Biblia nin

 Bautismoqa yaku ukhuman pʼultiykuy. Uj runa bautizakojtenqa, enteron cuerpon yaku ukhuman chinkaykunan tiyan. a Bibliaqa ashkha bautismosmanta parlan (Hechos 2:41). Chaykunamanta ujqa Jesús bautizakusqan kashan, pichus Jordán mayupi bautizakorqa (Mateo 3:13, 16). Chaymanta watasninman, Etiopía llajtamanta uj runa ñanpi ‘ashkha yakuta’ rikuspa bautizachikorqa (Hechos 8:36-40).

 Jesusqa yachacherqa, paypa discipulon kayta munajqa bautizakunan kasqanta (Mateo 28:19, 20). Apóstol Pedropis bautizakunapuni kasqanta nillarqataj (1 Pedro 3:21).

Kay yachaqanapi kaykunamanta yachakusun:

•  ¿Imawantaj bautismo ninakun?

•  ¿Biblia yachachinchu uña wawitasta bautizanata?

•  ¿Ima niyta munan Dios Tataj sutinpi, Wawanpa sutinpi, espíritu santoj sutinpiwan bautizakuy?

•  Bautizasqaña kaspa, ¿watejmanta bautizakuy juchachu?

•  Bibliaqa waj bautismosmanta parlallantaj

•  Bautismomanta pantasqa yuyaykuna

 ¿Imawantaj bautismo ninakun?

 Bautizakuspaqa tukuyman rikuchinchej juchasninchejmanta pesachikusqanchejta, Diosllapajñataj kausasqanchejta. Chayrayku bautizakusqanchejmantapacha Diostawan Jesustawan tukuy imapi kasukunchej. Wiñay kausayta japʼiyta munajkunaqa, ñaupajta bautizakunankupuni tiyan.

 Uj runa bautizakunanpajqa ñaupa kausayninta saqepun. Imatapis yakuman chinkaykuchiytaj chayta sutʼita rikuchin. Chayrayku Bibliapeqa bautismota pʼampaywan kikinchakun (Romanos 6:4; Colosenses 2:12). Bautizakuspaqa ñaupa kausayninchejpaj wañunchej. Imaraykuchus manaña ñaupajta jinachu kausanchej. Yakumanta llojsimuspatajrí, mosoj runa jina Diosllapajña kausayta qallarinchej.

 ¿Biblia yachachinchu uña wawitasta bautizanata?

 Mana. Bibliapeqa ni maypi ninchu uña wawitasta bautizana kasqanta. b Astawanpis nin, bautizakojkunaqa yuyayniyoj kananku kasqanta. Imaraykuchus Diospa Palabranpi qallariy yachachiykunata entiendenanku tiyan, chayman jinataj kausananku tiyan. Chantapis juchasninkumanta arrepientekunanku tiyan, uj mañakuypitaj Diosman kausayninkuta qopunanku tiyan (Hechos 2:38, 41; 8:12). Chaytataj ni uña wawitaspis, nitaj wawaspis ruwayta atinkuchu.

¿Ima niyta munan Dios Tataj sutinpi, Wawanpa sutinpi, espíritu santoj sutinpiwan bautizakuy?

  Jesusqa yachachisqasninman nerqa: “Runasta discipulosniyman tukuchimuychej. Paykunata bautizamuychej Tata Diospa sutinpi, Wawanpa sutinpi, espíritu santoj sutinpiwan. Paykunaman kasukuyta yachachimuychej imastachus noqa kamacherqaykichej chay tukuy imasta”, nispa (Mateo 28:19, 20). Dios Tataj sutinpi, Wawanpa sutinpi, espíritu santoj sutinpiwan bautizakojqa, entienden Jehová c Tukuy Atiyniyoj Dios kasqanta, Jesustaj Wawan kasqanta. Chantapis yachan espíritu santoqa Diospa atiynin kasqanta. Apóstol Pedroqa nacekusqanmantapacha suchituta sanoyachinanpaj nerqa: “Nazareno Jesucristoj sutinpi puririy”, nispa (Hechos 3:6). ¿Imaraykutaj Pedro “Jesucristoj sutinpi” nerqa? Imaraykuchus Jesusta Señorninta jina qhawaj, paypa atiyninwantaj suchituta sanoyachinanta nisharqa.

•   ‘Tataqa’ Jehová Dios. Pay ruwawarqanchej, kausayta qowarqanchej, Tukuy Atiyniyojtaj. Chayrayku ni pipis Jehovamanta nisqaqa aswan atiyniyoj kanchu (Génesis 17:1; Apocalipsis 4:11).

