Hermanóy Winston, ¿imaynatá Diosta maskʼarqanki?

Noqaqa campopi wiñakorqani, Australia suyoj Queensland japʼiyninpi. Familiayqa mana iglesiaman rejchu kanku. Campopi tiyakusqayrayku, mana waj runasta anchata rejserqanichu. Noqaqa 12 watasniymantapacha Diosta maskʼarqani. Orakorqani payta rejsinaypaj yanaparinawanta. Aswan qhepaman, campomanta Adelaida llajtaman trabajakoj riporqani. Chay llajtaqa Australiaj ura kantunpi kashan. 21 watasniyoj kashajtiy, Sydney llajtaman paseaj rerqani. Chaypi señoray Pamelawan rejsinakorqani. Payqa israelismo británico nisqa religionmanta parlariwarqa. Chay iglesiapi kajkunaqa ninku, Gran Bretañamanta runas, Israelpa chinkasqa ayllusninmanta mirasqankuta. Chay ayllusqa Israelpa pata ladomanta chunka ayllusnin kasqanta ninku. Paykunaqa 740 watapi Jesús niraj jamushajtin, waj nacionman presos apasqa karqanku. Adelaida llajtaman kutipusqaytawan, trabajoymanta compañeroywan chaymanta parlarerqayku. Payqa Jehovaj testigosninwan Bibliata estudiashasqanta niwarqa. Imaspichus paykuna creesqankumanta unaysituta parlariytawan, repararqani Diosmanta, Gobiernonmantawan cheqanta yachachisqankuta. Chay jinamanta “may valorniyoj perlata” tarerqani. Ajinapi Diosqa wawa kashajtiy orakusqayman kutichimuwarqa (Mat. 13:45, 46).

Ñañáy Pamela, qanpis wawamantapacha Diosta maskʼarqanki. ¿Imaynapí tarerqanki?

Noqaqa Diospi creej familiapi wiñakorqani, Coffs Harbour nisqa llajtapi, Nueva Gales del Surpa japʼiyninpi. Tatasniy, awelitosniypis, israelismo británico nisqa religionniyoj karqanku. Paykunaqa creej kanku, britanicosmanta mirajkuna Diospa  ajllasqa nacionnin kasqankuta. Ajinata yachachiwarqayku noqaman, sullkʼa hermanoyman, kuraj hermanayman, primosniyman ima. Jinapis sonqoy ukhupeqa, mana chaypi creerqanichu, nitaj Diosman qayllaspa jinarqanichu. 14 watasniyoj kashajtiy ashkha iglesiasman rerqani. Rerqani iglesia anglicanaman, bautistasman, adventistasman ima. Jinapis ni mayqenninku Diosta rejsinaypaj yanapawarqankuchu.

Aswan qhepaman, familiaywan Sydney llajtaman tiyakoj riporqayku. Chaypi Winstonta rejserqani, paseakoj jamusqanrayku. Pay nin jina, iglesiaymanta parlarisqaykurayku, Jehovaj testigosninwan Biblia estudiayta qallarisqa. Sapa kuti cartasta apachimuwaj. Cartasnenqa Bibliamanta textoswan juntʼa kaj. Ajinata apachimuwasqanmanta llakikorqani, ratostaj rabiakoj kani. Jinapis pisimanta pisi Diosmanta cheqata parlasqanta repararqani.

Ajinapi 1962 watapi, Winstonniywan kanaypaj Adelaidaman riporqani. Payqa uj qhariwarmi testigoswan parlasqa, paykunawan tiyakunaypaj. Hermanoqa Thomas Sloman sutikorqa, señorantaj Janice. Paykunaqa ñaupajta Papúa Nueva Guinea suyupi misioneros kasqanku. Chay tiempopi noqaqa 18 watasniyojllaraj karqani. Chay hermanosqa manchay kʼachas karqanku, Diosman qayllaykunaypajtaj yanapawarqanku. Ajinapi Bibliata estudiayta qallarerqani, Diostataj rejserqani. Chantá Winstonwan casarakorqayku. Chaymantapachataj Diospaj tiempo juntʼasqata llankʼayta qallarerqayku. Llakiykuna kajtinpis, Jehovata sirvispaqa ashkha bendicionesta japʼiyku. Chaytaj Diosta rejsisqaykuta may valorniyoj perlata jina qhawanaykupaj yanapawayku.

