ÑAUPA tiempomanta cristianosqa, mayta kallpachakorqanku “Diospa Gobiernonmanta sumaj” willaykunata tukuyman willanankupaj (Mat. 24:14). Wakin cristianosqa waj lugaresman viajarqanku. Apóstol Pablopis maypichus kunan tiempo Turquía kashan chay lugarman misionero jina predicaj rerqa. * Chay lugarman risqanmanta 2.000 watasninman jina, nisunman 2014 watapi, Turquía suyupi Jehovaj testigosnenqa uj jatun campañata ruwarqanku, ashkha runasman willanankupaj.

Turquiapeqa 79 millones jina tiyakunku, chaykunamantataj 2.800 runasmanta astawan Jehovaj testigosnin kanku, nisunman 28 mil runasmanta ujlla Jehovaj testigon kasqanta. Reparanchej jina, hermanosninchej pisilla kasqankurayku mana tukuyman predicayta aterqankuchu. Chayrayku uj campañata ruwarqanku pisi tiempollapi, ashkha runasman willanankupaj. Chay campañapi yanapakunankupaj, waj suyusmanta 550 hermanos Turquiaman rerqanku. Imaynachus chay campaña kasqanta qhawarina.

Ashkha lugarespi predicakorqa. Estambul llajtamanta hermanos, jinata nerqanku: “Runasqa tukuynejpi willajta rikuwasqaykurayku tapuriwaj kayku: ‘¿Jatun tantakuytachu ruwashankichej?’”, nispa. Izmir llajtamanta hermanos, jinata nerqanku: “Taxispa paradanpi trabajaj uj runa, uj ancianoman chimpaykorqa, tapurerqataj: ‘¿Imá kashanri? ¿Astawanchu Diosmanta willashankichej?’”, nispa. Arí, runasqa sutʼita repararqanku Jehovaj testigosnin uj campañata ruwashasqankuta.

Waj suyusmanta Turquiaman yanapakoj rejkunaqa, predicaspa mayta kusikorqanku. Dinamarca suyumanta hermano Steffen nerqa: “Ashkha runas Jehovamanta ni jaykʼaj uyarisqankuchu. Ajina runasmantaj sapa día predicarqani. May kusiypuni karqa Jehovaj sutinta rejsicheyqa”, nispa. Franciamanta Jean-David hermano nerqa: “Uj callellapi unayta predicaj kayku. May sumajpuni karqa. Runasqa mana Jehovaj testigosninta rejsisqankuchu. Casi tukuy wasispi sumajta parlarej kayku, uj videota rikuchej kayku, uj publicacionllatapis saqejpuni kayku”, nispa.

 Iskay semanasllapi 550 hermanosqa 60.000 publicacionesta runasman jaywarqanku. Ashkha lugaresmantaj chayarqanku.

Astawan sonqo kʼajaywan willarqanku. Chay campañaqa Turquiamanta hermanosta yanaparqa astawan Diospaj llankʼayta munanankupaj. Ashkhastaj precursores regulares kanankupi tʼukurerqanku. Chayrayku Turquiapi campaña tukukusqanmanta, watanpajqa 82 precursores yapakorqanku.

Chay campañaqa, waj suyumanta yanapakoj rejkunatapis mayta yanapallarqataj astawan sumajta willanankupaj. Alemaniamanta uj hermana Şirin sutiyoj nerqa: “Noqaqa mana atillanichu mayllapipis predicayta. Turquiamanta hermanostajrí mayllapipis predicayta atillanku. Chayrayku chay campaña kashajtin hermanosmanta yachakorqani. Jehovaj yanapayninwantaj mayllapipis predicayta aterqani, manchachikuyniytapis atiparqani. Uj kuti trenpipis predicarqani”, nispa.

Alemaniamanta uj hermano Johannes sutiyoj nerqa: “Turquiamanta hermanosqa mayllapipis kashaspa, tukuy runasman predicaytapuni munanku. Alemaniaman kutispataj paykuna jinallataj ruwanayta nikorqani. Kunantaj tukuy runasmanpuni predicani”, nispa.

Francia suyumanta uj hermana Zeynep sutiyoj nerqa: “Chay campañaman yanapakoj risqayqa, mayta yanapawarqa Jehová Diospi astawan atienekunaypaj, niñataj manchachikunaypaj”, nispa.

Hermanosqa astawan ujchaykukorqanku. Tukuy suyumanta hermanos munanakusqanku, ujchasqa kasqanku ima, mana qonqanapaj jina karqa. Jean-David hermano nerqa: “Hermanosqa may kʼachas karqanku, wasinkumanpis wajyarikuwarqayku. Amigosninkuta jina, familiankumanta jinataj qhawawarqayku. Publicacionespi leej kani mundontinpi uj familia jina kasqanchejta. Jinapis chay kutipipuni repararqani, uj familiapuni kasqanchejta. Jehovaj testigon kasqaymanta mayta kusikuni. Jehovamantaj mayta agradecekuni llajtanman pusamuwasqanmanta”, nispa.

