1. Ñaupa tiempomanta kasukoj runasman, ¿pitaj kallpata qorqa?

 BIBLIAQA Diosta kasukoj kamachisninmanta parlaspa kallpayoj runasmanta jinapuni parlan. Chaywanpis wakin kuteqa aswan kallpayoj kajkunapis yuyarqanku mana kallpayojchu kasqankuta. Wakin kuti Davidqa ni imata manchachikorqachu, nerqataj: “Uj orqota jina sinchʼita sayachiwarqanki”, nispa. Wakin kutistaj kallpan mana kasqanta yuyarqa, sinchʼitataj mancharikorqa (Sal. 30:7). Sansonpis Jehová espíritu santonta qojtenqa manchay kallpayoj karqa. Chaywanpis reparallarqataj Dios atiyta mana qojtenqa “mayqen runa jinallataj mana kallpayoj” kasqanta (Jue. 14:5, 6; 16:17). ¿Pitaj kallpata paykunaman qorqa? Jehová.

2. ¿Imaraykutaj Pablo nerqa pisi kallpayoj kaspaqa atiyniyoj kasqanta? (2 Corintios 12:9, 10).

² Apóstol Pablopis nillarqataj Jehovamanta jamoj atiyta necesitasqanta (2 Corintios 12:9, 10 leey). Noqanchejmanta ashkhas jina Pablopis onqoytapuni yachaj (Gál. 4:13, 14). Chantapis allin kajta ruwananpaj mayta kallpachakoj (Rom. 7:18, 19). Wakin kutistaj mayta llakikoj, wañuchinankutataj manchikoj (2 Cor. 1:8, 9). Jinapis pay nerqa: “Pisi kallpayoj kaspaqa atiyniyoj kani”, nispa. ¿Imaynamanta? Necesitajtin Jehová payman kallpata qorqa, ajinamanta atiyniyoj karqa.

3. ¿Ima tapuykunamantaj kay yachaqanapi kutichisun?

³ Jehovaqa nillawanchejtaj noqanchejtapis kallpachanawanchejta (1 Ped. 5:10). Jinapis chaypajqa mana jinalla kakusunmanchu. Uj autopi piensarina, purinanpajqa uj sumaj motorta necesitan. Chaywanpis autoqa mana motorllawanchu purenqa, purinanpajqa pichus autota apaykachaj aceleradorta sarunan tiyan. Jehová necesitasqanchej kallpata qowasqanchejqa chay motor jina. Pero noqanchejpis mana jinallachu kakunanchej tiyan. ¿Ima yanapastataj Jehová qowanchej kallpachakunanchejpaj? ¿Imatá ruwananchej tiyan chaykunawan sumajta yanapachikunanchejpaj?  Chayta yachanapajqa qhawarina imaynatachus Jehová Dios kallpachasqanta profeta Jonasta, Jesuspa maman Mariata, apóstol Pablotapis. Qhawarillasuntaj kay tiempopi kikillantataj noqanchejtapis kallpachawasqanchejta.

4. ¿Imatá ruwasunman Jehovaj kallpanta japʼinapaj?

⁴ Jehovaj kallpanta japʼinapajqa mañakunanchej tiyan. Paytaj mañakuykunasninchejman kutichiwasun sumaj atiyta qowasqanchejwan (2 Cor. 4:7). Chantapis Palabranta leenanchej tiyan, chaypitaj tʼukurinanchej tiyan (Sal. 86:11). Imatachus Palabranpi niwasqanchejqa ‘atiyniyoj’ (Heb. 4:12). Chayrayku sichus Jehovamanta mañakusun, Palabrantataj leesun chayqa, necesitasqanchej atiyta japʼisun, ajinamanta aguantayta atisun, payta kusisqallapuni sirvisun, qowasqanchej ruwaytapis juntʼayta atisun mana atinapaj jinallachu kajtinpis. Qhawarina imaynatachus Jehová profeta Jonasta kallpachasqanta.

5. ¿Imaraykutaj Jonás kallpata necesitarqa?

