ÑAUPAJ yachaqanaspeqa yachakorqanchej jatun llakiypi rikukuspaqa manaña kausayta munasqanchejta. Ichá qan manchay llakiypi kashanki, chayraykutaj niña kausayta munankichu, chayri yuyanki ni pí qanmanta llakikusqanta. Jinapis ama qonqanachu Diosninchejqa ñakʼarejtinchej mayta noqanchejmanta llakikusqanta. Chayrayku qantaqa mayta munakusunki.

Kay 86 Salmota qhelqajqa Jehová Diospi atienekusqanrayku jinata nerqa: “Llakiyniypeqa qanman qhaparikusqayki, imaraykuchus qan uyariwanki”, nispa (Salmo 86:7). Ichá qanqa piensarishanki: “¿Imaynatá Dios uyariwasunmanri?”, nispa.

Dios llakiykunasniykita mana chay rato chinkachejtinpis, aguantanaykipaj yanapasonqa. Payqa Bibliapi niwanchej: “Ama imamantapis phutikuychejchu, astawanqa Diosmanta mañakuspaqa, imatachus munasqaykichejta mañakuychej, tukuy imamanta graciasta qospallapuni. Chantá Diosqa chay mana unanchay atina sonqo tiyaykuyninta sonqosniykichejman churanqa, chaytaj sonqoykichejta, yuyayniykichejtawan waqaychanqa”, nispa (Filipenses 4:6, 7). Bibliamanta wakin versiculosta qhawarina, reparasuntaj Diosqa noqanchejmanta mayta llakikusqanta.

Bibliaqa nin: “Diostajrí mana uj pʼisqetullamantapis qonqapunchu. [...] Qankunaqa ashkha pʼisqetusmantapis astawanraj valenkichej”, nispa (Lucas 12:6, 7).

KAYPI TʼUKURIY. Diosqa pʼisqetusta juchʼuysitus kajtinkupis valorniyojpaj qhawan. Runastarí kay jallpʼapi ruwasqasninmanta aswan valorniyojpajraj qhawan. Imaraykuchus runasqa rijchʼayninman jina ruwasqa kashanchej, pay jinataj kʼachas kayta atinchej (Génesis 1:26, 27).

“Tata Dios, qanmin allinta qhawaykuwanki, rejsiwankitaj. [...] Yuyasqaytaqa karumantapacha qan yachanki. [...] Tukuy yuyasqaytataj allinta yachaway” (Salmo 139:1, 2, 23).

KAYPI TʼUKURIY. Jehová Diosqa sumajta rejsisusqanrayku yachan imamantachus llakikushasqaykita. Ichá runasqa llakiyniykita mana entiendenkuchu, Diostajrí qanmanta llakikun, yanapasuytataj munan. Chayrayku kusisqa kausakuyta atiwaj.

“Tata Dios, mañakusqasuyta uyariway. Tata Dios, saqellay qanman qhaparikusqay chayamunanta. [...] Uyarillaway ari; wajyakusojteyqa, usqhayllata kutichiway”. Jehová Diosqa “mana piniyojpa mañakusqanta uyarin; chay mañakusqantapis mana qhesachanchu” (Salmo 102:1, 2, 17).

KAYPI TʼUKURIY. Jehová Diosqa yachan sapa runa mashkhatachus ñakʼarisqanrayku waqasqanta (Salmo 56:8). Qan mashkha kutitachus waqasqaykitapis yachallantaj. Payqa mayta munakususqanrayku yachan ima llakiykunapichus rikukusqaykita.

“Ama sonqoyki qʼenaqakuchunchu, imaraykuchus noqaqa Diosniyki kani. Noqa kallpachasqayki, yanapallasqaykitaj. [...] Ama manchachikuychu; noqa yanapasqayki” (Isaías 41:10, 13).

KAYPI TʼUKURIY. Diosqa yanapasunanpaj wakichisqa kashan. Pantajtiykipis pay yanapasonqa.

“Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj” (Juan 3:16).

KAYPI TʼUKURIY. Diosqa mayta munakususqanrayku Wawanta kay jallpʼaman kachamorqa, qanrayku wañunanpaj. Jesús wañusqanrayku uj suyakuyniyoj kanchej, wiñaypajtaj kusisqa kausakuyta atinchej. *