24 de octubre de 2021 watapi Mosoj Jallpʼapi Kausajkunapaj Diospa Palabran Biblia quechua parlaypi orqhokun. Chaytaj Jehovaj llajtanpaj uj sumaj bendición.

Diospa Palabran Bibliaqa maychus kaj, cheqantataj traducin Diospa yuyaychasqan palabrata (2 Timoteo 3:16). Kay tiempopi parlasqanchejman jina kay Biblia ruwakunanpaj, ¿imastataj qhawarikorqa? ¿Pikunataj kay Bibliata traducinku? ¿Imaynapí yachasunman Diospa Palabran Biblia atienekunapaj jina kasqanta?

Negociosmanta profesor Declan Hayes kay jinata qhelqarqa: “Sapa wata tukuy librosmanta Bibliapuni astawan vendekun”, nispa. Jinapis runasqa may chhika Bibliasta vendeyllata munanku, manataj llakikunkuchu maychus kaj traducisqa kananmanta. Uj Bibliata orqhojkunaqa chay Bibliamanta wakin partesta oqhorpasqanku leejkunata saykʼuchinanta yuyasqankurayku. Waj Bibliapitaj wakin palabrasta cambiarpasqanku, kay tiempomanta wakin runasta phiñachinanta yuyasqankurayku. Chay Bibliapeqa Diosmanta parlanapaj churasqanku “Tatamama” waj jina yuyayniyoj runaspa sonqonkuman chayanapaj.

Bibliasta traducisqankupi aswan jatun pantaytaj, Tatanchej Diospa sutin Jehovata orqhorpasqanku (wakin yachayniyoj runasqa Diosninchejpa sutinta “Yahvé” nispa traducinku). Ñaupa Bibliaspi Diospa sutenqa hebreo parlaypi tawa letraswan qhelqasqa rikhurin, quechuamantataj kay letras kanman: YHWH chayri JHVH. Chay sutitaj casi 7.000 kutistapuni rikhurin Hebreo Qhelqasqasllapi * (Éxodo 3:15; Salmo 83:18). Chayllapiraj sutʼita reparasunman Ruwawajninchej Diosqa munan payta yupaychajkunaqa sutinta rejsinankuta, oqharinankutapis.

Jinapis judiosqa unay watasmantaña wakin imasta manchachikusqankurayku manaña Diospa sutinta oqharerqankuchu. Aswan qhepaman cristianospis kikinta manchachikusqankurayku, manaña Diospa sutinta oqharerqankuchu (Hechos 20:29, 30; 1 Timoteo 4:1). Kay tiempopi Bibliasta traducejkunaqa, Diospa sutinpa cuentanmanta Señor chayri Tata Dios palabrasllataña churanku. Wakin mosoj Bibliaspeqa Juan 17:6 versiculomantapis suti palabrata orqhorpanku. Chaypi Jesús nerqa: “Sutiykita rejsicherqani kay mundomanta qowasqayki runasman”, nispa. Jinapis Mosoj Testamento, 1985 Bibliapeqa kay jinallataña nin: “Konawayquipaj ajllaskayquicunaman yachachiniña pi caskayquita”.

Wakin yachayniyoj runasqa ninku Diospa sutinpa cuentanmanta Señorta chayri Tata Diosta churaspaqa waj traductorespa costumbrenkuman jinalla ruwashasqankuta. Wakintaj ninku astawan ashkha Bibliasta vendenankupaj Diospa sutinta cambiasqankuta. * Jesustajrí sutʼita yachacherqa Diosta pisipaj qhawachej costumbresta qhateyqa jucha kasqanta (Mateo 15:6). Chantapis Diospa sutinpa cuentanmanta waj palabrata churayqa mana Bibliaj yachachisqanman jinachu kashan. Jesucristotaqa Bibliapi sutichakullantaj “Diospa Palabran”, “reyespa Reynin”, nispa (Apocalipsis 19:11-16). Jinapis mana chaykunata waj versiculosman churakullanmanchu Jesuspa sutinpa cuentanmanta, ¿icharí?

