Jobqa Jehová Diosta yupaychaj, Uz jallpʼapitaj tiyakoj. Payqa qhapaj, jatun familiayojtaj karqa. Jobqa kʼacha runa karqa, wajchasta, viudasta, wajcha wawasta ima yanapaj. Jobqa allin imastapuni ruwarqa. Jinapis problemaspi rikukorqa.

Jobqa mana yacharqachu Satanás payta qhawashasqanta. Jehová Diosqa Satanasta nerqa: “¿Rikorqankichu kamachiy Jobta? Pay jinaqa mana kanchu. Payqa kasuwan, cheqantataj kausan”, nispa. Satanastaj nerqa: “Arí, payqa kasusunki qhawasqaykirayku, bendecisqaykirayku, jallpʼasta, animalestapis qosqaykirayku. Qhechuy tukuy kapusqanta, niñataj yupaychasonqachu”, nispa. Jehová Diostaj nerqa: “Jobta pruebaman churay. Jinapis ama payta wañuchinkichu”, nispa. Jehová Diosqa saqerqa Satanás Jobta ñakʼarichinanta, imajtinchus payqa yacharqa Job payta kasukunantapuni.

Satanasqa Jobta imaymanamanta ñakʼaricherqa. Ñaupajtaqa Sabamanta runasta kacharqa Jobpa wakasninta, burrosnintawan suwakapunankupaj. Chantá Jobpa ovejasninta nina ruphaykorqa, camellosnintataj Caldeamanta runas suwakaporqanku. Animalesta qhawajkunapis wañorqanku. Chantá tukuynin wawasnin mikhushajtinku, patankuman wasi urmaykuspa paykunata wañucherqa. Chaytaj Jobtaqa astawanraj llakicherqa, jinapis Diosta yupaychallarqapuni.

Satanasqa Jobta astawan llakichinanpaj tukuy cuerponman millay sarna onqoyta jina  juntʼaykucherqa. Chaytaj mayta nanarqa. Jobqa imajtinchus chay jina llakiykunapi kasqanta mana yachaspapis, Diosta yupaychallarqapuni. Jehová Diosqa chayta rikuspa kusikorqa.

Chantá Satanasqa Jobta pruebaman churananpaj kinsa runasta kacharqa. Chay runasqa nerqanku: “Juchallikusqaykitachá pakayta munashanki. Chayrayku Dios castigashasunki”, nispa. Jobtaj nerqa: “Mana juchallikunichu”, nispa. Jinapis Jobqa Jehová Dios ñakʼarichishasqanta yuyayta qallarerqa. Nerqataj Dios sajra imasta paypaj ruwashasqanta.

Eliú sutiyoj jovenqa chay kinsa runas Jobwan parlasqankuta chʼinllamanta uyarerqa. Manaña chʼin kayta atispataj nerqa: “Pantasqata yuyashankichej, Jehová Diosqa yuyasqanchejmantapis aswan jatunraj. Payqa ni jaykʼaj ima sajratapis ruwanmanchu. Payqa tukuy imata qhawamushan, llakiypi kaj runastataj yanapan”, nispa.

Jehová Diospis Jobman nerqa: “Kay jallpʼata cielotawan ruwashajtiy, ¿maypitaj kasharqankiri? ¿Imajtintaj sajra imasta ruwasqayta yuyankiri? Mana allinta yachaspalla parlashanki”, nispa. Jobqa pantasqanta reparakuspa, nerqa: “Pantashani, perdonaway mana allinta parlasqaymanta. Qantaqa uyarispalla rejserqayki, kunantajrí, rikuni tukuy imata ruwayta atisqaykita”, nispa.

Chaymanta qhepamantaj, Jehová Diosqa Jobta sanoyacherqa, tukuy ima kapusqantataj aswan ashkhataraj kutichiporqa. Jobqa unayta kusisqa kausakorqa. Paytaqa Jehová Dios bendicerqa llakiypi kaspapis kasukusqanrayku. Qanpis Job jina imapi rikukuspapis, Diosta yupaychayta atinki.