LECCIÓN 01
¿Biblia yanapawasunmanchu?
Ashkha runasqa yachayta munanku imapajchus kausasqankuta chayri imaynachus kausay qhepaman kananta. Wakintajrí yachayta munanku imaraykuchus sufrisqanchejta, imajtinchus wañusqanchejta ima. Ichá qanpis chay imasta yachayta munallankitaj. Bibliaqa tukuy chay imasta willawanchej. Chantapis tukuyninchej sapa día imaymana llakiyniyoj kanchej. Wakenqa qolqemanta llakikunchej. Wakintajrí familianchejwan kusisqa kausakunamanta llakikunchej. Bibliaqa chay imaspipis yanapallawanchejtaj. Arí, Bibliaj yuyaychaykunasnenqa tukuyta yanapawasunman.
1. ¿Imastataj Biblia willawanchej?
Bibliaqa willawanchej, imaynatachus runas rikhurisqanchejta, imapajchus kausasqanchejta, imaraykuchus sufrisqanchejta, wañupuspa maymanchus ripusqanchejta ima. Bibliaqa willallawanchejtaj tukuy runas allinta kausakuyta munajtinkupis imaraykuchus tukuynejpi guerras, chʼajwas ima kasqanta. Chantá willallawanchejtaj imapichus kay mundo tukunanta. Ashkha runasqa chay imasta Bibliapi yachakunku. Qanpis chayta yachakuyta atillawajtaj.
2. ¿Biblia kausayninchejpi yanapawasunmanchu?
Bibliaqa mayta yanapawasunman. Bibliapeqa yachakusunman, imaynatachus familianchejwan kusisqa kausakunata. Chantapis yachakullasunmantaj imatachus ruwanata mana anchata llakikunapaj, kusisqa trabajanapajpis. Bibliaqa mana chayllatachu yachachiwanchej, manaqa ashkha imastawan. Kay publicacionta estudiashaspaqa, tukuy chay imasta yachakunki, reparankitaj Bibliaqa ‘may sumajpuni’ kasqanta (2 Timoteo 3:16). Chayrayku kay publicacionta estudianaykipaj Jehovaj testigosninwan yanapachikuy.
Kay publicacionqa mana Bibliachu, manaqa Bibliata entiendenapaj yanapalla. Chayrayku Bibliamanta rikhurej tukuy versiculosta leeriy, imatachus yachakushasqaykiwantaj kikinchay.
ASTAWAN YACHAKUNA
Kaypi yachakusun imaynatachus wakin runasta Biblia yanapasqanta. Yachakullasuntaj imatachus ruwanata Bibliata leerispa gustachikunapaj, imaraykuchus Bibliata entiendenapaj yanapachikunata ima.
3. Bibliaqa ñanninchejta kʼanchan
Bibliaqa ñanninchejta kʼanchananpaj sumaj linterna jina. Chayrayku kausayninchejpi imatapis allintapuni ruwanapaj yanapawasunman. Chantapis Bibliaqa imachus aswan qhepaman kananta willawanchej.
Salmo 119:105 leeriychej, chantá yachakojta tapuriy:
-
¿Imatataj kay versículo Diospa Palabranmanta nin?
-
Qanrí, ¿imatá Bibliamanta niwaj?
4. Bibliaqa imatachus yachayta munasqanchejta willawanchej
Uj warmeqa watasta yachayta munarqa, imaraykuchus llakiykuna mana chinkasqanta. Bibliataj chayta yachananpaj, waj imastawan yachananpaj yanaparqa. VIDEOTA qhawariychej, chantá yachakojta tapuriy:
-
Videopi rikhurimoj warmi, ¿imatataj yachayta munasqa?
-
¿Imaynatá Bibliata estudiay payta yanapasqa?
Bibliaqa imatapis yachayta munaspa tapukunanchejta niwanchej. Mateo 7:7 leeriychej, chantá yachakojta tapuriy:
-
¿Biblia willawasunmanchu imatachus yachayta munasqanchejta? ¿Imastataj qan yachayta munawaj?
5. Bibliata leespa gustachikuna
Ashkha runasqa Bibliata leespa gustachikunku, kausayninkupitaj yanapachikunku. VIDEOTA qhawariychej, chantá yachakojta tapuriy:
-
Kay videopi rikusqanchejman jina, ¿imatataj jóvenes ninku waj librosta leenamanta?
-
Bibliata leenamantarí, ¿imatá ninku?
Bibliaqa sonqochawanchej, sumaj kausay kanantataj niwanchej. Romanos 15:4 leeriychej, chantá yachakojta tapuriy:
-
¿Yachayta munawajchu ima bendicionesmantachus Biblia parlasqanta?
6. Bibliata entiendenapaj yanapachikuna
Ashkha runasqa sapallankupi Bibliata leespapis, wajwan yanapachikuspa astawan entiendenku. Hechos 8:26-31 leeriychej, chantá yachakojta tapuriy:
-
¿Imatá ruwasunman Bibliata sumajta entiendenanchejpaj? (30, 31 versiculosta qhawariy).
Etiopía llajtamanta runaqa, Diospa Palabranta entiendenanpaj wajwan yanapachikorqa. Kunanpis ashkha runas chayllatataj ruwanku.
WAKIN RUNAS NINKU: “Bibliata estudiayqa qhasi manakajlla”, nispa.
-
¿Ajinapunichu kanman, imatá qan niwaj?
¿IMASTÁ YACHAKUNCHEJ?
Kaypi yachakunchej Bibliaqa sumajta kausakunapaj yanapawasqanchejta, sonqochawasqanchejta, qhepaman allin kausay kanantapis willawasqanchejta. Chantapis yachakullanchejtaj imastachus yachayta munasqanchejman Biblia kutichiwasqanchejta.
Yuyarikunapaj
-
¿Imaspitaj Biblia yanapawasunman?
-
¿Imastataj Biblia willawanchej?
-
¿Imasmantataj Bibliapi yachakuyta munawaj?
ASTAWAN YACHAKUNAYKIPAJ
Imaynatachus Biblia kunan tiempopi yanapawasqanchejta yachakunaykipaj kayta leeriy.
“Bibliaj yuyaychaykunasnenqa tukuy tiempopaj” (Torremanta Qhawaj, 1 kaj 2018)
Uj runa wawamantapacha llakisqalla kausakorqa. Jinapis Biblia payta yanaparqa. Chaymanta astawan yachanaykipaj kay videota qhawariy.
Imaynatachus Biblia familiasta yanapasqanta yachanaykipaj kayta leeriy.
Bibliaqa sutʼita willawanchej pichus kay mundota kamachishasqanta. Chaymanta astawan yachanaykipaj kay videota qhawariy.
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