Jinapis Diospa sutintaqa mana orqhorpanallachu. India suyumanta Bibliata traducinamanta yachaj runaqa Diospa sutinta Bibliamanta orqhorpasqankumanta kay jinata nerqa: “Indiamanta runaspajqa Bibliapi Dioslla nejtenqa, mana imapischu. Paykunaqa sutintapuni yachayta munanku, mana sutinta yachaspaqa mana payman qayllaykuyta atinkumanchu”. Ajinallataj pasan Diosta maskʼaj pi runawanpis. Diosta rejsinapaj, pay kasqantapuni yachanapajpis sutinta yachanapuni tiyan (Éxodo 34:6, 7). Bibliaqa nin “Jehová Diospa sutinta tukuy oqharejkunaqa salvasqa” kanankuta (Romanos 10:13). Chayrayku Diosta yupaychajkunaqa sutinta oqharinankupuni tiyan.

1950 watapi Mosoj Jallpʼapi Kausajkunapaj Diospa Palabran Mateo-Apocalipsis inglés parlaypi orqhokorqa. Qhepan chunka wataspitaj Hebreo Qhelqasqasñataj inglespi pisimanta pisi orqhokorqa. 1961 watapitaj inglés parlaypi tukuynin Biblia uj librollapi orqhokorqa. Diospa Palabran Bibliaj Ñaupa Testamentonpeqa Diospa sutin Jehovata casi 7.000 kutista churakun, maypichá rikhurerqa chay lugarespi. Kay Bibliaqa sumajllataj Diospa sutin Jehovata 237 kutista Griego Qhelqasqasman * churaykapusqanrayku.

Diospa sutin Jehovata maychus kananman churaykapusqankoqa Diosta jatunchan, payta rejsinanchejpajtaj yanapawanchej. Ashkha Bibliasqa Mateo 22:44 versiculota kay jinata traducinku: “Señorqa Señorniyman nerqa”, nispa. Jinapis mana sutʼichu pichus parlashasqanta, pimanchus parlashasqantapis. Diospa Palabran Bibliatajrí Mateo 22:44 versiculota, Salmo 110:1 versiculoman jina kay jinata traducin: “Jehová Diosqa Señorniyta nerqa”. Ajinamanta leejkunaqa sut’ita reparayta atinku Jehová Dioswan Wawanwan mana kikinchu kasqankuta.

Diospa Palabran Bibliataqa Watch Tower Bible and Tract Society orqhon. Chayqa Jehovaj testigosninpa corporacionninku. Jehovaj testigosnenqa 100 watas kurajtaña Bibliasta imprimispa mundontinmanta tukuy laya runasman chayachinku. Kay Bibliataqa Diospa Palabran Bibliata ruwaj comisión wakicherqa. Paykunataj Jehovaj testigosninmanta uj qotu hermanos kanku. Chay comisionpi kaj hermanosqa mana munarqankuchu jatunchachikuyta. Chayrayku mana munarqankuchu yachakunanta pichus kasqankuta, ni sutisninkutapis ni kausashajtinku ni wañusqankumanta qhepamanpis (1 Corintios 10:31).

¿Imajtintaj kay Biblia sutikun Mosoj Jallpʼapi Kausajkunapaj Diospa Palabran? 1950 watamanta inglés parlaypi kay Bibliaj qallariyninpi ajinata sutʼinchan: Runasqa mosoj jallpʼaman yaykunankupajña kashanku 2 Pedro 3:13 versiculopi nisqanman jina. Kay Bibliaj sutintaj chayta creesqanchejtapuni rikuchin. Diospa Palabran Bibliata ruwaj comisión qhelqasqanman jina “kay sajra mundomanta mosoj jallpʼaman yaykunapajña kashanchej”, chayrayku kay tiempopi traducikoj Bibliasqa “Diospa Palabranpa cheqa yachachiyninta” kʼancharichinanku tiyan.

Kay Bibliaqa maychus kajtapuni traducikunan karqa. ¿Imajtin? Diosqa Bibliata qhelqacherqa hebreo parlaypi, arameo parlaypi, griego parlaypiwan. Inglés parlayman kay Bibliata traducejkunataj chay parlaykunamanta traducerqanku, Bibliamanta aswan sumaj ñaupa qhelqasqasmanta traducerqanku. Imatachus chay ñaupa qhelqasqaspi nisqanta maychus kajsituta traducinankupaj kallpakorqanku, kay tiempomanta runas leespa entiendenankupaj jinalla.

