1, 2. Dahme ekei aramas kin medewehki duwen Koht?

 ARAMAS tohto kamehlele me Koht sohte ketin katapanki arail wiewia kan. Re leme me Koht sohte uhdahn ketin nsenohki dahme kin wiawiong irail. Karasepe, mwurin melimel laud ehu kauwehla wasa laud ehu nan Philippines nan November 2013, mayor en kahnimw laud ehu nda: “Mwein Koht ketiketseli ehu wasa tohrohr.”

² Aramas teikan kin medewe me Koht sohte kak ketin mwahngih dahme re kin wiewia. (Ais. 26:10, 11; 3 Sohn 11) Ekei aramas ni mwehin wahnpoaron Pohl pil ahneki soangen madamadauohte. Pohl ndahki irail: “Aramas akan . . . kahngalahr medemedewe duwen mehlel en Koht.” Irail direkihla soangen suwed oh mwersuwed koaros, oh pil noahrok oh sempoak.​—Rom 1:28, 29.

3. (a) Peidek dah kan me kitail en pein idek rehtail? (b) Nan Paipel, dahme sapwellimen Koht sawas kin kalapw dokedoke?

³ Ahpw ia duwen kitail? Kitail ese me Siohwa ketin mwahngih soahng koaros me kitail kin wia. Ahpw ia duwe, kitail kamehlele me Siohwa ketin nsenohkin kitail? Kitail kin pohnese duwen sapwellime sawas nan atail mour? Nan Paipel, sapwellimen Koht sawas kin  kalapw dokedoke sapwellime manaman. E kin ketin doadoahngki sapwellime manaman pwehn sewese sapwellime ladu kan oh pwehn kalowehdi sapwellime imwintihti kan. (Wadek Deuderonomi 26:8.) Sises mahsanih me ekei aramas pahn “udiahl Koht.” (Mad. 5:8) Ia duwe, kitail iang aramas pwuko? Ia duwen atail kak “udiahl Koht”? Kitail pahn sukuhlki duwen irail kan nan Paipel me pohnese duwen sapwellimen Koht sawas nan arail mour oh irail kan me sohte kin. Kitail pil pahn sukuhlki ia duwen pwoson eh kin sewese kitail en pohnese duwen sapwellimen Koht sawas.

4. Dahme kahrehda imwintihti en mehn Israel ko kasalehda me re sohte men pohnese sapwellimen Koht sawas?

⁴ Mahso, aramas tohto ahneki ahnsou mwahu en kilang oh rong ia duwen Koht eh ketin sewesehda Israel. Siohwa ketin doadoahngki manaman kan pwehn ketin kapitala sapwellime aramas akan sang Isip oh kalowehdi nanmwarki tohto nan Sapwen Inowo. (Sos. 9:3, 9, 10) Mendahki nanmwarki teikan ar rong oh kilang duwen Siohwa eh ketin kapitala sapwellime kan, “irail koaros eri pokonpene oh kapokonepene ar karis en sounpei kan pwe re en mahweniong Sosua oh mehn Israel kan.” (Sos. 9:1, 2) Nanmwarki ko ahneki ahnsou mwahu en pohnese me Koht kin ketin sewese mehn Israel ko ni arail mahweniong irail. Pwehki sapwellimen Siohwa manaman lapalap, “ketipin ahpw uhdi, oh maram ahpw pil sohla mwekid, lao lel tohn wehin Israel ar kalowehdi ar imwintihti kan.” (Sos. 10:13) Ahpw Siohwa “ketin kupwurehda [imwintihti ko] re en mahweniong mehn Israel ko.” (Sos. 11:20) Imwintihti en mehn Israel ko lohdi pwehki re sohte men pohnese me Siohwa me ketin mahmahwenkin sapwellime aramas ako.

