Manchay ñakʼariy tiempoqa tukuy runaspaj ni jaykʼaj jina manchay llakiypuni kanqa. Bibliaj profeciasnin nisqanman jinataj, chayqa ‘qhepa pʼunchaykunapi’ chayri ‘tukukuy tiempopi kanqa’ (2 Timoteo 3:1; Daniel 12:4). Marcos 13:19 nin: “Chay pʼunchaykunapeqa manchay ñakʼariy kanqa, mayqenchus manaraj karqachu Dios kay jallpʼata ruwayta qallarisqanmantapacha kunankama, nitaj ujtawanpis kanqañachu”, nispa (Daniel 12:1; Mateo 24:21, 22).

¿Imastaj pasanqa manchay ñakʼariy tiempopi?

•   Llulla religiones chinkachisqa kanqanku. Llulla religionesqa tʼukunapaj jina uj ratopi chinkachisqa kanqanku (Apocalipsis 17:1, 5; 18:9, 10, 21). Naciones Unidas nisqa organizacionmanta gobiernos llulla religionesta chinkachishajtinku, Diospa munayninta ruwashanqanku (Apocalipsis 17:3, 15-18). a

•   Cheqa religionta chinkachiyta munanqanku. Uj qotu ujchasqa naciones cheqa religionpi kajkunata chinkachiyta munanqanku. Chay qotu nacionestaqa, Ezequiel mosqoypi jina rikusqanpi sutichakun ‘Magog jallpʼamanta Gog’ nispa. Jinapis Diosqa mana saqenqachu llajtanta chinkachinankuta (Ezequiel 38:1, 2, 9-12, 18-23).

•   Jallpʼapi tiyakojkuna juzgasqa kanqanku. Jesusqa jallpʼantinmanta runasta juzganqa, iskaymantaj tʼaqanqa “imaynatachus michejpis ovejasta cabrasmanta tʼaqan ajinata” (Mateo 25:31-33). Juzgananpajtaj qhawaykurenqa sapa uj runa paypa ‘hermanosninta’, nisunman cielomantapacha paywan kamachimonqanku chaykunata yanapasqantachus manachus (Mateo 25:34-46).

•   Diospa Gobiernonpi Jesuswan khuska kamachimonqanku chaykunata tantakonqa. Jehovaj kamachisninmanta Jesuswan khuska kamachimunankupaj ajllasqa karqanku chaykunaqa, kay jallpʼapi wañuponqanku, cielopi kausanankupajtaj kausarichisqa kanqanku (Mateo 24:31; 1 Corintios 15:50-53; 1 Tesalonicenses 4:15-17).

•   Armagedón chayamonqa. Bibliapeqa Armagedonta kay sutiwan rejsikullantaj: ‘Tukuy Atiyniyoj Diospa jatun pʼunchayninpi guerra’, chantá ‘Jehová Diospa pʼunchaynin’ nispa (Apocalipsis 16:14, 16; Isaías 13:9; 2 Pedro 3:12). Pikunatachus Jesús juchacharqa chaykunaqa, chay guerrapi chinkachisqa kanqanku (Sofonías 1:18; 2 Tesalonicenses 1:6-10). Chantapis jallpʼantinmanta Gobiernos chinkachisqa kanqanku. Bibliaqa paykunata sutichan qanchis umasniyoj millay phiña animal nispa (Apocalipsis 19:19-21).

Manchay ñakʼariy tiempo pasayta, ¿imataj kanqa?

•   Satanaswan supaykunasninwan wisqʼasqa kanqanku. Uj atiyniyoj ángel Satanasta, supaykunasnintawan “chinkay ukhuman” wijchʼuykonqa (Apocalipsis 20:1-3). Paykunaqa chaypi wañusqas jina kaspa ni imata ruwayta atenqankuchu. Chay chinkay ukhupi kayqa carcelpi presochasqa kaywan ninakunman. Chayrayku Satanasqa manaña chaymanta llojsimuyta atenqachu wajkunata pantachinanpaj (Apocalipsis 20:7).

•   Waranqa watas qallarenqa. Chaypi Diospa Gobiernon waranqa watasta kamachiyta qallarenqa. Chay Gobiernoqa tukuy runaspaj ashkha bendicionesta apamonqa (Apocalipsis 5:9, 10; 20:4, 6). Jallpʼapeqa mana yupay atina “may chhika” runas manchay ñakʼariy tiempota kausashaj pasanqanku, rikonqankutaj imaynatachus Diospa Gobiernon waranqa watasta kamachiyta qallarisqanta (Apocalipsis 7:9, 14; Salmo 37:9-11).