1, 2. 1) ¿Imaraykú Ana llakisqa kasharqa viajananpaj wakichikushajtin? 2) ¿Imapi rikukojtinchejtaj Anaj kausaynin yanapawasunman?

ANA llakiykunasninpi mana yuyayta munaspa, viajananpaj mayta wakichikushasqanpi tʼukurina. Qosan Elcanaqa, tukuy familianta, sapa wata Silo llajtaman Diosta yupaychanapaj toldoman pusaj. Jehová Diosqa, payta yupaychajkuna kusikunankuta munan (Deuteronomio 16:15 leey). Cheqamantachá Anaqa, wawamantapacha toldoman rispa mayta kusikoj. Chaywanpis mana ñaupaj wataspi jinachu kusisqa kasharqa.

² Anataqa qosan mayta munakorqa. Chaywanpis qosanpata waj warmin kallarqataj, sutintaj Penina karqa, chay warmitaj tukuy imata ruwarqa Anata llakichinanpaj. Sapa wata Silo llajtaman rejtinkutaj astawanraj llakichej. ¿Imaynatá chayta ruwaj? Chantá, ¿imaynatá Anata creeynin yanaparqa llakiykunasninta atipananpaj? Chʼampaykunarayku llakisqa, mana kallpayoj kashanchej chayqa, Anaj kausayninmanta yachakuy mayta yanapawasunman.

3, 4. ¿Ima chʼampaykunapitaj Ana rikukorqa, chantá imaraykutaj mana atipayta atillarqachu?

³ Bibliaqa, Ana iskay jatuchaj chʼampaykunasniyoj kasqanta sutʼinchawanchej. Ñaupajtaqa Peninaj chhoqonakuyninta muchunan karqa. Chantapis wawasniyoj kayta mana aterqachu. Cheqamanta mayqen warmillapis, wawitayoj kayta munashaspa mana wawitayoj kayta atispaqa mayta llakikunman. Anaj tiemponpeqa, mana wawasniyoj kayqa, may llakiy karqa, imaraykuchus familiankoj sutin chinkaj. Chayrayku, mana wawasniyoj kayqa, pʼenqaypaj, pisipaj qhawasqa ima karqa.

⁴ Anaqa, Penina mana llakichinmanchu karqa chayqa, mana anchata llakikunmanchu karqa wawasniyoj kayta mana atisqanmanta. Cheqamantapuni uj qhari, ashkha warmisniyoj kajtenqa, familianpi, chʼajwas, chhoqonakuykuna, chʼampaykuna ima rikhurin. Jehová Diosqa, ni jaykʼaj, qhari ashkha warmisniyoj kananta  munarqachu. Astawanpis, Edén huertapi, qharita uj warmiyojlla kananta nerqa (Gén. 2:24). Bibliaqa, ashkha warmisniyoj qharispa familiankumanta parlaspa, llakiyllapi kausakusqankuta rikuchin, chaytataj Elcanaj familianpi rikunchej.

5. ¿Imaraykutaj Penina Anata llakichej, chantá imaynatataj chayta ruwaj?

⁵ Elcanaqa, Peninamanta nisqaqa Anata astawan munakorqa. Judíos nisqankuman jinataj, payqa, Anawanraj ñaupajta casarakusqa, chaymantaraj Peninawanqa. Chay nisqanku cheqa kajtin chayri manapis, cheqamantapuni Peninaqa, envidiakusqanrayku, tukuy imaymanasmanta Anata llakicherqa. Ashkha wawasniyoj kasqanraykutaj, may kasqanta yuyakoj. Sapa kuti wawan kajtintaj, astawan astawan jatunchakorqa. Anata khuyananmanta, sonqochananmanta imaqa, astawan llakicherqa. Biblia nin jinataj, “Peninaqa Anata chejnikuspa, kʼumuykachachillajpuni” (1 Sam. 1:6). Arí, sonqonta nanachinanpaj, tukuy imata ruwarqa.

6, 7. 1) ¿Imaraykutaj Ana, Penina llakichishasqanmanta qosanman mana willarqachu? 2) ¿Dios castigashasqanraykuchu Ana mana wawasniyoj karqa? Sutʼinchay. (Sutʼinchayninta qhawariy.)

⁶ Peninaqa, Silo llajtaman sapa wata rejtinku Anata mayta llakichej. ¿Imaynamantá? Elcanaqa, Peninaj sapa uj ‘churisninman, ususisninman’ ima, Jehovaman jaywasqanku jaywanamanta “maychus paykunaman chayasqanta” qoj. Chay jaywasqanmanta Anaman sumajnin kajta qojtinpis, celosa Peninaqa may kasqanta yuyakuspa, chay kutispipuni Anata astawan asipayaj. Anataj, llakiymanta mana mikhuytapis munarqachu, sonqo nanaytataj waqarikoj. Chaywanpis Elcanaqa munasqa warmin may llakisqa kashasqanta, mana mikhushasqanta ima reparaspa, sonqochayta munarqa. Nerqataj: “Ana, imaraykutaj waqankiri? Imaraykutaj llakisqalla kashanki manataj mikhunkichuri? Manachu noqaqa chunka churismantapis aswan allinraj kani?”, nispa (1 Sam. 1:4-8).

