¿Maykʼajllapis onqoykorqankichu? Ichá usqhayllata sanoyapusqaykirayku qonqapunkiña. Chaywanpis pillapis wañupojtenqa llakisqallapuni kanchej. Doctor Alan Wolfelt libronpi jinata nin: “Llakeyqa kallanqapuni. [...] Tiempo pasasqanman jina, wajkunaj yanapayninwantaj llakeyqa pisiyanqa”, nispa.

Abraham, warmin Sara wañupojtin imaynachus sientekusqanta qhawarina. Biblia nisqanman jina Abrahamqa llakisqa kasharqa, maytataj waqarqa. Chaytaj rikuchin may unaypiraj sonqochasqa kasqanta. * Jacobpis, José wawanta uj sajra animal wañuchisqanta nejtinku mayta waqallarqataj. Jacobqa unayta llakisqa kasharqa, ni familianpis sonqochayta aterqachu. Ashkha watasninmanpis Josemanta llakisqallapuni kasharqa (Génesis 23:2; 37:34, 35; 42:36; 45:28).

Kay tiempopipis familianchejmanta pillapis chayri uj amigonchej wañupojtin llakikullanchejtaj. Chaymanta wakin runaspa nisqankuta qhawarina.

• “Qosay Robertqa kay 9 de julio de 2008 watapi accidentakuspa wañuporqa. Chay paqarenqa imaynatachus sapa paqarin ripoj, jinallatataj riporqa. Desayunaytawantaj muchʼaykuwaspa, abrazaykuwaspa, ‘munakuyki’ niwaspa ima riporqa. Chaymanta sojta watasña pasajtinpis, Robert wañupusqanmanta llakikullanipuni. Maykʼajkamachus llakikunayta mana yachanichu” (Gail, 60 watayoj).

• “Warmisitay wañupusqanmanta 18 watasña pasajtinpis faltachallanipuni llakikullanipunitaj. Kʼacha imasta rikuspataj paymanta yuyarikuni. Tʼukurinitaj chayta qhawaspa paypis kusirikunanpi” (Etienne, 84 watayoj).

Pillapis wañupusqanmanta unayta llakikoyqa mana juchachu. Wakenqa anchata llakikunchej, wakinrí mana. Chayrayku mana allinchu kanman pitapis chaymanta qhawarananchej. Nillataj llakiyninchejta rikuchinamanta pʼenqakunachu. ¿Imataj yanapawasunman mana anchata llakikunapaj?