Hermanóy Winston, Jehová Diosta sirviyta qallarisqaykimanta willariwayku.

Casarakusqaykutawan, Jehová Diosqa paypaj astawan llankʼanaykupaj “uj jatun” punkuta jina kicharipuwarqayku (1 Cor. 16:9). Chaytataj hermano Jack Porter rikuchiwarqayku. Kunanqa hermano Jackwan khuska llankʼashayku, Australasia sucursalpa comitenpi. Payqa señoran Roslynwan congregacionesta waturej kanku, juchʼuy congregacionniykutapis. Paywan señoranwanqa, precursores kanaykupaj kallpachawarqayku. Phishqa watasta precursores kasqaykutawan, congregacionesta waturinaykuta niwarqayku. Chaypachaqa 29 watasniyoj kasharqani. Kamachisqa karqayku Pacífico sur nisqa marpi churitusta visitanaykupaj. Chay churitusqa karqanku: Kiribati, Nauru, Niue, Samoa, Samoa Norteamericana, Tokelau, Tonga, Tuvalu, Vanuatu ima. Chay lugaresqa Fiyi suyoj sucursalpa cargonpi karqanku.

Chay wataspi, wakin churitusmanta runasqa, Jehovaj testigosninta manchachikoj kanku. Chayrayku sumaj yuyaywan imatapis ruwanayku karqa (Mat. 10:16). Congregacionesqa juchʼuysituslla karqanku. Wakin lugarespitaj hermanosqa mana alojayta atiwajchu kayku. Chayrayku waj runasta alojarinawaykuta nikoj kayku. Chay lugaresmanta runasqa, manchay kʼachas kaj kanku.

Hermanóy Winston, qanqa mayta munanki publicaciones waj parlaykunapiwan kananta, chaypajtaj tukuy atisqaykita yanapakunki. Chaymanta parlariwayku.

Tonga suyupi kashajtiyku, tongano parlaypi pisi publicacioneslla karqa. Hermanosqa runasman Bibliamanta yachachej kanku, inglés parlaypi La verdad que lleva a vida eterna nisqa librowan. Uj pacha, tawa semanasta ancianospaj escuela ruwakushajtin, kinsa ancianos chay librota tongano parlayman thallinankuta nerqanku. Chay ancianosqa inglesta tumpallata yacharqanku. Tukusqankutawan warmiyñataj máquina de escribirpi ruwarqa. Chantá Estados Unidos sucursalman imprimikunanpaj apacherqayku. Chay librota iskay killaspi ruwayta tukorqayku. Mana sumaj chʼuwitachu kajtinpis, ashkha runasta Diosmanta parlayninkupi yachakunankupaj yanaparqa. Señoraywan noqawanqa, mana traductoreschu kayku. Jinapis chay kutimantapacha, mayta munayku publicaciones waj parlaykunapi llojsinanta.

Ñañáy Pamela, ¿churuspi kausakuy Australiapi kausakuywan kikinchu karqa?

Mana. Wakin churitusqa chʼuspimanta juntʼa kaj, jukʼuchaspis, onqoykunapis jinantin kaj.  Wakin lugaresqa, manchay qʼoñi kaj, jumpʼi suruyllata purej kayku, mikhunapis pisi kaj. Jinapis tardeyaykuytaqa, mana perqasniyoj, ichhu techoyoj chʼujllitaykupi samarikoj kayku. Samoano parlaypeqa fale nispa sutichanku. Chay chʼujllitamanta mama qochata qhawaj kayku. Killa pʼunchaypeqa palmera sachʼas sinrulla rikukoj, killapis yakupi kʼancharej. Manchay kʼachitupuni karqa. Chaykunata qhawaspa tʼukoj kayku, Diosmantaj agradecekoj kayku. Chaytaj kusisqallapuni kanaykupaj yanapawarqayku.

Wawitastaqa mayta munakoj kayku. Paykunaqa asichiwaj kayku. Yuraj runasta mana rikusqankurayku, noqayku qhawarisqalla kaj kanku. Uj pacha, Niue churituta visitasharqayku. Chaypi uj lloqallitu qosaypa makisninta llankharispa nerqa: “Phurusniyki kʼachitoqa”. Chay lloqallitoqa ni jaykʼaj pelorara makista rikusqachu.

