Llakiykuna kananpaj mana Dioschu juchayoj chay, ¿pitaj juchayoj? ¿Imaraykú may chhika runas yarqhaymanta wañushanku? ¿Imaraykutaj wajchayay, guerras, onqoykuna, jatuchaj llakiykuna ima tiyan? Bibliaqa kinsa imasrayku sufrisqanchejta nin.

1. Runasqa paykunallapi yuyanku, imatapis paykunallapaj munanku, wajkunatataj chejnikunku. “Runaqa runa masinta chakisnin uraman churan paypa mana allinnillampaj” (Eclesiastés 8:9). Ashkha runasqa ñakʼarinku, runa masillankutaj ñakʼarichisqankurayku.

2. Mana suyashajtillanchej, ima llakiypis chayamuwasunman. Biblia nin: “Runaqa imachus payman jamunanta mana yachanchu”, llakiykunaqa “kaymanta jinalla patanman urmaykun”, nispa (Eclesiastés 9:12). Ni mayqenninchej yachanchejchu ima ratochus, maypitajchus accidentakunanchejta. Wakin kutistaj, mana yuyaychakuspalla imatapis ruwasqanchejrayku chayri pantasqanchejrayku, ima llakiypipis rikhurisunman.

3. Kay mundota Supay kamachishan. Bibliaqa sutʼita niwanchej, “mundontinmanta runastaj Kuraj Supaypa makinpi kasqankuta” (1 Juan 5:19). Supayqa qallariypi uj kʼacha ángel kaspapis, mana “cheqa kajpi sinchʼita sayarqachu” (Juan 8:44). Waj angelespis sajra munayninkuta ruwayta munasqankurayku, Satanasman ujchaykukorqanku. Ajinapi supaykunaman tukorqanku (Génesis 6:1-5). Diospa contranta oqharikusqankumantapacha, Supaywan sajra angelesninwanqa runasta imaymanamanta ñakʼarichishanku. Chaytaj kay tiempopi astawan rikukushan. Supayqa phiñasqa kasqanrayku, “jallpʼapi kaj tukuy runasta pantachishan”. Chayrayku Biblia nin: “Ay jallpʼamanta”, nispa (Apocalipsis 12:9, 12). Satanasqa manchay sajra, runasta sufrichispa kusikun. Pay juchayoj llakiykuna kananpaj, manataj Diosninchejchu.

TʼUKURINA: Sajra Supaylla, kʼacha runasta ñakʼarichin. Diosninchejqa ni jaykʼaj chayta ruwanmanchu. Imajtinchus Biblia nin: “Diosqa munakuymin”, nispa (1 Juan 4:8). Chayrayku ni yuyanallapischu, “Tukuy Atiyniyoj Diosqa ima sajratapis ruwasqanta” (Job 34:10).

Jinapis ichá ninki: “¿Maykʼajtaj Diosninchej Supayta chinkachenqari?”, nispa. Yachakunchej jina, Jehová Diosninchejqa sajra kajta chejnikun. Llakikojtinchejtaj paypis llakikullantaj. Biblia niwanchej: “Tukuy phutiyniykichejta Diospa makinman saqeychej, imaraykuchus payqa qankunamanta llakikun”, nispa (1 Pedro 5:7). Diosninchejqa mayta munakuwanchej, atiyniyojtaj tukuy llakiykunata chinkachinanpaj. Chaymanta qhepan yachaqana parlashan. *