•   ‘Wawaqa’ Señorninchej Jesucristo. Paytaj kausayninta noqanchejrayku qorqa (Romanos 6:23). Salvakunapajqa entiendena, creenataj tiyan, Diosqa Jesusta kachamusqanta runasta juchamanta librananpaj (Juan 14:6; 20:31; Hechos 4:8-12).

•   ‘Espíritu santoqa’ Diospa atiynin chayri kallpan. d Diosqa espíritu santonnejta tukuy imata ruwarqa. Chaywan tukuyman kausayta qorqa. Chantapis espíritu santonejllatataj profetasninwan, waj runaswanpis parlarqa. Chay atiyllawantaj kamachisninta yanaparqa munayninta ruwanankupaj (Génesis 1:2; Job 33:4; Romanos 15:18, 19). Diosqa espíritu santonllawantaj runasta yuyaycharqa Bibliata qhelqanankupaj (2 Pedro 1:21).

Bautizasqaña kaspa, ¿watejmanta bautizakuy juchachu?

  Mana. Ashkha runasqa religionmanta cambianku. Sichus uj runa uj iglesiapi bautizakunña chay, ¿waj iglesiapi watejmanta bautizakunan juchachu? Wakenqa “arí, jucha” ninku. Chayta ninku, Efesios 4:5 versiculota pantasqata entiendesqankurayku. Chay versiculopi nin: “Uj Señorlla tiyan, uj creeylla, uj bautismollataj”, nispa. Jinapis kay versiculoqa mana nishanchu watejmanta bautizakuy jucha kasqanta. ¿Imaraykutaj chayta ninchej?

 Imamantachus Efesios 4:5 parlashasqanta entiendena. Apóstol Pabloqa Efesios 4 capitulopi cristianos ujchasqas kanankumanta parlasharqa. Pay nerqa, cheqa cristianos chaypaj kikin creeyniyoj kananku kasqanta (Efesios 4:1-3, 16). Cristianos ujchasqa kanankupajqa, kikin Señorta qhatinanku tiyan, nisunman Jesucristota. Chantapis kikin creeyniyoj kananku tiyan, nisunman Bibliaj yachachiykunasninta kikinta entiendenanku tiyan. Mana chayllachu, tukuy cristianos bautizakunankupaj imatachus Biblia kamachisqanta juntʼananku tiyan.

 Uj kutipi, apóstol Pabloqa bautizasqaña kaj runasta watejmanta bautizakunankuta nerqa. ¿Imarayku? Imaraykuchus chay runasqa. Diospa Palabranta mana allinta entiendespalla bautizakusqanku (Hechos 19:1-5).

 ¿Imayna bautismotataj Dios allinpaj qhawan? Uj runaj bautizakusqanta Dios allinpaj qhawananpajqa, chay runaqa Bibliaj nisqanta sutʼita entiendenan tiyan (1 Timoteo 2:3, 4). Sichus uj runa Bibliaj yachachiykunasninta mana allinta entiendespalla bautizakun chayqa, chay bautizakusqanqa mana Diospaj valenchu (Juan 4:23, 24). Ichapis chay runaqa sonqomantapacha Diosta yupaychayta munaspa bautizakorqa. Jinapis “Diosta mana allinta rejsispalla” bautizakorqa (Romanos 10:2). Imaraykuchus mana Bibliamanta cheqa kajta yachakorqachu, nitaj chayman jinachu kausakorqa. Bautizakusqan valenanpajqa, chay imastaraj ruwanan tiyan. Chantapis kausayninta Diosman jaywapunan tiyan, watejmantataj bautizakunan tiyan. Chayta ruwaspaqa mana juchachakunchu. Astawanpis Diosqa ajina bautismota allinpaj qhawan.

Bibliaqa waj bautismosmanta parlallantaj

  Jesuspa discipulosnenqa runasta yakuman pʼultiykuspa bautizarqanku. Jinapis Bibliaqa waj jina bautismosmanta parlallantaj. Wakinkunamanta parlarina:

 Juan Bautistaj bautizasqan. e Uj judío chayri judioman tukoj runasqa, Juan Bautistawan bautizachikoj kanku. Chaytataj ruwaj kanku, Moisespa Leyninta mana kasuspa juchallisqankumanta pesachikusqankuta rikuchinankupaj. Chay Leytaqa Dios israelitasman Moisesnejta qorqa. Juanpa bautizasqanqa, runasta yanaparqa Nazaretmanta Jesusta Mesiasta jina qhawanankupaj (Lucas 1:13-17; 3:2, 3; Hechos 19:4).

