Números 20:1-29
20 Wata qallarikuy killapi tukuynin israelitasqa, Zin nisqa chʼin jallpʼaman chayarqanku, Cadespitaj qhepakorqanku.+ Miriamqa chaypi wañuporqa,+ chayllapitaj pʼamparqankupis.
2 Chaypi israelitaspaj mana yaku kasqanrayku,+ paykunaqa Moisespa contranpi, Aaronpa contranpiwan tantaykukorqanku.
3 Paykunaqa Moiseswan siminakuspa+ nerqanku: “Allin kanman karqa hermanosniyku israelitaswan khuska wañunayku, paykuna Jehová Diospa ñaupaqenpi wañushajtinku.
4 ¿Imapajtaj Jehová Diospa israelita wawasninta kay chʼin jallpʼaman pusamunkichejri? ¿Animalesniykuwan khuska wañunaykupajchu pusamuwayku?+
5 ¿Imapajtaj Egiptomanta orqhomuwayku kay jina millay lugarmanri?+ Kaypeqa mana imatapis tarpunapaj jinachu, mana kanchu higos, ni uva sachʼaspis, nitaj granadaspis. Kaypeqa ni yakullapis kanchu tomanaykupaj”,+ nispa.
6 Chantá Moiseswan Aaronwanqa israelitaspa ñaupaqenkumanta jatarispa, Dioswan tinkukuna toldo punkuman rerqanku. Chaypitaj qonqoriykukuspa pampakama kʼumuykukorqanku. Jinallapi Jehovaj jatun kayninpa kʼanchaynin paykunaman rikhurimorqa.+
7 Chaypi Jehová Diosqa Moisesman nerqa:
8 “Kunanqa tojnuykita oqharispa, qanwan hermanoyki Aaronwan tukuy israelitasta tantachimuychej. Paykuna rikushajtinkutaj chhankata parlapayaychej, chaymanta yaku phullchimunanpaj. Chay chhankamanta yakuta orqhonki paykunaman tomachinaykipaj, jinallataj animalesninkumanpis”,+ nispa.
9 Moisesqa Jehová Diospa ñaupaqenmanta tojnunta oqharerqa+ Dios kamachisqanman jina.
10 Chantá Moiseswan Aaronwanqa israelitasta tantachimorqanku chhankaj ñaupaqenman. Chaypitaj Moisesqa paykunata nerqa: “Uyariwaychej kunanqa, mana kasukoj runas. ¿Kay chhankamantachu tomanaykichejpaj yakuta orqhonaykuta munashankichej?”,+ nispa.
11 Chayta niytawan Moisesqa makinta oqharispa iskay kutita chhankata tojnunwan wajtarqa, ashkha yakutaj phullchimorqa. Israelitastaj chay yakuta tomarqanku, jinallataj animalesninkupis.+
12 Jehová Diostaj Moisestawan Aarontawan nerqa: “Mana noqapi creesqaykichejrayku, nitaj israelitaspa ñaupaqenkupi jatunchawasqaykichejrayku, mana qankunachu israelitastaqa pusaykunkichej ima jallpʼatachus paykunaman qosaj chayman”,+ nispa.
13 Chaymin kashan Meribá* yakus,+ maypichus israelitas Jehová Dioswan siminakorqanku chay. Chaypi Diosqa sutinta jatuncharqa paykuna ukhupi.
14 Chantá Moisesqa Cadesmantapacha willajkunata kacharqa, Edommanta reyman+ nimunankupaj: “Hermanosniyki israelitasqa+ kayta nichimusunku: ‘Qan allinta yachanki ima llakiykunapichus rikukusqaykuta.
15 Ñaupa tatasniykoqa Egiptoman riporqanku.+ Chaypi noqaykoqa may chhika watasta* tiyakorqayku.+ Egipciosqa mayta sufrichiwarqayku, jinallataj ñaupa tatasniykutapis.+
16 Ajinapi Jehová Diosmanta yanapata mañakorqayku,+ paytaj mañakusqaykuta uyariwarqayku. Chantá angelninta kachamuspa+ Egiptomanta orqhomuwarqayku. Kunantaj Cadés llajtapi kashayku, jallpʼaykiwan tinkuypi.
17 Ama jina kaspa, jallpʼaykita pasarichiwayku ari. Mana chajrasniyki chaupitachu, nitaj uva huertasniyki chaupitachu pasasqayku, nillataj pozosniykimantapis yakuta tomasqaykuchu. Reypa Ñanninta cheqanta pasasqayku, ni pañaman ni lloqʼeman wistʼuykuspa, jallpʼasniykita pasanaykukama’,+ nispa”.
18 Edommanta reytajrí nerqa: “Mana jallpʼasniykuta pasankichejchu. Jamunkichejchus chayqa, espadawan llojsimusaj qankunawan tinkoj”, nispa.
19 Israelitastaj kuticherqanku: “Jatun ñanninta cheqanta pasapusqayku. Sichus noqaykupis animalesniykupis yakusniykita tomasqayku chayqa, pagapusqayku.+ Jallpʼaykita pasarillayta munayku”,+ nispa.
20 Edommanta reytajrí nerqa: “Mana pasankichejchu”,+ nispa. Chaymantataj Edommanta reyqa paykunawan tinkoj llojsimorqa, may ashkha runaswan, sumaj atiyniyoj ejercitowan ima.
21 Ajinata Edommanta reyqa mana saqerqachu israelitas jallpʼanta pasanankuta. Chayrayku israelitasqa waj ñanta riporqanku.+
22 Tukuy israelitasqa Cadesmanta puririspa, Hor orqoman chayarqanku.+
23 Jehová Diostaj chay orqopi, Edom jallpʼa kantupi Moisesman, Aaronmanwan nerqa:
24 “Aaronqa wañuponqa,+ ñaupa tatasnin jinataj pʼampasqa kanqa. Payqa mana yaykonqachu israelitasman qosaj chay jallpʼaman, imaraykuchus iskayniykichej mana kasuwarqankichejchu Meribá yakusmanta kamacherqaykichej chayta.+
25 Qanqa Moisés, pusay Aaronta wawan Eleazartawan Hor orqoman.
26 Aaronmanta sacerdote ropasninta lluchʼuspa,+ wawan Eleazarman+ churaykuy. Aarontaj chaypi wañuponqa”, nispa.
27 Moisesqa Jehová Dios kamachisqanman jina ruwarqa. Paykunaqa Hor orqoman wicharerqanku tukuy israelitas qhawashajtinku.
28 Chaypitaj Moisesqa Aaronmanta sacerdote ropasninta lluchʼuspa, wawan Eleazarman churaykorqa. Chantá Aaronqa chay orqo patapi wañuporqa.+ Moiseswan Eleazarwantaj chay orqomanta uraykanporqanku.
29 Israelitasqa Aarón wañupusqanta yachaspa, tukuyninku mayta Aaronmanta waqarqanku 30 diastapuni.+