⁵ Jehovaqa Jonasman uj llankʼayta qorqa. Chayta ruwananpajtaj Jonasqa kallpata necesitarqa. Chaywanpis manchachikorqa chayta ruwayta. Chayrayku waj ladoman rej barcota japʼirispa chaypi ayqekorqa. Chaynejta paywan, barcopi risharqanku tukuy chaykunawanqa, sinchʼita paramusqanrayku, wayramusqanrayku ima wañuy patapi rikukorqanku. Barcota apaykachajkunataj Jonasta yakuman wijchʼuykorqanku. Chaypitaj uj jatun pescado Jonasta oqoykorqa. Pescadoj wijsantaj manchay laqhachá, manchachikunapaj jinatajchá karqa. ¿Imaynataj Jonás kashanman karqa? ¿Chaypi wañupunantachu yuyanman karqa? ¿Jehová saqerparisqantachu yuyanman karqa? Mana yachanchejchu, jinapis maytachá llakikorqa.

6. ¿Imatá Jonás ruwarqa pescadoj wijsanpi kashaspa kallpata japʼinanpaj? (Jonás 2:1, 2, 7).

⁶ ¿Imatá Jonás ruwarqa pescadoj wijsanpi sapitallan kashaspa kallpata japʼinanpaj? Jehovamanta mañakorqa (Jonás 2:1, 2, 7 leey). Jonasqa Jehovata mana kasukorqachu, chaywanpis arrepientekorqa. Chayrayku yacharqa kʼumuykukoj sonqowan mañakusqanta Jehová uyarinantapuni. Chantapis Diosmanta Qhelqasqapi tʼukurerqa. ¿Imaraykú chayta ninchej? Mañakusqanpi chay sutʼi reparakun. Mañakusqantaj Jonás 2 capitulopi qhelqasqa kashan, chaypitaj reparanchej Salmospi rikhurej palabrasmanta ashkhata oqharisqanta (Jonás 2:2, 5 kikinchay kay versiculoswan Salmo 69:1; 86:7). Sutʼita reparanchej Jonasqa chay qhelqasqasta sumajta rejsisqanta. Chaykunapi tʼukurisqanraykutaj pescadoj wijsanpi kashaspaqa yacharqa Jehová yanapanantapuni. Mar qocha kantupiña kashajtintaj, Jonasqa Jehovaj kamachisqanta juntʼananpaj wakichisqa kasharqa (Jon. 2:10–3:4).

7, 8. ¿Imataj uj hermanota yanaparqa llakiypi kashajtin kallpata japʼinanpaj?

⁷ Llakiykunapi rikukojtinchej Jonaspa kausaynin yanapawasunman. Taiwanmanta Zhiming sutiyoj hermanomanta parlarina. b Payqa sinchʼi onqosqa kashan, Jehovata sirvisqanraykutaj familianqa sinchʼita payman churanakun. ¿Imaynamantá Jehovaj qosqan kallpata japʼin? Orakuspa, estudiaspa ima. Pay nin: “Wakin kuteqa problemaspi rikhurejtiy maytapuni llakikuni, nitaj Bibliatapis sapallaypi estudiayta atinichu sonqoy mana tiyaykuyta atisqanrayku”, nispa. Jinapis kallpachakullanpuni. Pay nin: “Ñaupajtaqa Jehovamanta mañakuni, chaymantataj audifonosta churaykukuspa Reinomanta takiykunata uyarini. Wakin kuteqa chay takiykunata calmitallawan takini sonqoy  tiyaykunawankama, chaymantataj estudiaj churakunipacha”, nispa.

⁸ ¿Imataj Zhimingman necesitashajtinpuni kallpata qon? Bibliamanta sapallanpi estudiaspa imatachus yachakusqan. Uj kutipi uj operacionmanta kutirikushajtin uj enfermera payta nerqa, ancha pisi glóbulos rojosniyoj kasqanta, chayraykutaj yawarta churanankuta necesitananta. Paytaj operananku ñaupaj chʼisenqa, kikinta operachikoj hermanaj experiencianta leerisqa. Pero chay hermanaj glóbulos rojosnenqa aswan pisisituraj kasqa, chaywanpis mana yawarta churachikusqachu, sumajllatataj kutirikusqa. Chay experienciata leesqan Zhimingman kallpata qorqa Jehovata kasukunanpaj.