Chay churitus manchay kʼachitus kajtinpis, runasqa pobres karqanku. Mana hospitales kajchu, tomanapaj yakupis pisi kaj. Chayta rikuspa sonqoykuta nanachikoj kayku. Jinapis hermanosninchejqa kusisqalla kausakoj kanku. Paykunaqa familiankuwan kaspa, Jehovata uj wasipi yupaychaspa, payta sirviyta atispa ima, sonqo juntʼasqa karqanku. Chay hermanosmanta yachakorqayku, pisillawan sonqo juntʼasqa kayta. Chaytaj Jehová Diospaj llankʼanallaykupajpuni yanapawarqayku.

Ñañáy Pamela, wakin kuteqa mana yakuta tarillajchu kanki, waj jinasmantataj waykʼunayki karqa. ¿Chay imasta ruwayta atillajchu kanki?

Arí atillarqani. Papasoyqa ninata japʼichiyta, chhaqata ruwayta, pisi imasllawan kausakuyta ima yachachiwarqa. Chaymanta mayta agradecekuni. Uj kuti, Kiribati churituta visitashajtiyku, ichhu techoyoj chʼujllitapi qhepakorqayku. Chay chʼujllaqa takwara perqasniyoj karqa, pisontaj coral nisqa khuroj tullusninmanta ruwasqa karqa. Waykʼukunaypajqa pampapi uj juskʼuta ruwarqani, coco frutaj qaritanwantaj ninata enqharqani. Yakuta tarinaypajqa, uj pujyuman rerqani. Chaypitaj wakin warmis yakuta orqhonankupaj filakushasqanku, noqapis filakullarqanitaj. Chay pozo ukhu kasqanrayku, warmisqa pescadota japʼinapaj jina kʼaspita choqasharqanku. Chay kʼaspeqa casi 2 metrosniyoj karqa, puntanpitaj uj latita churasqa karqa. Sapa warmi kʼaspita choqaykuytawan yakuta orqhomojpacha. Chayta rikuspa, noqapis “atillasaj” nerqani, tocawajtintaj ni aterqanichu. Kʼaspita sapa choqajtiy, latitaqa tuytullaj. Chay warmistaj asiymanta wañurisharqanku. Chantá paykunamanta ujninku yanapariwarqa. Churitusmanta runasqa, kʼachas karqanku, yanapawajtaj kayku.

Chay churituspi may kusisqapuni karqankichej. ¿Uj experienciata willariwaykumanchu?

Winston: Chay churuspi imaynatachus kausakusqankutaqa, mana chay ratochu entienderqayku. Hermanosqa tukuy mikhunitankuta jaywawaj kayku. Noqaykutaj tukuysitunta mikhukapoj kayku. Mana yacharqaykuchu paykunapaj puchurichipunayku kasqanta. Yachaspañaqa paykunapaj puchurichipoj kayku. Ajinata pantajtiykupis, hermanosqa mayta pacienciakuwarqayku. Sojta killasmanta jina visitajtiykupis, sapa chayajtiyku mayta kusikoj kanku. Chay wataspeqa, mana waj lugaresmanta hermanosta rejsejchu kanku, noqallayku waj llajtayoj karqayku.

Chay churusmanta hermanosta visitasqaykoqa, lugarninkumanta runaspaj sumajpuni karqa. Chay runasqa piensaj kanku, hermanosnillanchej religionninkuta rikhurichisqankuta. Chayrayku paykunata waj suyumanta hermanos visitasqankuta rikuspaqa, tʼukoj kanku. Reparajtaj kanku religionninchejqa mundontinpi kasqanta.

Pamela: Kiribati churitupi uj juchʼuy congregación karqa. Chay congregacionpi, Itinikai Matera nisqa hermanolla anciano karqa. Payqa tukuy atisqanta ruwaj sumajta atiendenawaykupaj. Uj kutipi, hermanoqa uj canastita aysarisqa chayamuwarqayku. Chaypeqa uj wallpa runtituta apamusqa, “kaysitu qankunapaj” nispataj jaywawarqayku. Unayña wallpa runtuta mana mikhorqaykuchu. Chayrayku hermanonchej chay runtituta qoriwasqaykumanta casipuni waqarikorqayku. Kunankama chaymanta yuyarikuni.