5. Dahme Nanmwarki suwed Eihap sohte kamehlele?

⁵ Mwuhr, mie pak me Nanmwarki suwed Eihap ahneki ahnsou mwahu en pohnese duwen sapwellimen Koht manaman. Elaisa ndaiong ih: “E pahn sohla pwoaik oh keteu . . . lao lel ahnsou me I pahn patohwan.” (1 Nan. 17:1) Met kak wiawi ihte pwehki sapwellimen Koht manaman, ahpw Eihap sohte kamehlele met. Mwuhr, Elaisa kapakapohng Siohwa, oh Koht ketin sapengala ih ni eh ketin kamwerehdi kisiniei sang nanleng. Eihap kilang met. Elaisa eri padahkihong Eihap me Siohwa pahn pwurehng ketin kamwerehdi keteu mosul. (1 Nan. 18:22-45) Eihap kilang soahng pwukat koaros, ahpw e pil sohte kamehlele me e kilang sapwellimen Siohwa manaman. Dahme kitail sukuhlkihsang mehn kahlemeng pwukat? Kitail anahne pohnese duwen sapwellimen Koht sawas nan atail mour.

6, 7. Dahme mehn Kipeon ko oh Reap pohnese?

⁶ Mehn Kipeon kan uhdahn weksang wehi teikan me kapilpene irail. Irail pohnese duwen sapwellimen Koht sawas. Re sohte mahweniong mehn Israel kan, ahpw re men ahneki popohl rehrail. Dahme kahrehda? Re nda met pwehki re rong duwen Siohwa oh soahng koaros me e ketin wiadahr. (Sos. 9:3, 9, 10) Re loalokong pwehki re pohnese me Siohwa kin ketin mahmahwenkin mehn Israel ko.

⁷ Reap pil pohnese duwen sapwellimen Siohwa manaman. Kaidehn ih mehn Israel, ahpw e rong duwen Siohwa eh ketin kapitala sapwellime kan sang Isip. Ni ahnsou me lipoahrok riemen sang Israel kohla reh, e ndaiong ira: “I ese me KAUN-O ketikihongkumwailehr sahpw wet.” Reap kamehlele me Siohwa kak ketin kapitala ih oh eh peneineio. E kasalehda eh pwoson Siohwa mendahki e ese me met keper.​—Sos. 2:9-13; 4:23, 24.

8. Ia duwen ekei mehn Israel ko ar pohnese duwen sapwellimen Koht manaman?

 ⁸ Weksang Nanmwarki suwed Eihap, ekei mehn Israel ko me kilang kisiniei mweredi sang nanleng pwehki ahn Elaisa eh kapakapo, pohnesehda me Koht me ketin wia met. Re nda: “KAUN-O kelehpw me Koht!” (1 Nan. 18:39) Ong irail, e sansal me re kilang sapwellimen Koht manaman.

9. Ia duwen atail kak kilang Siohwa oh sapwellime sawas rahnwet?

⁹ Kitail koasoiapenehr duwen mehn kahlemeng mwahu oh suwed kan me sewese kitail en wehwehki ia wehwehn en “udiahl Koht” de pohnese duwen sapwellimen Koht sawas. Ni atail esehla Siohwa oh sapwellime irair kaselel kan, kitail kilang sapwellime sawas eh ‘kamarainihala nan kapehditail kan.’ (Ep. 1:18) Met kamwakid kitail en men alasang aramas lelepek kan mahs oh pil ahnsou wet me kilangehr ia duwen Siohwa eh ketin sewesehda sapwellime kan. Ahpw ia duwe, mie mehn kadehde me Koht kin ketin sewesewese aramas rahnwet?

10. Mehn kadehde dah me kitail ahneki me Siohwa kin ketin sewesewese aramas akan rahnwet? (Menlau kilang tepin kilel.)

¹⁰ Mie mehn kadehde tohto me Siohwa kin ketin pousehlahte sewese aramas akan rahnwet. Kitail kin kalapw rong duwen irail kan me kin kapakapki sapwellimen Koht sawas nan arail mour oh arail kapakap kan pasapengla. (Mel. 53:2) Karasepe, ni Allan eh kalokalohk pohn deke tikitik ehu nan Philippines, e tuhwongada lih emen me tepida sengiseng. Allan nda, “Ni mensengohte, liho kapakapkihong Siohwa pwe sapwellime Sounkadehde kan en kak rapahkihda ih.” Ni eh pwulopwul, liho tapiada onop Paipel rehn Sounkadehde kan, ahpw ni eh pwopwoudida oh keseula ni dekeo, e sohla onop. Koht ketin sapengala eh kapakapo ni ahnsou mwadang oh met sair eh mohngiong. Mwotomwotsang sounpar ehu, e inoukihda eh mour ong Siohwa oh papidaisla.