⁷ Elcanaqa, Ana mana wawasniyoj kayta atisqanmanta llakikusqanta repararqa. Anataj, qosanpa munakuyninta rikuspa kusikorqachá. * Chaywanpis Elcanaqa, manasina imatapis Peninaj sajra ruwayninmanta yacharqachu, nitaj Biblia ninchu Ana qosanman  chayta willasqanta. Ichá Anaqa, qosanman mana willarqachu, chʼampayta mana rikhurichiyta munaspa. ¿Qosan chay chʼampayta allinchanmanchu karqa? ¿Manachu Penina, wawasnin, kamachisnin ima, Anata astawan chejnikunkuman karqa? Ichapis Ana qosanman willakojtin, astawan chejnisqa, sapallan ima qhepakunman karqa.

8. ¿Imaraykutaj Jehová maychus tiemponpi cheqan kajta ruwasqanta yachay sonqochawanchej?

⁸ Elcana, Peninaj sajra ruwayninmanta yachajtinpis chayri manapis, Jehovaqa chayta sutʼita yacharqa. Chayrayku Palabranpi, wajkunata llakichiyta munaspa envidiarayku, chejnikusqankurayku imatapis ruwajkunata, mana allinpajchu qhawasqanta willawanchej. Chaywanpis Ana jina kʼacha runasqa, cheqan kajta ruwaj Diospi atienekunkuman, imaraykuchus maychus tiemponpi, munasqanman jinataj, ima sajra ruwaytapis allinchanqa (Deuteronomio 32:4 leey). Anaqa, ichapis chayta sumajta yacharqa, imaraykuchus Jehovamanta yanapata mañakorqa.

9. Ana, Penina llakichinanta yachaspapis mana wasipi qhepakusqanmanta, ¿imatá yachakusunman?

⁹ Sapa wata jina Elcanaj familianqa, Silo llajtaman rinankupaj juchʼuymanta jatunkama wakichikusharqanku. Chay llajtaman chayanankupajtaj 30 kilómetros (6 leguas) kurajta rinanku karqa, Efrainpa orqosninnejta. * Chakipi rispataj, uj chayri iskay pʼunchaypi chayaj kanku. Anaqa, Penina llakichinanta yachaspapis mana wasipi qhepakorqachu. ¿Imatá Anamanta yachakusunman? Wajkuna sajra ruwaykunasninkuwan llakichiwajtinchejpis ni jaykʼaj Diosta yupaychayninchejta saqenachu. Imajtinchus saqesunman chayqa, chʼampaykunata atipanapaj mana kallpanchej kanqachu.

10, 11. 1) ¿Imaraykutaj Ana atejtinkama yupaychana toldoman rerqa? 2) ¿Imaynatá Ana, Diosmanta mañakorqa?

¹⁰ Elcanaj familianqa, diantinta linkʼu linkʼu ñanta riytawantaj, Silo llajtata rikorqanku, jatuchaj orqoswan muyurisqata. Chay llajtaman qayllaykusqankuman jinataj, Anaqa imatachus Jehovaman ninanpi tʼukurerqachá. Llajtaman chayaspañataj, tukuyninku mikhurinankupaj tiyarikorqanku. Anaqa, atejtinkama, Diosta yupaychana toldoman rerqa. Chay toldoj punkupitaj kuraj sacerdote Elí tiyasharqa. Anaqa, ichá mana repararqachu Elí chaypi kashasqanta, imatachus mañakunanpi yuyashasqanrayku. Payqa, Jehová mañakuyninta uyarinanta, llakiyninta Jehovalla entiendenanta  ima yacharqa. Manchay llakisqapuni kasqanraykutaj waqaspa mañakuyta qallarerqa.

¹¹ Arí, sonqon ukhupi Diosmanta mañakusharqa. Imaynatachus llakiyninta willananpi tʼukurishajtintaj, simin kharkatitisharqa. Tukuy ima llakichisqantataj tukuy sonqo Diosman willakorqa. Chantapis mana wawayoj kayllatachu mañakorqa. Manaqa Diosman imatachus qoyta munasqanta ima nerqa. Chayrayku mañakuyninpi jinata nerqa: “Uj wawata qowanki chayqa, noqa chay wawataqa qopusqayki tukuy kawsaynimpi kamachiyki kanampaj”, nispa (1 Sam. 1:9-11).