 Ñañáy Pamela, wawitayki niraj nacekushaspa wañupusqanta willariwarqayku. ¿Imataj yanapasorqa ñaupajman rinallaykipajpuni?

1973 watapi Pacífico sur nisqapi churitusta visitashajtiyku, onqoj rikhurerqani. Australiamantaj kutiporqayku. Tawa killasninmantaj wawitayqa wijsaypi wañuporqa. Iskayniyku sonqo pʼakisqas kasharqayku. Tiempowan sonqoy tiyaykurerqa. Chaywanpis manapuni wawitayta qonqayta aterqanichu. Pasaj wataspi 15 de abril de 2009 watamanta Torremanta Qhawaj revista llojserqa. Chaypi “Ñawiriqkunapta tapuyninku” nisqapi, “Wawita mamanpa wiksan ukhupi wañupuptin, ¿chay wawitata, Dios kawsarichimunqachu?” nispa nerqa. Chay yachaqanapi nisharqa, Jehová Dioslla chayta yachasqanta, paytaj cheqan kajtapuni ruwasqanta. Chantá nillarqataj Jehovaqa imaschus llakichiwasqanchejta chinkachinanta, Wawantataj kamachisqanta “Kuraj Supaypa ruwasqasninta tukuchinanpaj” (1 Juan 3:8). Chantapis chay yachaqanaqa, yanapawarqayku Jehová Diosta sirviyta astawan jatunpaj qhawanaykupaj. Ashkha llakiykunayoj kaspapis, Diospa Gobiernon sumaj kausayta apamunanta yachaspa sonqochakuyku.

Wawitayku wañupusqantawan, watejmanta Diospaj tiempo juntʼasqata llankʼarqayku. Australia suyumanta Betelpi wakin killasta yanapakuytawan, watejmanta congregacionesta waturispa karqayku. Nueva Gales del Sur nisqaj camposninpi, Sydney llajtapi ima, tawa watasta congregacionesta waturerqayku. Chantá 1981 watapi, Australia sucursalpi yanapakunaykupaj wajyariwarqayku. Kunankamataj chaypi kashayku, chay sucursal waj sutiyojña kajtinpis.

Hermanóy Winston, kunanqa Australasia sucursalpa comitenpi kashanki. Pacífico sur nisqa lugarespi purisqayki, ¿yanapasunkichu?

Arí, mayta yanapashawan. Unayqa Australia sucursalqa, Samoa suyumanta, Samoa Norteamericanamantawan encargakoj. Chaymanta Nueva Zelanda sucursalqa, Australia sucursalwan ujchakorqa. Ajinamanta Australasia sucursal rikhurerqa. Kunantaj Australasia sucursalqa atienden: Australiata, Cook nisqa churusta, Niueta, Nueva Zelandata, Samoata, Samoa Norteamericanata, Timor Orientalta, Tokelauta, Tongata ima. Chay lugaresmanta ashkhasta waturerqani, sucursalmanta kachawasqankurayku. Chay churusmanta hermanoswan khuska Diospaj llankʼasqayqa, mayta yanapawan Betelmantapacha paykunata yanapanaypaj.

Señoraywan kausayniykupi rikusqaykuman jina, mana kuraj runasllachu Diosta maskʼanku, manaqa jovenespis. Paykunapis “may valorniyoj perlata” tariyta munallankutaj. Jovenesqa Diosta rejsiyta munanku, familiasninku Diosmanta mana yachayta munajtinkupis (2 Rey. 5:2, 3; 2 Cró. 34:1-3). Tatanchej Jehovaqa munakuyniyoj Diospuni. Payqa munan tukuy runas salvakunankuta, jovenespis, kurajkunapis.

Señoraywan noqawan Diosta maskʼasqaykumantapacha, 50 watasmanta astawanña pasan. Chaypachaqa mana yacharqaykuchu, Diosta maskʼasqayku imayna kausaymanchus pusanawaykuta. Diospa Gobiernonmanta cheqa kajta yachakusqaykoqa, “may valorniyoj” perla jina. Chaytataj ni imarayku chinkachiyta munaykuchu.