11, 12. (a) Ia duwen Siohwa eh kin ketin sewesewese sapwellime ladu kan? (b) Menlau kawehwehda ia duwen Siohwa eh ketin sewesehda emen sister.

¹¹ Sapwellimen Siohwa ladu tohto kilangehr duwen Siohwa eh ketin sewese irail ni ahnsou me irail uhdihsang soahng suwed kan duwehte simoak, doadoahngki wini en kasahliel kan, de kilang kilel oh kasdo suwed. Ekei nda me re kin pwurepwurehng song en pein uhdi ahpw re sohte kak. Ahpw, ni ahnsou me irail peki sapwellimen Siohwa sawas, e ketikihong irail “manaman lapalap,” oh met kahrehda re kak uhdihsang arail wiewia suwed kan.​—2 Kor. 4:7; Mel. 37:23, 24.

¹² Siohwa pil kin ketin sewese sapwellime ladu kan en dadaurete pahn arail kahpwal kan. Met wiawihong Amy. E ale pwukoa en iang sewese kauwada Wasahn Kaudok oh imwen misineri pohn deke tikitik ehu nan Pacific. Tiahk en wasao weksang wasa me e kohsang ie. Wasao kalapw sohte lioal oh pihl, nanial kan diren pihl, e kin loaleidki eh peneineio, oh e kin mi nan pere tikitik ehu nan hotel ehu. Ehu rahn, e lokaia laud ong emen sister me iang ih doadoahk. E uhdahn suwedkihda dahme e wiao. Ni eh pwurala nan eh pere rotoroto, e kapakapohng Siohwa oh peki sapwellime sawas. Mwuhr, ni lioalo eh pwurodo, e wadek ehu oaralap nan Kahn Iroir duwen kesepwil en sukuhl en Kilead. Oaralapo koasoia duwen kahpwal kohte me e anahne dadaur. E nda: “I pehm me Siohwa ketin mahmahsen ong ie pwohngo. Met kamwakid ie en pousehlahte nan ei doadoahko.”​—Mel. 44:25, 26; Ais. 41:10, 13.

13. Dahme kadehdehda me Siohwa ketin sewese sapwellime aramas akan en pere arail pwuhng en kalohk?

¹³ Siohwa pil ketin sewese sapwellime kan en uhki rongamwahwo oh katengehdi pwehn kehlail nin duwen kosonned. (Pil. 1:7) Karasepe, ni  ekei koperment kan ar kin song en kauhdi doadoahk en kalohk, kitail kin pere atail pwuhng nan mwoalen kopwung. Kitail kana nan mwoalen kopwung lapalap mpen 268 nan sampah pwon iangahki 24 me kitail kana nan mwoalen kopwung ong pwuhng en aramas nan Iurop (European Court of Human Rights) sangete pahr 2000. E sansal me sohte emen kak kauhdi sapwellimen Siohwa sawas!​—Ais. 54:17; wadek Aiseia 59:1.

14. Mehn kadehde dah teikan me kasalehda me Koht kin ketin ieiang sapwellime kan?

¹⁴ Doadoahk en kalohki rongamwahwo nan sampah pwon pil wia kadehdepen sapwellimen Koht sawas. (Mad. 24:14; Wiewia 1:8) Oh miniminpenehn sapwellimen Siohwa ladu kan sang wehi koaros kak wiawi ihte pwehki sapwellimen Siohwa sawas. Miniminpene wet uhdahn tohrohr! Pil aramas akan me sohte kin papah Siohwa nda: “Mehlelete pwe Koht ketiket rehmwail!” (1 Kor. 14:25) Mie mehn kadehde tohto me kasalehda me Koht kin ketin ieiang sapwellime kan. (Wadek Aiseia 66:14.) A ia duwen komwi? Ke kin pohnese duwen sapwellimen Koht sawas nan omw mour?

15. Dahme kahrehda ekei pak kitail kakete sohte pohnese duwen sapwellimen Siohwa sawas nan atail mour?

¹⁵ Ekei pak, kitail kakete sohte pohnese duwen sapwellimen Koht sawas nan atail mour. Dahme kahrehda? Ni atail ahneki kahpwal tohto, kitail kakete manokehla duwen Siohwa eh ketin sewese kitail pak tohto mwoweo. Met wiawiong Elaisa. E kin eimah, ahpw ni nanmwarki lih Sesepel eh men kemehla ih, e masepwehkada. Erein ahnsoukiste, e manokehla duwen Siohwa eh ketin sewesehda ih mwoweo. Paipel mahsanih me Elaisa men mehla. (1 Nan. 19:1-4) Ia wasa me e kak diar sawas oh eimah? E anahne sohpeiong Siohwa!​—1 Nan. 19:14-18.