12. Ana imaynatachus Diosmanta mañakusqanmanta, ¿imatá yachakunchej?

¹² Ana ajinata mañakusqanqa, imaynatachus Jehová Diosmanta mañakunanchejta yachachiwanchej. Jehovaqa, imachus sonqonchejpi kasqanta willananchejta munan. Imaynatachus uj wawa, tatanman tukuy imata willakun ajinata (Salmo 62:8; 1 Tesalonicenses 5:17 leey). Apóstol Pedroqa, Dios yuyaychasqanman jina, mañakuymanta kayta qhelqarqa: “Diosman saqeychej tukuy phutikuyniykichejta, imaraykuchus payqa qankunamanta dakun”, nispa (1 Ped. 5:7).

13, 14. 1) ¿Imatá Elí, Anamanta usqhayllata yuyarqa, chantá imaraykutaj? 2) ¿Imatataj yachakunchej Ana, imatachus Eliman kutichisqanmanta?

¹³ Llakikunapaj jina runasqa, mana Dios jinachu kʼacha sonqoyoj, khuyakuyniyoj ima kanchej. Sutʼincharinapaj; Ana sonqo nanayta waqaspa mañakushajtin simillan kuyushasqanta rikuspa, kuraj sacerdote Eliqa, machasqa kasqanta yuyarqa, manataj tapurerqachu imaraykuchus jina kashasqanta. Chayrayku nerqa: “Maykʼajkamataj machasqa kankiri? Amaña astawan ujyaychu”, nispa (1 Sam. 1:12-14).

¹⁴ Anaj sonqonqa, ¡maytachá nanarqa!, Elí qhasimanta juchachasqanrayku. Chay kutipi imatachus Ana ruwasqanmanta mayta yachakullasunmantaj. Payqa, wajkunaj sajra ruwayninku Diosta yupaychaymanta karunchananta mana saqerqachu. Astawanqa, Eliman imaraykuchus jina kashasqanta, kʼachallamanta sutʼincharqa. Elitaj, pantasqanta reparaspa, ichá pʼenqaywan kayta nerqa: “Sonqochakuspa ripuy; Israelpa Diosnintaj uyarisuchun chay tukuy mañakusqaykita”, nispa (1 Sam. 1:15-17).

15, 16. 1) Ana toldopi Diosmanta mañakuytawan, yupaychaytawan, ¿imayna kasharqa? 2) Llakisqa kashaspa, ¿imaynatá Ana jina ruwasunman?

¹⁵ Ana toldopi Diosmanta mañakuytawan, yupaychaytawan, ¿imayna kasharqa? Biblia nin: “Chaymanta Anaqa kutiporqa maynintachus jamusqanta. Chantá mikhorqa, manañataj llakisqachu karqa”, nispa (1 Sam. 1:18). Arí, Anaqa, sonqo tiyasqa kasharqa.  Imaraykuchus, llakiykunasninta, tukuy atiyniyoj Jehová Diosman saqeporqa (Salmo 55:22 leey). Chantá Jehová Dios, ¿manachu ima chʼampaytapis allinchayta atinman?

¹⁶ Llakisqas, sonqo pʼakisqas kashanchej chayqa, Ana jina llakiyninchejta ‘mañakuykunata uyarej’ Diosman tukuy sonqo willakuna (Sal. 65:2). Creeywan Diosman willakusunchej chayqa, Jehová “mana unanchay atina sonqo tiyaykuyninta sonqosni[nchejman] churanqa” (Fili. 4:6, 7).

17, 18. 1) ¿Imaynatá Elcana, Ana, Diosman qonanta nisqanta allinpaj qhawasqanta rikucherqa? 2) ¿Imatá Penina repararqa?

¹⁷ Anaqa, qʼayantin Diosta yupaychana toldoman qosanwan khuska kuterqa. Imatachus Diosmanta mañakusqanta, imatachus Diosman qonanta ima, Elcanaman willarqachá. Jaqay tiempopeqa uj warmi, qosan mana yachanallanta imatapis qonanta nej chayqa, Ley nisqanman jina qosaqa, warminpa nisqanta qhesachayta atej (Núm. 30:10-15). Chaywanpis cheqa sonqo Elcanaqa, mana Anaj nisqanta qhesacharqachu. Astawanpis niraj wasinkuman kutipushajtinku, Diosta yupaychana toldopi khuska yupaycharqanku.

¹⁸ Peninaqa, Anata manaña llakichiyta atisqanta repararqachá. Biblia, mana ninchu maykʼajchus chayta reparasqanta, chaywanpis ‘manaña llakisqachu’ nisqanqa, chaymanta qhepaman Ana kusisqa kausakusqanta rikuchiwanchej. Peninaqa, Anata llakichinanpaj ni imata ruwayta atisqanta reparakorqachá. Bibliaqa, manaña ujtawan Peninamanta parlanchu.