Diospa Palabran Biblia inglés parlaypi maychus kaj traducisqa kasqanrayku, wakin yachayniyoj runasqa may allinpaj qhawanku. Hebreo parlaymanta sumajta yachaj Israel nacionmanta profesor Benjamin Kedar-Kopfstein 1989 watapi kay jinata nerqa: “Hebreo parlaypi qhelqasqa Bibliata, traducisqa Bibliastawan allinta ukhunchashaspaqa inglés parlaypi Diospa Palabran sutiyoj Bibliataqa qhawaykunipuni, reparanitaj chay Bibliata traducinankupajqa Diospa qhelqasqasninta sumajta entiendenankupaj mayta kallpakusqankuta”.

Jehovaj testigosnenqa inglesta mana parlajkunapaj Diospa Palabran Bibliata orqhollankutaj. Kunanqa tukuynin Biblia chayri wakin librosnin 210 parlaykunapiña tiyan. Aswan facilta traducinapajqa Bibliaj palabrasninmanta imaschus yachakusqanta computadorapaj programasman churakun. Traductoresta yanapanapajqa Jehovaj testigosninpa centralninkupi uj departamentota kichakorqa Traductoresta Yanapajkuna nisqa sutiyoj. Jehovaj testigosninmanta Diospa Llajtanta Kamachejkunaqa Qhelqajkunapaj comisionta churan, Bibliasta traducichinanpaj. ¿Imaynatá traducikun?

Ñaupajtaqa uj mashkha testigosta ajllakun Bibliata traducispa yanapakunankupaj. Ashkha ukhumanta traducejtinkoqa aswan sumajta traducinku, manataj ajinachu ujlla traducejtenqa (Proverbios 11:14). Chay tukuynin traductoresqa Jehovaj testigosninpa publicacionesninkuta sumajtaña traduciyta yachanku. Chay ajllasqa traductorestaqa sumajta yachachinku imaynatachus Bibliata traducinanku kasqanta. Bibliata traducinapaj computadorapi programastapis sumajta apaykachayta yachachillankutaj.

Traductoresta wakichikun Bibliata maychus kajta, tukuy runas entiendenankupaj jinataj traducinankupaj. Traductoresqa inglesman jina kikisitunta traducinanku tiyan, manataj waj yuyayman cambianankuchu tiyan. ¿Imataj paykunata yanapan allinta traducinankupaj? Qhawarina imaynatachus Bibliata quechuaman traducikusqanta. Ñaupajta traductoresqa inglespi Diospa Palabran Bibliamanta aswan importante palabrasta quechuaman traducerqanku. Watchtower Translation System programaqa traductoresman rikuchej Bibliamanta ima palabraschus rijchʼakusqankuta. Chantapis rikuchillajtaj inglespi palabras griegomanta, hebreomantawan ima palabrasmantachus traducikusqanta, chaywan tantearinankupaj imaynatachus waj versiculospi chay griego palabras, chay hebreo palabras traducikusqanta. Chay palabrasta traduciytawantaj Bibliata traduciyta qallarerqanku. Sapa versiculota traducinankupajqa chay programa churamoj ima palabrastachus quechuapaj ñaupajtaña traducisqankuta.

Allinta traducinapajqa mana sapa inglés palabrapaj quechuapi uj palabrata churaykuyllachu. Traductoresqa quechuapi ima palabrastachus churanankuta allinta tantearerqanku sapa versículo maychus kajta entiendekunanpaj. Imaynatachus palabrasta sukʼaykunankutapis allinta tantearerqanku chʼuwita kananpaj, leeyta atinapaj jinalla kananpaj. Traducinankupaj mayta kallpachakusqankoqa kay Bibliapi sutʼita rikukun. Quechua parlaypi Diospa Palabran Bibliapeqa Diospa nisqasnin chʼuwita kashan leeyta atinapaj jinallata, entiendeyta atinapaj jinalla, hebreopi, arameopi, griegopipis Dios qhelqachisqanman jinalla. *

Munayku qanpuni Diospa Palabran Bibliata qhawaykurinaykita. Leeriwaj Internetpi chayri aplicación JW Library nisqapi, munaspataj Jehovaj testigosninpa ujnin congregacionninman rispa uj Bibliata qochikuwaj. Kay Bibliaqa maychus kaj traducisqa kashan, chayrayku quechuamanta kay Bibliata leespaqa Diospa nisqasninta maychus kajta yachakunki. Niraj imapi reparanki kay Bibliaqa Diospa bendicionninpuni kasqanta.