Jehová familiata ruwashajtin, tatas wawasninkuta uywanankuta nerqa (Colosenses 3:20). Tata jina, wawasniykiman allin runa kayta, Jehovata munakuytapis yachachinayki tiyan (2 Timoteo 1:5; 3:15). Chaywanpis wawaykej sonqonpi imachus kasqanta yachanayki tiyan. Ruwaykunasniykiwan yachachinaykeqa aswan sumaj. Wawasniykiman Diospa Palabranmanta yachachinaykipajqa, ñaupajta qanraj sonqoykipi Diospa Palabranta japʼikuy (Salmo 40:8).

BIBLIA NIN: “Uyariyta yachaychej, amataj anchata parlaychejchu”, nispa (Santiago 1:19, 20). Wawasniyki mana manchachikuspalla qanwan parlarinankuta munanki chayqa, tukuy sonqo maykʼajllapis uyarinayki tiyan. Llampʼu sonqo kajtiykeqa wawasniyki qanwan parlarillanqanku (Santiago 3:18). Qan phiñakuyllaman rinki chayqa, wawasniyki mana imamantapis sutʼita parlasonqankuchu. Sapa kuti munakusqaykita niy, pacienciayoj kasqaykitataj rikuchiy (Mateo 3:17; 1 Corintios 8:1).

KAYTA RUWAWAJ:

• Wawasniyki qanwan parlariyta munajtinku uyariy

• Sapa kuti wawasniykiwan parlariy, amataj chʼampaykuna kajtillanqa

BIBLIA NIN: “Yuyayniyoj runaqa yachayninwan imatapis ruwan”, nispa (Proverbios 13:16). Wawasniyki imaynachus sientekusqankuta yachanaykipajqa, wakin kuti allinta yuyaychakunayki tiyan. Jovenesqa yapasqata imatapis parlallanku chayri mana allinta yuyaychakuspalla imatapis ninku. “Manaraj allinta uyarishaspa imatapis kuticheyqa wampu kaymin” (Proverbios 18:13). Chayrayku paykunawan ama usqhayllata phiñakuychu (Proverbios 19:11).

KAYTA RUWAWAJ:

• Paykuna imatapis willashasojtinkoqa ama pantachiychu, nitaj usqhayllata phiñakuychu

• Yuyarikuy paykuna jina kashaspa, imatachus astawan allinpaj qhawasqaykita, imaynachus sientekusqaykitapis

BIBLIA NIN: “Tataykej yachachisusqanta uyariy, wawáy, amataj pisipaj qhawaychu mamaykej yachachisusqantapis”, nispa (Proverbios 1:8). Jehovaqa tatasta, mamasta ima kamachin wawasninkuta yachachinankupaj. Chayrayku wawasninku, kasukuyniyoj kanankupaj, allin runas kanankupajpis, iskayninku yachachinanku tiyan (Efesios 6:1-3). Wawasqa tatasninku mana ‘uj yuyaylla’ kasqankuta reparanku (1 Corintios 1:10). Chayrayku imamantapis mana kikinta yuyaspaqa, ama wawasniykichejpa ñaupaqenpi chʼajwaychejchu, imaraykuchus wawasniykichejqa manaña jatunpajchu qhawasunkichejman.

KAYTA RUWAWAJ:

• Iskayniykichej parlariychej wawasniykichejta kʼaminaykichejmanta

• Wawasniykichejta imaynatachus yachachinamanta, mana kikinta yuyaspaqa, qosayki chayri warmiyki imaraykuchus ajinata yuyasqanta entiendey

BIBLIA NIN: “Wawamanqa imaynatachus kawsananta allinta yachachiy”, nispa (Proverbios 22:6). Qanllamanta kashan wawasniykita yachachiypi allin risunanqa. Chayrayku imaynatachus yachachinaykita, kʼaminaykita ima ñaupajmanta wakichikuy (Salmo 127:4; Proverbios 29:17). Wawasta yachacheyqa mana maqayllachu, manaqa imaraykuchus kasukunanku kasqanta entiendechiy (Proverbios 28:7). Diospa Palabranta munakunankuta, yuyaychaykunasninman jinataj kausakunankuta yachachiy (Salmo 1:2). Ajinamanta sonqo yuyayninku llimphu kanqa (Hebreos 5:14).

KAYTA RUWAWAJ:

• Wawasniyki Diospi atienekunankupaj tukuy imata ruway

• Internetpi millay imasmanta, Internetnejta waj runaswan masichakuymanta, millay kausayniyoj runasmanta ima ayqenankupaj yanapay, ajinamanta llimphu kausayninkuta jarkʼanqanku