9. ¿Imatá ruwasunman uj llakiyrayku mana kallpayoj kajtinchej? (Fotostawan qhawariy).

⁹ Uj pruebapi kashaspa manchay llakisqa kashasqanchejrayku, ¿nichu orakuyta atillanchej? ¿Estudiananchejpajpis nichu kallpanchej kan? Kayta ama qonqakunachu: Jehovaqa sutʼisituta yachan imaynachus kashasqanchejta. Chayrayku may pisisitullata paymanta mañarikojtinchejpis, payqa imatachus necesitasqanchejta qowasunpuni (Efe. 3:20). Imanchejpis mayta nanawasqanchejrayku, chayri sinchʼi llakisqa kashasqanchejrayku mana leeyta, nitaj estudiayta atillanchejchu chayqa, Bibliamanta chayri publicacionesninchejmanta grabacionesta uyarisunman. Chayri jw.org paginanchejmanta takiykunata uyarisunman chayri uj videota qhawasunman. Chaypis mayta yanapallawasunmantaj. Jehovamanta mañakusqanchej, imastachus pay qowasqanchejpitaj kutichiwasqanchejta maskʼasqanchejqa, kaytapis nishasunman jina kanman: “Ama jina kaspa, Diosníy kallpata qoway ari”, nispa.

10. ¿Imaynatá hermanosninchej kallpachawanchej?

¹⁰ Jehovaqa hermanosninchejnejta kallpata qowasunman. Llakiykunapi rikukojtinchej, chayri Diospa llajtanpi uj ruwayta mana juntʼayta atishajtinchej, hermanosqa mayta ‘sonqochawasunman’ (Col. 4:10, 11). “Llakiy kajtintaj” astawan necesitanchej amigosninchejta (Pro. 17:17). Ajinapi rikukuspa mana kallpayoj kashajtinchej, hermanosninchejqa imatachus necesitasqanchejta qowasunman, sonqochawasunman, Jehovata sirvinallapajpunitaj kallpachawasunman. Qhawarina imaynatachus  Jesuspa maman María yanapata, kallpatapis japʼisqanta.

11. ¿Imaraykutaj María kallpata necesitarqa?

¹¹ Mariaqa Jehovaj munayninta juntʼananpaj kallpata necesitarqa. Ángel Gabrielqa Mariaman nerqa ni piwan puñuykuspalla onqoj rikhurinanta. Chayta nejtintaj Mariaqa nichá ni imanakuyta aterqachu. Paypataqa manaraj ni uj wawitanpis karqarajchu, chay wawitantaj Mesías kanan karqa. Chantapis Mariaqa ni piwan puñuykusqanrayku, Joseman sutʼinchanan karqa imaynamantachus onqoj rikhurisqanta. Josewanqa casarakunanpaj parlasqaña karqa (Luc. 1:26-33).

12. Lucas 1:39-45 nisqanman jina, ¿maymantá María necesitasqan kallpata japʼerqa?

¹² ¿Maymantá María kallpata japʼerqa chay jatun ruwayta juntʼananpaj? Wajkunawan yanapachikorqa. Mariaqa ángel Gabrielta nerqa astawan sutʼinchananta, ajinamanta Jehovaj nisqanta sumajta juntʼananpaj (Luc. 1:34). Pisi tiemponman Mariaqa may karuta viajarqa “orqos chaynejman”, Judaj ujnin llajtanman, chaypi parienten Elisabetta visitananpaj. Chayman risqantaj may sumajpuni karqa. Elisabetqa Mariata mayta felicitarqa, espíritu santonejtataj wawanmanta uj sumaj profeciata nerqa (Lucas 1:39-45 leey). Chayta uyarispa Mariaqa Jehová “tʼukuna imasta atiyninwan” ruwasqanta nerqa (Luc. 1:46-51). Jehovaqa ángel Gabrielnejta, Elisabetnejta ima Mariata kallpacharqa.