16. Ia duwen atail kak uhdiahl Koht ni ahnsou me mie atail kahpwal kan?

¹⁶ Sohp medemedewehte eh pwunod ko kahrehda e sohte kilang eh irairo nin duwen me Siohwa ketin wia. (Sohp 42:3-6) Ekei pak, ele e  pil apwal ong kitail en uhdiahl Koht pwehki atail kahpwal kan. Dahme kak sewese kitail en kilang dahme Koht kin ketin wiahiong kitail? Kitail anahne doudouloale dahme Paipel mahsanih duwen atail kahpwal kan. Eri, met pahn kalaudehla atail ese me Siohwa uhdahn ketin mie oh kitail pil pahn kak nda: “Mahso I patohwan esehte dahme aramas teikan patohwanohng ie, a met I pein patohwan kilangkinkomwiher mesei kat.”

17, 18. (a) Ia duwen omw kak pohnese duwen sapwellimen Siohwa sawas nan omw mour? (b) Menlau koasoiahda dahme lelohng emen sister me kasalehda ia duwen Koht eh kin ketin sewese kitail rahnwet.

¹⁷ Ia duwen omw kak pohnese duwen sapwellimen Siohwa sawas nan omw mour? Kitail pahn koasoiapene karasaras limau. Keieu, ele ke pehm me Siohwa ketin sewese iuk en diar padahk mehlel. Keriau, ele ke taman omw kohla ni mihting ehu, rong padahk ehu oh nda, “Ihme I anahneo mwo!” Kesiluh, mwein ke kilang ia duwen Siohwa eh ketin sapengala ehu omw kapakap ko. Kapahieu, mwein ke men kalaudehla omw doadoahk ong Siohwa oh ke kilang ia duwen eh ketin sewese iuk kapwaiada omw mehn akadeio. Kelimau, mwein ke pwilikihdi omw doadoahk en mwohni pwehki e kin kangala omw ahnsou ong papah Siohwa oh kowe eri kilang me Koht ketin kapwaiada sapwellime inowo: “I sohte pahn keseiukala.” (Ipru 13:5) Ni atail kin ahneki nanpwungmwahu kehlail rehn Siohwa, kitail kak mwadang en pohnese duwen sapwellime sawas nan atail mour.

¹⁸ Sarah, emen sister sang Kenya, nda: “I kapakapki duwen emen nei tohnsukuhl me I pehm e sohte kin kalahnganki eh onop en Paipel. I peki rehn Siohwa ma I anahne kauhdi at onopo. Mwurinte ei nda ‘Amen,’ nei delepwohno pa rihng. Tohnsukuhl en Paipelo men idek ma e kak iang ie towehda mihting! I uhdahn pwuriamweikihla!” Ma kitail rapahki dahme Koht kin ketin wiewia ong kitail, kitail pahn kilang sapwellime sawas. Rhonna, emen sister me kin kousoan nan Eisia, nda me kitail anahne ahnsou en pohnese ia duwen Siohwa eh kin ketin sewese kitail nan atail mour. E pil nda: “Ahpw ni ahnsowo me ke wia met, e kin kaperen en diarada ia uwen eh kin ketin nsenohkin kitail!”

19. Dahme kitail pil anahne wia pwehn uhdiahl Koht?

¹⁹ Sises mahsanih me irail kan me “pahn udiahl Koht” anahne “nan kapehd mwakelekel.” (Mad. 5:8) Ia wehwehn met? Kitail anahne atail madamadau en kin mwakelekel oh uhdihsang wia dahme sapwung. (Wadek 2 Korint 4:2.) Nan iren onop wet, kitail sukuhlki me pwehn uhdiahl Koht, kitail anahne pousehlahte kakehlakahda atail nanpwungmwahu reh. Nan iren onop en mwuhr, kitail pahn koasoiapene ia duwen pwoson eh kak sewese kitail en pohnese ni sansal duwen sapwellimen Siohwa sawas nan atail mour.