2023 watapi 31 de mayomanta 11 de juniokama, Bolivia, Santa Cruz llajtapi librosmanta uj feria apakuspa karqa. Chaymantaj 120 mil runasmanta astawan rerqanku. Jehovaj testigosnenqa chay feriapi uj puestoyoj karqanku, chaypitaj “¿Munawajchu kusisqa kayta? Biblia yanapasunkiman” nisqa revistata rikucherqanku. Chay revistaqa 2023 watamanta 1 kaj Torremanta Qhawaj revista.

Chay puestota atiendenankupaj 200 hermanos jina yanapakorqanku, 20 mil runasmanta astawantaj chayman jamorqanku. Paykunamanta ashkhas Internetpi paginanchejmanta videosta qhawarqanku. Chantapis jw.org paginanchejpi imaymana yachaqanasta maskʼayta yachakorqanku. Hermanosqa casi 5 mil quinientos publicacionesta runasman jaywarqanku, 600 videosta jinataj rikucherqanku. Chantapis 45 runas, Bibliamanta yachakunankupaj Internetpi formularionchejta juntʼacherqanku.

Uj warmeqa feriapi puestonchejpa temanta rikuspa, uj hermanaman qayllaykusqa. Paymantaj willarisqa, maman tukuy tiempo phutisqalla kasqanta, anchata llakikusqanraykutaj onqoykusqanta. Chantá nillasqataj paypis kikillantaj kashasqanta. Hermanataj chay warmita yanapasqa llakiykunamanta parlaj revistata celularninpi uraqachinanpaj, jinallataj Wiñaypaj kusisqa kausakuy folletotapis. Chantá señoraqa Bibliamanta yachakunanpaj, chay ratopacha Internetpi formularionchejta juntʼachisqa.

Uj doctorpis feriapi puestonchejman chimpaykullasqataj. Payqa umitankumanta mana allinchu kajkunata jampin. Chay doctorqa llakiykunata atipanamanta parlaj revistata japʼikuspa nisqa: “Kay revistaqa may sumajpuni, Bibliamanta ajllakusqan versiculospis. Pacientesniyman rikuchisaj, paykunata mayta yanapanqa”, nispa. Waj señorataj maman manaraj unaychu wañupusqanmanta llakisqa kasharqa. Hermanostaj jw.org paginanchejpi “Cuando muere uno de los padres” nisqa yachaqanata rikuchisqanku, mayqenchus “Felicidad y paz interior” nisqa seccionpi kashan chayta. Señoraqa chayta rikuspa sonqochakorqa.

Kay tiempopeqa ashkha runas phutisqalla kanku, anchata llakikusqankuraykutaj onqoykunku. Boliviamanta hermanosninchejqa, ashkha runasta Bibliawan sonqocharqanku. Chantapis Jehovaj yuyaychayninta Palabranpi tarinankupaj yanaparqanku. Chayta ruwasqankumanta may kusisqas kashanku (Salmo 34:18).