LECCIÓN 38
Jehová kausayta qowasqanchejmanta agradecekuna
Kausayninchejpeqa ashkha imasta ruwaspa kusisqa kausakuyta atinchej. Wakin kutis llakiykunapi rikukojtinchejpis, kausayninchejpi allin imasta ruwaspa kusisqa kayta atinchej. ¿Imastá ruwasunman Jehová kausayta qowasqanchejmanta agradecekunapaj? ¿Imaraykutaj agradecekunapuni kanman? Chay imasta kaypi yachakusun.
1. ¿Imaraykutaj kausayta jatunpaj qhawana tiyan?
Kausaytaqa jatunpaj qhawananchej tiyan munakuyniyoj Tatanchej Jehová qowasqanchejrayku. Paymin, “kausay yaku juturi”. Pay tukuy kausajkunata ruwarqa (Salmo 36:9). “Diosqa tukuy runasman kausayta qon, samayta, tukuy imastawan” (Hechos 17:25, 28). Jehová Diosqa tukuy ima necesitasqanchejta kausananchejpaj qowanchej. Chantapis paynejllata kusisqa kausakunchej (Hechos 14:17 leey).
2. ¿Imastá ruwasunman Jehová kausayta qowasqanchejmanta agradecekunapaj?
Kausayta jatunpaj qhawasqanchejta rikuchinchej kausayninchejta cuidaspa, wajkunaj kausayninkutapis jatunpaj qhawaspa. Jehová Diosqa mamanchejpa wijsallanpiraj kashajtinchej rikuwarqanchejña. Chayrayku Diospa kamachin Davidqa Dios yuyaychasqanman jina nerqa: “Ñawisniykeqa rikuwarqankuña mamaypa wijsanpi rikhurishajtiy”, nispa (Salmo 139:16). Jehovapajqa kausayninchej may valorniyoj (Mateo 10:29-31 leey). Chayrayku Jehová Diosqa mayta llakikun pillapis runa masinta wañuchejtin chayri pay kikin wañuchikojtin (Éxodo 20:13). a Jehová Diosqa mayta llakikullantaj kausayninchejta wañuy pataman churajtinchej, wajkunaj kausayninkuta mana jatunpaj qhawajtinchej, nitaj kausayninkuta cuidanapaj imatapis ruwajtinchej.
ASTAWAN YACHAKUNA
Kaypi yachakusun kausayninchejta jatunpaj qhawasqanchejrayku imastachus ruwanata.
3. Kausayninchejta cuidana
Jehovaj munayninta ruwaj cristianosqa kausayninkuta Jehová jina qhawanku. Imaraykuchus paykunaqa Diosman kausayninkuta uj jaywanata jina qonku, chayraykutaj sumajta cuidanku. Romanos 12:1, 2 leeriychej, chantá yachakojta tapuriy:
-
¿Imaraykutaj kausayninchejta cuidana tiyan?
-
¿Imaynatataj chayta ruwasunman?
4. Kausayninchejta, wajkunaj kausayninkutapis jatunpaj qhawana
Bibliaqa yuyaychawanchej kausayninchejta, wajkunaj kausayninkutapis mana wañuy pataman churanata. VIDEOTA qhawariychej.
Proverbios 22:3 leeriychej, chantá yachakojwan parlariy imastachus ruwanamanta mana pipis imanarpakunanpaj:
-
Wasinchejpi.
-
Trabajonchejpi.
-
Pujllashaspa.
-
Autopi rishaspa chayri autota manejashaspa.
5. Manaraj nacekoj wawitaj kausayninta jatunpaj qhawana
Davidqa uj takiypi sutʼincharqa Jehová Diosninchej uj wawitaj kausayninta mamanpa wijsallanpiraj kashajtin jatunpaj qhawasqanta. Salmo 139:13-17 leeriychej, chantá yachakojta tapuriy:
-
¿Maykʼajmantapachataj Jehovapaj uj runaj kausaynin qallarin, nacekusqan diamantapachachu chayri maman onqoj rikhurisqan diamantapachachu?