 Franciamanta uj hermana Claire sutiyoj nerqa: “Chay campañapi Alemaniamanta, Dinamarcamanta, Franciamanta, Turquiamantawan karqayku. Jinapis uj suyullamantapis kaykuman jina karqa”, nispa.

Franciamanta uj hermana Stéphanie sutiyoj nerqa: “Chay campañapi repararqayku Jehovata munakusqanchejrayku ujchasqa kasqanchejta, manataj kikin parlayta parlasqanchejraykullachu chayri kikin costumbresniyoj kasqanchejraykullachu”, nispa.

Chay campañaman waj suyusmanta rej hermanosqa, repararqanku Turquiapi mayraj ruwana kasqanta. Chayraykutaj Turquiaman astakunankupi tʼukurerqanku. Wakintaj Turquiapiña kashanku, sumajtataj yanapakushanku.

Uj lugarpeqa 25 hermanos karqanku, unaytataj chaypi uj ancianolla karqa. Jinapis 2015 watapi Alemaniamanta, Países Bajos suyumantawan sojta hermanos chay lugarman yanapakoj riporqanku. Chay lugarmanta hermanos may kusisqapunichá kasharqanku.

Turquiaman yanapakoj ripoj hermanospajqa, qallariypi mana facilchu karqa. Jinapis ashkha bendicionesta japʼerqanku. Qhawarina imastachus nisqankuta.

Hermano Federicoqa Españamanta, 40 watasniyoj jinataj. Payqa casado, nintaj: “Pisi imasniyojlla kasqaykurayku mayllamanpis ripuyta atillayku. Chantapis astawan Diospaj llankʼayta atiyku. [...] Tukuyman niyman, waj suyuman yanapakoj ripoyqa may sumajpuni kasqanta. Ajinata ruwaspataj Jehovaj makinpi churakushanchej. Reparanchejtaj Jehovaqa sumajta cuidawasqanchejta”, nispa.

Hermano Rudyqa Países Bajos suyumanta, 60 watasniyoj jinataj. Payqa casado, nintaj: “Ashkha runasqa Jehovamanta ni jaykʼaj yachakusqankuchu.  Paykunaman predicaspaqa maytapuni kusikuyku. Astawanraj kusikuyku Bibliamanta yachakushajtinku ñawisninku mutʼiyarejta rikuspa”, nispa.

Hermano Sascha sutiyojqa Alemaniamanta, 40 watasnintataj pasanña. Payqa casado, nintaj: “Predicacionpeqa tarillanipuni Jehovamanta ni jaykʼaj yachakojkunata. Paykunaman Jehovamanta yachachejtiyqa, sonqoy qhallallarin”, nispa.

Japonmanta uj hermana Atsuko sutiyoj, 35 watasniyoj jina, qosayojtaj. Pay nin: “Ñaupajtaqa mayta munaj kani Armagedón chayamunallantaña. Jinapis Turquiaman yanapakoj ripusqaymantapacha, Jehovaman mayta agradecekuni runaspaj pacienciakusqanmanta. Jehová imaynatachus llajtanta yanapashasqanta rikuspa, astawan payman qayllaykuyta munani”, nispa.

Hermana Alisaqa Rusiamanta, 30 watasnintataj pasanña. Pay nin: “Waj suyuman predicaj risqayqa, Jehová may kʼachapuni kasqanta reparanaypaj yanapawarqa”, nispa (Sal. 34:8). Chantá nillantaj: “Jehová tukuy imaymanamanta yanapawarqa. Chayrayku paytaqa mana Tatayta jinallachu qhawani, manaqa Amigoyta jinapuni. Kausayniypi maytapuni bendeciwarqa”, nispa.

Turquía suyupi kay campaña ruwakusqanrayku, hermanosqa Diospa Gobiernonmanta ashkha runasman willarqanku. Jinapis mayraj predicana kashan. Turquiaman ripoj hermanosqa tarillankupuni ni jaykʼaj Jehovamanta uyarej runasta. ¿Qanpis waj lugarman yanapakoj ripuyta munawajchu? Ajina kajtenqa, imatachus Juan 4:35 nisqanta yuyarikuy. Chay versiculopi Jesús nerqa: “Qhawariychej chajrasta, poqosqaña kashanku cosechanapaj”, nispa. Reparasqaykiman jina, ¿maypitaj astawan yanapata necesitakunman? ¿Chayman yanapakoj ripuyta munawajchu? Yanapakoj ripuyta munaspaqa, kunanmantapacha wakichikuy. “Kay jallpʼaj tukuy kʼuchusnintinpi” willamunki chayqa, ashkha bendicionesta japʼinki (Hech. 1:8).