”Testigosqa mana runasllawanchu kʼachas kaj kanku, manaqa alqetusniywanpis. Uj kuti Elaine sutiyoj señora carritowan kasharqa, paytaj iskaynin alqetusniyman galletitasta qorerqa. Chaymantapacha alqetusneyqa chaynejta rejtiy galletitasman aysawajpacha kanku.

”Killasqa pasashallarqapuni. Alqetusneyqa galletitasman cebaykukorqanku, noqataj testigoswan tumpata parlarispa kusisqa kasharqani. Jinapis mana anchata paykunawan parlayta munajchu kani. Noqaqa 70 watas kurajniyojña karqani. Nitaj sumajta yacharqanichu imaspichus testigos creesqankuta. Noqaqa ashkha iglesiaspi mana allin imasta ruwasqankuta rikusqayrayku, niña mayqen iglesiamanpis riyta munajchu kani. Yuyajtaj kani noqalla Bibliata wasiypi estudianay kasqanta.

”Chay tiempopeqa ashkha lugarespiña testigosta carritosninkutawan rikoj kani. Paykunapis kʼachasllataj kaj kanku. Imata tapojtiypis Bibliawanpuni kutichiwaj kanku. Chayrayku paykuna imatachus niwasqankupi astawan confiarqani.

”Uj kuti Elaine tapuriwarqa: ‘¿Creenkichu animalitosta Dios ruwapuwasqanchejta?’, nispa. Noqataj ‘arí’ nerqani. Chaymantataj Isaías 11:6-9 versiculosta leeripuwarqa. Chaymantapacha astawan Bibliamanta yachakuyta munarqani. Jinapis manaraj ni mayqen publicacionta apakuyta munarqanichu.

”Qhepan diasnintaj Elainewan qosan Brentwan ima pisillata Bibliamanta parlarejtiykupis, paykunaqa sumajta Bibliamanta sutʼinchariwarqanku. Niwarqankutaj Mateomanta Hechos librokama leerinayta imaynatachus Cristota qhatina kasqanta yachanaypaj. Chaytapunitaj ruwarqani. Pisi tiemponmantaj Brentwan Elainewan Bibliata estudiayta qallarerqani. Chaytaj karqa 2016 wata khuskannejta.

”Sapa semana mayta kusikoj kani Bibliata estudiaspa, reunionesman rispataj. Maytapuni kusikorqani, agradecekorqanitaj imatachus Biblia yachachisqanta yachakuspa. Estudiayta qallarisqaymanta wata kurajninman jinataj bautizakorqani. Kunanqa 79 watasniyojña kani. Cheqa religionpipunitaj kashani. Jehová llajtanman pusamuwasqanqa uj jatun bendición”.