Jehová Diosqa israelitaspaj leyesta churaporqa. Chay leyestaj onqoj warmista, manaraj nacekoj wawitasta ima jarkʼaj. Éxodo 21:22, 23 leeriychej, chantá yachakojta tapuriy:
-
¿Imaynatá Jehová Dios qhawaj pillapis mana munaspalla uj wawitata manaraj nacekushajtin wañuchejtin?
-
Chanta, ¿imaynatá Jehová Dios qhawanman pillapis manaraj nacekushajtin wawitanta orqhochikojtin? b
-
Manaraj nacekoj wawitaspa kausayninkuta Jehová jatunpaj qhawasqanmanta, ¿imatá qan niwaj?
Uj warmeqa kausayta jatunpaj qhawaspapis, wakin kutis ichá yuyanman wawitanta orqhochikunanpuni kasqanta. Isaías 41:10 leeriychej, chantá yachakojta tapuriy:
-
Sichus uj warmita wawitanta orqhochikunanpaj tanqankuman chay, ¿pimantataj yanapata mañakunman? ¿Imaraykutaj chayta ninki?
WAKIN RUNAS NINKU: “Sapa warmi cuerponmanta dueño. Chayrayku ajllayta atin wawitanta orqhochikunantachus manachus”, nispa.
-
¿Imaraykutaj niwaj onqoj warmej kausayninta, wijsanpi kaj wawitaj kausaynintapis Jehová jatunpaj qhawasqanta?
¿IMASTÁ YACHAKUNCHEJ?
Kaypi yachakunchej Jehová kausayta qowasqanchejta. Chantapis Bibliapi yachakullanchejtaj kausayninchejta, wajkunaj kausayninkutapis jatunpaj qhawana kasqanta, cuidana kasqanta, munakunataj kasqanta.
Yuyarikunapaj
-
¿Imaynapí yachanchej Jehová kausayta jatunpaj qhawasqanta?
-
¿Imaynataj Jehová sientekun pillapis runa masinta wañuchejtin chayri pay kikin wañuchikojtin?
-
Kausayniykipi imastachus ruwayta atisqaykimanta, ¿imastaj astawan gustasunki?
ASTAWAN YACHAKUNAYKIPAJ
¿Imaynatá Jehovaman agradecekusunman kausayta qowasqanchejmanta? Chayta yachanaykipaj kay musicayoj videota qhawariy.
¿Dios perdonanmanchu uj warmita wawitanta orqhochikusqanmanta? Chayta yachanaykipaj kayta leeriy.
¿Jehová kusikunchu kusirikunaraykulla kausayninchejta wañuy pataman churajtinchej? Chayta yachanaykipaj kayta leeriy.
Wakin runasqa wañuchikuyta munanku, imatachus Biblia chaymanta nisqanta yachanaykipaj kayta leeriy.
“¿Biblia yanapawanmanchu wañuchikuyta munajtiy?” (Chaytaqa Internetpi jw.org nisqapi tarinki)
a Jehová Diosqa mayta llakikun sonqo pʼakisqa kajkunamanta (Salmo 34:18). Payqa yachan imaynachus kashasqankuta wañuchikuyta munaj runas, yanapariytataj munan. Imatachus Dios yuyaychawasqanchejta yachanaykipaj kay leccionmanta “Astawan yachakunaykipaj” nisqapi, “¿Biblia yanapawanmanchu wañuchikuyta munajtiy?” nisqa yachaqanata leeriy.
b Uj warmeqa wawitanta orqhochikusqanmanta ashkha watasña pasajtinpis, ichá llakisqallapuni kashan. Jinapis Jehovaqa perdonanapaj wakichisqa kashan. Chaymanta astawan yachakunaykipaj kay leccionmanta “Astawan yachakunaykipaj” nisqapi, “¿Imatataj Biblia nin manaraj nacekoj wawitata wañuchinamanta?” nisqa yachaqanata leeriy.
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
