Diosqa munan tukuy runas mañakuynejta payman qayllaykunankuta (Salmo 65:2). Chaywanpis mana tukuy runaspa mañakuyninkutachu uyarin. Biblia nisqanman jina, Diosqa warminta ñakʼarichej runaj mañakuyninta mana uyarinchu (1 Pedro 3:7). Ñaupa tiempopipis, israelitas kutin kutita sajra imasta ruwajtinku, Diosqa mana mañakusqankuta uyarejchu. Jinapis juchasninkumanta pesachikojkunaj mañakuyninkuta uyarin. Isaías 1:15; 55:7 leey.

Kay ¿Tukuypa mañakusqantachu Dios uyarin? nisqa videota qhawariy.

Jehová Diosllamanta mañakunanchej tiyan, pay ruwawasqanchejrayku (Mateo 4:10; 6:9). Juchasapas kasqanchejraykutaj, Jesuspa sutinpi mañakuna tiyan. Imajtinchus pay juchasninchejrayku wañorqa (Juan 14:6). Jehová Diosqa sonqomantapacha mañakunanchejta munan, manataj rezopi jinachu. Mateo 6:7; Filipenses 4:6, 7 leey.

Diosqa sonqonchej ukhupi mañakusqanchejtapis uyarin (1 Samuel 1:12, 13). Payqa munan ima ratollapis paymanta mañakunanchejta. Chayta ruwasunman tutamanta, chʼisinpi, mikhuna horasta, llakiypi kashaspapis. Salmo 55:22; Mateo 15:36 leey.

Diosman qayllaykoyqa mana atikullanchu. Imajtinchus Diospi mana creejkuna chaupipi kausakunchej. Paykunaqa  Dios allin kausayta jallpʼaman apamunanta nisqanmantapis asikunku (2 Timoteo 3:1, 4; 2 Pedro 3:3, 13). Chayrayku purajmanta kallpachanakunapaj Diosta yupaychajkunawan tantakunanchej tiyan. Hebreos 10:24, 25 leey.

Diosta munakoj runaswan khuska tantakuspaqa, Jehová Diosman astawan qayllaykusunchej. Chayrayku may allinpuni kanman Jehovaj testigosninpa tantakuyninkuman rinanchej. Romanos 1:11, 12 leey.

Bibliamanta yachakusqanchejpi tʼukurispa. Chantapis Diospa ruwasqasninpi, yuyaychaykunasninpi, imatachus ruwananta nisqanpi ima tʼukurillasunmantaj. Chayta ruwaspaqa Jehová Dios munakuwasqanchejta, yachayniyoj kasqanta ima reparasunchej. Josué 1:8; Salmo 1:1-3 leey.

Diosman qayllaykunapajqa paypi creena, atienekunataj. Creeyninchejqa uj plantita jina. Uj plantita wiñananpajqa yakuwan jichʼananchejpuni tiyan. Ajinallatataj creeyninchej wiñananpajpis, imatachus leesqanchejpi tʼukurinanchej tiyan. Mateo 4:4; Hebreos 11:1, 6 leey.

Jehová Diosqa payta munakojkunamanta llakikun. Chayrayku payqa creenallapajpuni, wiñay kausayta tarinapaj ima yanapawasun (Salmo 91:1, 2, 7-10). Diosqa kusisqa kanapaj, mana onqonapaj ima, imastachus mana ruwanata niwanchej. Chantapis imaynatachus kausanata yachachiwanchej. Salmo 73:27, 28; Santiago 4:4, 8 leey.