LLAKEYQA uj llasa qʼepi jina ñitʼiykuwasunman (Pro. 12:25). Ichá maykʼajllapis mayta llakikorqanchej. Ajina llakiypi kaspaqa niña aguantayta atisqanchejta yuyasunman. Jinapis mana noqallanchejchu ajina llakisqa, saykʼusqa kashanchej. Imajtinchus ashkhasqa onqosqa familianchejta cuidashanchej. Wakintaj llakiypi rikukorqanchej ujnin familiarninchej wañupusqanrayku chayrí tiyakunchej chaynejpi uj desastre kasqanrayku, manachayrí waj llakiykuna kasqanrayku. ¿Imataj yanapawasunman mana llakiywan atipachikunapaj? a

Rey Davidmantaqa mayta yachakusunman mana llakiywan atipachikunapaj. Davidqa ashkha llakiykunapi rikukorqa, paytaqa wañuchiyta ima munarqanku (1 Sam. 17:34, 35; 18:10, 11). ¿Imatá ruwarqa David mana llakiywan atipachikunanpaj? ¿Imatá paymanta yachakusunman?

Davidqa ujllapi ashkha problemaspi rikukorqa. Rey Saulqa payta wañuchiyta munarqa, paymantataj ayqekusharqa. Chay kutipeqa, Davidwan paywan kaj runaswan maqanakumanta kutipunankupaj, amalequitas tukuy imankuta suwaykusqanku, wasisninkuta ruphaykuchisqanku, familiasninkutapis apakapusqanku. Chayta rikuspa, ¿imatá ruwarqa David? Davidwan paywan kaj runaswanqa “sonqo nanayta waqarqanku. Manaña atinankukama waqarqanku”. Chantá pay confiasqan runaspis ‘rumiswan chʼanqaykuyta munarqanku’ (1 Sam. 30:1-6). Ajinamanta Davidqa ujllapi kinsa jatuchaj problemaspi rikhurerqa. Arí, paypa familianta apakaporqanku, paywan kaj runas wañuchiyta munarqanku, rey Saultaj payta qhatiykachasharqa. Davidqa sinchʼi llakisqapunichá kasharqa.

Ajinapi kashaspa, ¿imatá pay ruwarqa? Usqhayllata “Jehová Diosninpi atienekuspa kallpachakorqa”. Yachanchej jina Davidqa orakojpuni Jehovamanta yanapata mañakunanpaj, piensarejtaj imaynatachus pay ñaupajta yanapasqanpi (1 Sam. 17:37; Sal. 18:2, 6). Davidqa reparallarqataj Diospa yanapayninta necesitasqanta. Ajinamanta payqa Jehovata tapurikorqa imatachus ruwananta yachananpaj. Jehová imatachus ruwananta nejtinkamataj, chayman jina usqhayllata ruwarqa. Chayrayku Jehovaqa Davidta, paywan kaj runasta ima bendicerqa. Paykunaqa amalequitasmanta tukuy imankuta qhechukanporqanku, familiasninkutapis pusakanporqanku (1 Sam. 30:7-9, 18, 19). Reparanchej jina Davidqa kinsa imasta ruwarqa. Ñaupajtaqa Jehovamanta yanapata mañakunanpaj orakorqa. Chantá imaynatachus Jehová ñaupajta yanapasqanpi tʼukurerqa, imatachus Jehová nisqanman jinataj ruwarqa. Davidmantaqa yachakunchej kinsa imasta ruwananchej kasqanta.

1. Orakuna. Llakikuyta qallarishanchej chayqa, Jehovamanta yanapata mañakusunman imatachus ruwananchejta yachanapaj. Jehovawan unayta parlarispa, imaschus llakichishawasqanchejta willakuspa ima manaña anchata llakikusunchu. Mana paywan unayta parlariyta atispatajrí, uj ratito sonqollanchejpi mañarikusunman. Sapa kuti Jehovamanta yanapata mañakuspaqa, David jina paypi confiasqanchejta rikuchishanchej. David nerqa: “Jehová Diosmin pakakunay chhanka, paymin jarkʼachasqa lugarniy,  paymin salvawajniy. Diosneyqa pakakunay chhanka, paypi noqaqa pakakuni”, nispa (Sal. 18:2). ¿Imaynatá Diosmanta mañakuy yanapawanchej? Uj precursora Kahlia sutiyoj nin: “Orakusqaytawanqa sonqoy tiyaykun. Orakoyqa Jehová jina yuyanaypaj yanapawan, paypitaj astawan atienekunaypaj”, nispa. Arí, Jehovaqa oracionta uj sumaj regalota jina qowanchej, chaytaj mana llakiywan atipachikunapaj yanapawanchej.

2. Tʼukurina. Ichapis yuyarikunchej aswan ñaupajta, Jehovaj yanapaynillanwan llakiykunasninchejta aguantayta atisqanchejmanta. Jehovaqa ñaupa tiempomanta kamachisninta yanaparqa, noqanchejtapis yanapallawarqanchejtaj. Chaypi tʼukurispaqa astawan paypi atienekunchej, sonqonchejpis tiyaykun (Sal. 18:17-19). Joshua sutiyoj anciano nin: “Uj lista tiyapuwan ima kutispichus Jehová mañakusqayta uyariwasqanmanta. Ajinamanta chay listata qhawarispa yuyarikuni imatachus mañakusqayta Jehová qowasqantapuni”, nispa. Arí, ñaupajpi mashkha kutistachus Jehová yanapawasqanchejpi tʼukurispaqa, watejmanta kallpachasqa kanchej mana llakiyninchejwan atipachikunapaj.

3. Jehová nisqanman jina ruwana. Uj llakiypi kashaspa niraj imata ruwashaspapis, yanapachikunapaj Diospa Palabranpi yuyaychayta maskʼana (Sal. 19:7, 11). Ashkhasqa uj versiculota sumajta ukhuncharinku. Ajinamantataj aswan allinta entiendenku imaynatachus chay versículo kausayninkupi yanapananta. Jarrod sutiyoj anciano nin: “Uj versiculota sumajta ukhuncharispaqa, ashkha imasta yachakuni. Ajinamanta sumajta entiendeni imatachus Jehová nishawasqanta. Palabrasnenqa sonqoyman chayan, payta kusichinaypaj jinataj imatapis ruwanaypaj kallpachakuni”, nispa. Bibliapi Jehovaj yanapayninta maskʼaspa, kamachiykunasnintataj kasukuspaqa, aswan sumaj wakichisqa kanchej mana llakiywan atipachikunapaj.

Davidqa yacharqa mana llakiyninwan atipachikunanpaj Jehovaj yanapayninta necesitasqanta. Payqa Jehová yanapasqanmanta mayta agradecekusqanrayku nerqa: “Diospa atiyninwanqa perqa patatapis wasaykullayman”, nispa. Chantá nillarqataj: “Diosmin kallpata qowan”, nispa (Sal. 18:29, 32). Ichapis yuyasunman problemasninchejqa jatuchaj perqas jina kasqankuta. Jinapis Jehovaj yanapayninwanqa atipasun. Arí, Jehovamanta yanapata mañakojtinchej, imaynatachus yanapawasqanchejpi tʼukurejtinchej, paypa munasqanman jinataj ruwajtinchejqa, pay kallpata, yuyayta ima qowasun mana llakiywan atipachikunapaj.