ASHKHAS yachanku Jesustaqa iskay suwaspa chaupinpi kʼaspiman clavaspa wañuchisqankuta (Mat. 27:35-38). Bibliaqa nin Jesuspa cuerponta wakichispa sepulturaman churaykusqankuta. Ashkhastaj mana creenkuchu chay nisqan ajinapuni kasqanta (Mar. 15:42-46).

Mateo, Marcos, Lucas, Juan librospi imastachus nisqanta mana creej runasqa, mana creenkuchu romanosqa kʼaspipi wañuchisqa runasta sepulturapi pʼampajta saqesqankuta. Astawanpis paykunaqa creenku chay cuerposwan waj jinata ruwasqankuta. Ariel Sabar sutiyoj runa, uj revistapi imaraykuchus ajinata creesqankuta sutʼinchan. Pay nin: “Mana pʼampanapaj jina kaj runasllata crucificaj kanku. Wakin yachayniyoj runasqa ninku, chay jina runasta romanos sepulturapi pʼampajta saqesqankoqa mana creenapaj jinachu kasqanta”, nispa. Romanosqa jatun juchata ruwaj runata wañuchispa nipuni runata jinachu pʼampayta munaj kanku. Chayrayku cuerpontaqa kikinpi clavasqata saqej kanku, pʼisqos mikhukapunankupaj. Chay pʼisqospa puchuchisqankutataj, ashkha cuerposta wijchʼoj kanku chayllamanñasina choqaykoj kanku.

Ñaupa imasta tarisqankupi yachakun, wakin wañuchisqa judiospa tullusninkuta pʼampasqankutapuni. 1968 watapi uj runaj tullusninta tarerqanku, pichus Jesuspa tiemposninpi wañuchisqa karqa. Chay tullustaqa judiospa sepulturankupi tarerqanku, Jerusalén qayllapi. Chay tullusqa tullu jallchʼana cajitapi kasharqa. Chay tullus ukhupitaj chaki talonmanta uj tullu kasharqa. Chay tulloqa uj maderaman clavasqa kasharqa 11 centimentrosniyoj jina clavowan. Ariel Sabar nin: “Chay tulloqa Jehohanán sutiyoj runajta karqa. Chaytaj rikuchin Biblia Jesús sepulturapi pʼampasqa kasqanta nisqanqa cheqapuni kasqanta”, nispa. “Jehohananpa tullusninta tarisqankoqa, sutʼita rikuchin Jesuspa tiemponpi romanosqa kʼaspipi wañuchisqa runata sepulturapi pʼampajta saqesqankuta, judiospa costumbresninkuman jina”. Chaytaj tʼukunapaj jinapuni.

Jehohananpa tullusninta tarisqankuta yachaspa, runasqa imaymanasta yuyanku Jesús imaynatachus kʼaspiman warkhusqa kasqanmanta. Jinapis chayqa sutʼita rikuchin, jatun juchata ruwaj runasqa kʼaspiman clavasqa kaspapis sepulturapi pʼampasqa kasqankuta, manataj ashkha runaspa cuerposninkuta wijchʼoj kanku chaymanchu choqasqankuta. Jesús sepulturapi pʼampasqa kasqanta Biblia nisqanqa cheqapuni. Runaspa tarisqanku imastaj chayta sutʼita rikuchin.

Astawanqa Jehovapuni ñaupajmantaña nerqa Jesusqa uj qhapaj runaj sepulturanpi pʼampasqa kananta. Jehovaj nisqan juntʼakunantataj ni pi jarkʼayta atinmanchu (Isa. 53:9; 55:11).