13. ¿Imataj karqa Dasurí hermanospa yanapayninta maskʼajtin?

¹³ Mariata jinallataj noqanchejtapis hermanosninchej kallpachawasunman. Boliviapi tiyakoj hermananchej Dasurimanta parlarina. Tatantaqa nerqanku wañuchej onqoyniyoj kasqanta. Chayraykutaj hospitalman yaykorqa. Payqa sumajta tatanta cuidayta munarqa (1 Tim. 5:4). Chayta ruway mana atinapaj jinallachu kasqanrayku, wajkunaj yanapanta necesitarqa. Pay nin: “Wakin kutisqa niñapuni atisqayta yuyarqani”, nispa. Jinapis payqa qallariypi mana yanapata mañakorqachu. ¿Imarayku? Dasurí nin: “Mana hermanosniypaj uj llasa qʼepi jina kayta munarqanichu. Noqallataj nikoj kani, ‘Jehová yanapallawanqa’ nispa. Chaymantaraj reparakorqani hermanosmanta karunchakuspaqa, sapallay problemasniyta allinchayta munashasqayta”, nispa (Pro. 18:1). Chayrayku Dasuriqa wakin amigosninman escriberqa imaynachus kashasqanta willarinanpaj. Pay nillantaj: “Mana niyta atiymanchu imaynatapunichus munasqa hermanosniy yanapawasqankuta, kallpachawasqankuta ima. Paykunaqa hospitalman mikhunata apamuwaj kanku, Bibliaj textosninwantaj kallpachariwaj kanku. May sumajpuni mana sapallanchejchu kashasqanchejta yachayqa. Noqanchejqa Jehovaj jatun familianmanta kanchej. Chay familianchejqa necesitasqanchejpi yanapariwanchej, waqarikojtinchej noqanchejwan khuska waqarikunku, Jehovata paykunawan khuska sirvinallapajpunitaj kallpachawanchej”, nispa.

14. ¿Imaraykutaj ancianospa yanapayninta japʼikunanchej tiyan?

¹⁴ Jehovaqa ancianosnejtapis kallpachallawanchejtaj. Ancianostaqa Jehová regalosta jina qowanchej kallpachanawanchejpaj, sonqochanawanchejpaj ima (Isa. 32:1, 2). Chayrayku imapis llakichiwajtinchej paykunaman willarikuna, paykunaj yanapaynintataj tukuy sonqo japʼikuna. Jehovaqa paykunanejta kallpachawanchej.

15. ¿Ima sumaj suyakuyniyojtaj tukuy cristianos kanchej?

¹⁵ Biblia suyakuyniyoj kasqanchejta nisqanqa kallpata qowanchej (Rom. 4:3, 18-20). Tukuy cristianosqa wiñaypaj kausakuyta suyakushanchej, kay jallpʼapi uj paraisopi chayri cielopi.  Chay suyakuyninchej kallpata qowanchej pruebasta aguantanapaj, sumaj willaykunata willanapaj, congregacionpi ruwanasninchejtapis juntʼanapaj (1 Tes. 1:3). Qhawarina imaynatachus apóstol Pablota chay suyakuyllataj kallpachasqanta.

16. ¿Imajtín Pablo kallpata necesitarqa?

¹⁶ Pabloqa kallpata necesitarqa. Payqa corintosman cartanpi tʼuru vaso jinalla kasqanta nerqa. Nillarqataj “may chhika llakiyniyoj” kasqanta, “qhatiykachasqa” kasqanta, “urmachisqa” kasqanta, ‘imatachus ruwanantapis mana yachasqanta’. Wakin kutistaj payqa wañuy patapi kasharqa (2 Cor. 4:8-10). Tukuy chaytataj kinsa kaj kutipi misionero jina viajashajtin qhelqarqa. Ichapis chaypachaqa manaraj yacharqachu qhepaman aswan llakiykunapiraj rikukunanta. Aswan qhepamantaj chay viajellapipuni kashajtin sajra runas maqarqanku, presocharqanku, barco yakuman chinkaykojtintaj casi wañorqa, carcelmanpis wisqʼaykorqanku.