19. ¿Ima bendiciontataj Ana japʼerqa, chantá imatataj mana qonqarqachu?

¹⁹ Killasninmanqa, Ana may kusisqa, sonqo juntʼasqa ima kasharqa. Imaraykuchus, ¡wijsallisqa rikhurerqa! Chaywanpis kusisqa kashaspa mana qonqarqachu pimantachus chay bendición jamusqanta. Wawitan nacekojtintaj, Samuel sutita churarqa. Chay suteqa, Hebreo qallupi, “Diospa Sutin” niyta munan, cheqamanta Diospa sutinta oqharinamanta parlasharqa, chaytataj Ana Diosmanta mañakuspa ruwarqa. Anaqa, kinsa watata Silo llajtaman mana rerqachu wawitanta pʼitinankama. Chaykamataj payqa wawitanta Diosta yupaychana toldoman saqemunanpaj sonqonta wakicherqa.

20. ¿Imaynatá Ana, Elcana ima, imatachus Diosman qosaj nisqankuta juntʼarqanku?

²⁰ Anaqa, Silo llajtapi wawitanta allinta qhawanankuta yacharqa ichapis chaypi sirvej wakin warmis payta qhawankuman karqa. Chaywanpis, wawitanqa juchʼuysitullaraj karqa, ni pi mamapis wawitanmanta tʼaqakuyta munanmanchu. Chaywanpis Ana, qosan  ima, Diosta yupaychana toldopi wawitankuta tukuy sonqo saqerqanku. Silo llajtapitaj, Diosta yupaychana toldopi Jehová Diosman jaywanata jaywarqanku, chantapis wawitata kuraj sacerdote Eliman pusarqanku. Anataj, Eliman willarqa ñaupaj wataspi Diosmanta wawitata mañakusqanta, chay wawitatataj Diosman qonanta ima.

21. ¿Imaynatá Anaj mañakusqan sinchʼi creeyniyoj kasqanta rikucherqa? (“ Iskay sumaj mañakuykuna” nisqa recuadrota qhawariy.)

²¹ Chantá, Ana Diosmanta mañakorqa, mañakuyninta Dios allinpaj qhawasqanraykutaj chayta Palabranpi qhelqacherqa. Kay 1 Samuel 2:1-10 versiculospi, Ana sinchʼi creeyniyoj kasqanta rikunchej. Mañakuyninpi payqa, Jehovata imaynatachus atiyninta apaykachasqanmanta jatuncharqa. Chantá sutʼincharqa mana pipis Jehová jina, jatunchakojkunata kʼumuykachachej, sarusqa kajkunatataj oqharej kasqanta, pillamantapis kausayta qhechuyta atisqanta chayri wañuymanta salvayta atisqanta ima. Chantapis Jehovaj llimphu kayninta, cheqan kayninta ima jatunchallarqataj. Tukuy sonqotaj nerqa: ‘Mana waj pakakuna chhanka kanchu, Diosninchej jinaqa’, nispa. Cheqamantapuni, Jehovaqa atienekunapaj jina, paypi jarkʼakuyta maskʼajkunatataj jarkʼan, kʼumuykachachisqas kajtinkupis.

22, 23. 1) ¿Imaraykutaj nisunman tatasnin Samuelta munakusqankuta? 2) ¿Imaynatá Jehová, Anata bendecillarqapuni?

²² Arí, wawita Salmuelpajqa, may sumajpuni karqa maman sinchʼi creeyniyoj kasqanqa. Wiñasqanman jina, mamanta faltacharqachá, chaywanpis mana jaykʼajpis saqerpayasqa jina sientekorqachu. Mamanqa, sapa wata Silo llajtaman rispa, ruwasqan pʼachata apapoj toldopi llankʼananpaj. Chaytaj Samuelta mayta munakusqanta rikucherqa (1 Samuel 2:19 leey).  Kunanqa, Anata rikushawajpis jina tʼukuriy. Anaqa, wawitanman mosoj pʼachitanta churaykushan, pʼachitan jatunchus chayri juchʼuychus kasqantataj midishan, may munakuywantaj ñaupajllamanpuni rinanpaj kallpacharishan. Samuelqa, ¡maytachá kusikun chay jina mamayoj kaspa! Paypis jatun kajtin tatasninta, Israel llajtata ima, mayta kusichillanqataj.

²³ Anaqa, ashkha bendicionesta japʼerqa. Watejmanta Diosqa wawasniyoj kananta saqerqa, ajinamanta Anaqa, Elcanaman phishqa wawastawanraj qorqa (1 Sam. 2:21). Chantapis tiempo pasasqanman jina Jehová Diosman astawan qayllaykorqa. Chaytaj tukuy kausayninpi uj sumaj bendición karqa. Noqanchejpis Ana jina ruwasun chayqa, Diosman astawan qayllaykuyta atisunchej.