 Jesuspa bautizakusqan. Jesusqa Juan Bautistawan bautizachikorqa. Chay bautismotaj mana waj bautismoswan kikinchu karqa. Jesusqa mana pantaj runachu karqa, nitaj ima juchatapis ruwarqachu (1 Pedro 2:21, 22). Chayrayku Jesusqa mana juchanmanta arrepientekusqanraykuchu bautizakorqa, nitaj ‘Diosmanta llimphu sonqoyoj kayta mañakunanpajchu’ (1 Pedro 3:21). Astawanpis payqa, Mesías jina chayri Cristo jina Diospa munayninta ruwananpaj bautizakorqa. Chay ruwanasninmanta ujtaj, runasrayku kausayninta qosqan karqa (Hebreos 10:7-10).

 Espíritu santowan bautizakuy. Juan Bautistapis Jesucristopis espíritu santowan bautizakuymanta parlarqanku (Mateo 3:11; Lucas 3:16; Hechos 1:1-5). Kay bautismoqa, espíritu santoj sutinpi bautizakuywan mana kikinchu (Mateo 28:19). ¿Imarayku?

 Imaraykuchus Jesusta qhatejkunamanta pisi runaslla espíritu santowan bautizakunku. Paykunaqa cieloman rinankupaj f espíritu santowan ajllasqa kanku. Ajinamanta cielomantapacha Cristowan khuska reyes jina, sacerdotes jinataj kay jallpʼata kamachimonqanku (1 Pedro 1:3, 4; Apocalipsis 5:9, 10). ¿Pikunatataj kamachenqanku? Jesusta qhatejkuna millones runasta. Paykunaqa kay jallpʼa uj paraisoman tukojtin, chaypi wiñaypaj kausakuyta suyakushanku (Mateo 5:5; Lucas 23:43).

 Jesucristopi bautizakuy, wañuyninpi bautizakuy ima. Espíritu santowan bautizasqa kajkunaqa, ‘Cristo Jesuspi bautizasqallataj’ kanku (Romanos 6:3). Chayrayku Jesusta qhatejkunamanta ajllasqa kajkunalla chay jina bautismowan bautizakunku, nisunman pikunachus paywan khuska cielomantapacha kamachimonqanku, chaykunalla. Jesuspi bautizakusqankurayku, paypa congregacionninmanta kanku. Chay congregacionpa umanqa Jesús, ajllasqa cristianostaj paypa cuerpon kanku (1 Corintios 12:12, 13, 27; Colosenses 1:18).

 Ajllasqa cristianosqa, ‘Jesuspa wañuyninpi bautizasqallatajʼ kanku (Romanos 6:3, 4). Paykunaqa Diosta kasukunankurayku Jesús jinallataj nakʼarinku, kay jallpʼapi wiñaypaj kausakuytapis qhesachanku. Kay bautismoqa paykuna wañupojtinku juntʼakun. Imaraykuchus chaypacha mana rikukoj cuerpoyoj cieloman ripunankupaj kausarichisqa kanku (Romanos 6:5; 1 Corintios 15:42-44).

 Ninawan bautizakuy. Juan Bautista nerqa: Jesusqa “espíritu santowan, ninawantaj bautizasonqachej. Jurkanqa makinpiña kashan trigota wayrachinanpaj. Eranta allinta llimphuchaytawan trigota pirwanman jallchʼanqa, pajatataj mana wañoj ninawan kanaykonqa” (Mateo 3:11, 12). ¿Imatataj Juan Bautista chaywan niyta munasharqa? Chantá espíritu santowan bautizakuy, ninawan bautizakuywan, ¿kikinchu kanku? Chayta entiendenapaj, imawanchus trigowan pajawan ninakusqankuta qhawarina.

 Trigoqa Jesusta uyarispa kasukojkunawan ninakun. Paykunataj espíritu santowan bautizasqa kanku. Pajatajrí Jesusta mana uyarejkunawan ninakun. Paykunaqa ninawan bautizasqa kanku. Chaytaj wiñaypaj chinkachisqa kanankuwan ninakun. Chayrayku espíritu santowan bautizakuywan, ninawan bautizakuywanqa mana kikinchu kanku (Mateo 3:7-12; Lucas 3:16, 17).