ONQOYQA MAYTA LLAKICHIWASUNMAN. Luisqa * sanito karqa, tukuy imatataj ruwaj. Jinallapi uj onqoyrayku ni chakisnintapis, ni makisnintapis kuyuchiyta aterqachu. Chayrayku niña valesqanta yuyarqa. Pay nin: “Sinchʼitapuni llakikorqani. Niña kallpaypis, ni valorniypis karqachu”, nispa.

Luispa kausaynenqa, reparachiwanchej ni pipis onqoymanta librakuyta atisqanchejta. Sano kanapaj cuidakojtinchejpis, wakin kutisqa onqosunpuni. Jina kajtin, ¿niñachu kusisqa kasun? Mana. Chaytataj kunan yachakusun. Jinapis ñaupajtaqa, qhawarina imastachus Biblia niwasqanchejta mana onqonapaj.

MAYCHUS KAJLLATA MIKHUNA. (1 Timoteo 3:2, 11). Anchata mikhuspa chayri anchata tomaspaqa, onqoykusunman, wajchayasunmantaj. Biblia nin: “Amapuni machakojkunawan tantakuychu, nitaj anchatapuni mikhojkunawampis. Machakojkunawan, ashkhata oqojkunawanqa wajchayanku”, nispa (Proverbios 23:20, 21).

AMA CUERPONCHEJTA CHʼICHICHANACHU. Biblia nin: “Cuerponchejta, sonqonchejtawan tukuy chʼichi kajmanta llimphuchakuna”, nispa (2 Corintios 7:1). Wakenqa cuerponkuta chʼichichanku: cocata pijchaspa, pitaspa, machaspa, drogakuspataj. Estados Unidosmanta uj institucionpi, imaschus runata onqochisqanta estudianku. Paykunataj ninku: “Cigarrota pitayqa mana cuerpopaj allinchu, maytataj onqochiwasunman”, nispa.

KAUSAYNINCHEJTA, CUERPONCHEJTAPIS JATUNPAJ QHAWANA. Diosnejta “kausanchej, kuyurinchej, kanchejtaj” (Hechos 17:28). Chayta mana qonqasunchu chayqa, trabajashaspa, autota apaykachashaspa chayri imata ruwashaspapis, mana kausayninchejta wañuy pataman churasunchu. Mana allinchu kanman, uj rato kusirikunanchejrayku suchus, mana makisniyoj chayri ciegos rikhurinanchejqa.

 AMA PHIÑAKUNACHU, NITAJ ANCHATA LLAKIKUNACHU. Cuerponchejwan yuyayninchejwan khuska llankʼanku. Chayrayku ama anchata llakikunachu, nitaj phiñakunachu, nillataj envidiakunachu. Bibliaqa yuyaychawanchej: “Phiñasqa kayta saqey, qhesachaytaj”, nispa (Salmo 37:8). Chantá nillawanchejtaj: “Ama phutikuychejchu imachus qʼaya kananmanta, imaraykuchus qʼaya pʼunchaypa llakiynenqa kallanqa”, nispa (Mateo 6:34).

ALLIN IMASPI YUYANA. Biblia niwanchej: “Kʼacha sonqo kayqa runaj cuerpompaj kawsayta apamun”, nispa (Proverbios 14:30). Chantá nillantaj: “Sonqo kusisqa kayqa uj sumaj jampi”, nispa (Proverbios 17:22). Doctorespis chayllatataj ninku. Escocia suyumanta uj doctor nin: “Kusisqa runasqa mana anchata onqonkuchu, llakisqalla kajkunarí astawan onqonku”, nispa.

ONQOYTA ATIPANA. Luismanta parlanchejña. Ashkhas pay jinallataj niña sanoyapunkuchu. Kikin llakiypi kaspa, sapa ujmanta kashan imatachus ruwananchej. Wakenqa onqoykuspa anchata llakikunku, chaytaj ni imapi yanapanchu. Biblia nin: ‘Llakiypi rikhurispa llauchʼiyawaj chayqa, kallpayki pisiyanqa’, nispa (Proverbios 24:10).

Wakin runastajrí onqoykuspapis, mana llakiyninkuwan atipachikunkuchu. Paykunaqa onqoyninkuman yachaykakapunku, ñaupajman rinankupajtaj kallpachakunku. Luisqa chayta ruwarqa. Payqa Diosmanta mana saykʼuspa mañakorqa, Bibliaj nisqanpitaj tʼukurerqa. Llakisqalla kananmantaqa, imastachus ruwayta atisqanpi tʼukurerqa. Chantapis wajkuna jinallataj, runasmanta astawan khuyakoj. Chayrayku runasta Bibliawan sonqocharej.

Steve sutiyoj runapis, llakiypi rikhurerqa. Payqa 15 watasniyoj kashaspa uj sachʼamanta urmaykorqa. Nitaj chakisninta, makisnintapis kuyuchiyta aterqañachu. Jinapis 18 watasniyoj kashajtin, makisninta kuyuchiyta aterqaña, universidadmanpis rerqa. Chaypeqa drogakoj, machakoj, khuchichakojtaj. Manapuni allintachu kausasharqa. Chayllapi Bibliata estudiayta qallarerqa, viciosnintapis qonqarqa. Pay nin: “Niña llakikunichu, astawanpis kusisqa, sonqo juntʼasqataj kausakuni”, nispa.

Luispa, Stevej kausayninpis, Salmo 19:7, 8 nisqan cheqa kasqanta rikuchiwanchej. Chaypi nin: “Diospa yachachisqanqa mana pantayniyoj; watejmanta runata allin kawsayman churan. [...] Tata Diospa kamachisqasnenqa cheqampuni, sonqotataj kusichin. Tata Diospa kamachisqanqa chʼuwa, ñawimantaj kʼanchayta qon”, nispa.