: “Mendahki mie ei kahpwal laud kan, ni ei kin kapakapki mepwukat, I pehm me I saledekla sang ei iren kapwunod kan oh I pehm me I ahneki kehl en dadaurete.” Cecilia, sang Philippines, nda: “Nin duwen nohno men, I kin uhdahn pwunodki nei serepein ko oh ei nohno, me met sohte kak kasawihada ihs ngehi. Ahpw pwehki ei kapakap, I kak pousehlahte wia dahme I kin wia ehuehu rahn oh sohla nohn pwunod. I ese me Siohwa pahn ketin sewese ie apwalih irail.”

Ke kin lelohng pwunod laud, ele pil nan irair kan me keper ong omw mour de nan irair kan me uhdahn laud? Atail kin kapakapohng “Koht me pwarer en kansenamwahu koaros” kak wahdo nsenamwahu laud. Paipel mahsanih  me Koht “kin ketin sewesei kitail nan atail apwal akan koaros.” (2 Korint 1:3, 4) Karasepe, ehu pak ni Sises eh uhdahn ketin pwunodada, e “ketin kelehpwikihdi oh loulou.” Ia imwilahn met? “Tohnleng men sang nanleng ahpw pwarodohng oh karosonda.” (Luk 22:41, 43) Pil emen ohl lelepek, Nehmaia, lokolongki ahn aramas suwed akan ar kin kamasepwehki ih oh song en kauhdi ih sang wia sapwellimen Koht doadoahk. E patohwan kapakap: “Maing Koht, komwi ketin kakehleiehda met!” Soahng kan me wiawi mwurin met kasalehda me Koht uhdahn ketin sewese Nehmaia en powehdi eh masak oh en pweida nan eh doadoahk. (Nehmaia 6:9-16) Reginald, nan Ghana, kawehwehda dahme wiawihong ih ni eh kin kapakap: “Ni ei kin kapakap, ahpw keieu ahnsou kan me I sohla kakohng ei kahpwal kan, I kin pehm me I koasoiaiong emen me kak sewesehkin ie ei kahpwalo oh kin kamehlelehiong ie me I sohte anahne pwunod.” Ei, Koht kak ketin kansenamwahwihala kitail ni ahnsou me kitail kin kapakapohng ih.

Ekei pilipil kan me kitail wiahda kak pidada oh kamwakid kitail oh irail kan me kitail poakohng. Ia duwen atail kak wiahda pilipil kan me kasalehda erpit? Paipel mahsanih: “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie.” (Seims 1:5) Ma kitail kapakapki erpit, Koht kak ketin doadoahngki sapwellime manaman en kahluwa kitail en wiahda pilipil kan me kasalehda erpit. Kitail kak peki ni sansal sapwellimen Koht manaman pwehki Sises ketin kamehlelehiong kitail me ‘Samatail me ketiket nanleng . . . pahn ketikihong [“sapwellimen Koht manaman,” NW] irail kan me kin peki reh.’​—Luk 11:13.

Pil pein Sises pehm me e anahne patohwan peki sawas sang Semeo ni eh kin wiahda pilipil kesempwal kan. Paipel mahsanihong kitail me ni ahnsou me Sises pahn ketin pilada ohl 12 ko me pahn papah nin duwen sapwellime wahnpoaron, e patohwan kapakapohng Koht pwohng ehu pwon.​—Luk 6:12.

Duwehte Sises, me tohto rahnwet nsenamwahula ni arail kilangehr ia duwen Koht eh ketin sapengala arail pekipek kan en wiahda pilipil kan me kasalehda erpit. Regina, sang Philippines, koasoia duwen soangsoangen kahpwal kan me e lelohng, duwehte apwalih pein ih oh eh peneineio mwurin eh pwoudo mehla, sohla eh doadoahk, oh kahpwal en apwalihada seri kan. Dahme sewese ih en wiahda pilipil kan me kasalehda erpit? Regina nda, “I likih sapwellimen Siohwa sawas ni ei kin kapakap.” Kwabena, sang Ghana, koasoia duwen dahme kahrehda e peki sapwellimen Koht sawas, “I sohla ahneki doadoahk en mwohni en kauwada ihmw me pweimwahu.” Ni eh medemedewe duwen soahng kan me e kak pilada, e nda, “I kin kaukaule kapakapohng Siohwa en ketin kaweid ie en wiahda pilipil pwung.” E pil nda, “I uhdahn pehm me Siohwa ketin sewese ie en pilada doadoahk ehu me kak sewese ie en apwalihala ei nanpwungmwahu reh oh ei anahn en paliwar.” Ke pil kak pein pehm sapwellimen Koht kaweid ni omw pahn kapakapki irair kan me kak kamwakid omw nanpwungmwahu reh.

Kitail koasoiapenehr ekei soahng kan me kapakap kak wia ong uhk. (Pwehn kilang pil ekei karasaras kan, menlau kilang koakon me oaralape “ Kamwahu kan en Kapakap.”) Ahpw pwe ken ale kamwahu pwukat, keieu ke anahne esehla Koht oh kupwureo. Ma met iei dahme ke anahne, se kangoange iuk en peki Sounkadehdehn Siohwa kan en sewese iuk en onop Paipel. * Met kak wia omw tepin kahk en karanihala Koht me “kin ketin sapeng pekipek kan.”​—Melkahka 65:2.