17. 2 Corintios 4:16-18 nisqanman jina, ¿imataj Pabloman kallpata qorqa pruebasta aguantananpaj?

¹⁷ ¿Imataj Pabloman kallpata qorqa aguantananpaj? Suyakuyninpi yuyasqan (2 Corintios 4:16-18 leey). Corintopi kaj hermanosman nerqa cuerpon “maukʼayajtinpis” mana desanimakusqanta. Payqa kausaynin aswan qhepaman imaynachus kananpi tʼukurerqa. Paypajqa cielopi kausakuy uj sumaj tʼinka karqa, ‘ni imawantaj kikinchakorqachu’. Chay tʼinkanta japʼinanraykutaj ima ñakʼariyta aguantananpajpis wakichisqa kasharqa. Chay suyakuyninpi tʼukurisqanraykutaj, Pabloqa repararqa yuyaynenqa “sapa pʼunchay mosojyachisqa” kashasqanta.

18. ¿Imaynatá Tijomirta, familiantawan suyakuyninku kallpachan?

¹⁸ Bulgariapi tiyakoj Tíjomir hermanonchejmanta parlarina. Paymanqa suyakuynin kallpata qon. Pasaj wataspi paypa sullkʼa hermanon Zdravkoqa autopi accidentakuspa wañuporqa. Tijomirqa may llakisqapuni qhepakorqa. Payta, familiantapis, ¿imataj yanaparqa chay llakiyninkuta aguantanankupaj? Imaynachus kausarimuy kananpi piensariy. Pay nin: “Parlariyku maypichus Zdravkota suyanaykuta, ima mikhunatachus waykʼupunaykuta, pikunatachus bienvenida fiestanman wajyarinaykuta,  kay qhepa pʼunchaykunamantapis imastachus willarinaykuta”, nispa. Tíjomir nin familianmanqa suyakuyninku kallpata qosqanta aguantanallankupajpuni, Jehová hermanonta kausarichinantapis suyakunallankupajpuni.

19. ¿Imatá ruwawaj suyakuyniykimanta mana iskayrayanaykipaj? (Fototawan qhawariy).

¹⁹ ¿Imataj yanapawasun suyakuyninchejmanta astawan chʼipakunapaj? Kay jallpʼapi wiñaypaj kausakuyta suyakushanki chayqa, Biblia imatachus paraisomanta nisqanta leeriy, chaypi kashasqaykitataj yuyay (Isa. 25:8; 32:16-18). Piensariy paraisopi imaynachus kausayniyki kananpi. ¿Paraisopiñachu rikukushanki? ¿Pitataj chaypi rikushanki? ¿Pitá uyarishanki? Chaypi kaspa, ¿imayná kashanki? Publicacionesninchejpi paraisomanta rikhurej dibujosqa yanapawasun chaypi astawan piensarinapaj. Chantapis qhawarisunman takiykunasniyoj videosta. Chaykunamanta wakenqa kashanku: Mosoj jallpʼapi tʼukuriy, Qayllitapiña kashan, Sonqoyqa mosoj pachapi. Paraisopi kausay imaynachus kananpi tʼukuriytapuni yachasun chayqa, llakiykunasninchejqa “uj tiempollapaj, nitaj imapischu” kasqanta yuyasun (2 Cor. 4:17). Jehová ima suyakuytachus qowasqanchejqa kallpachawasun.

20. Imata ruwanapajpis manaña kallpanchej kasqanta yuyajtinchej, ¿imaynamantá kallpata japʼisun?

²⁰ Imata ruwanapajpis manaña kallpanchej kasqanta yuyajtinchej, “Dioslla kallpata qowasun” (Sal. 108:13). Jehovaqa tukuy ima necesitasqanchejtaña qowanchej kallpayoj kanapaj. Chayrayku uj ruwayta mana juntʼayta atillanchejchu chay, uj pruebata mana aguantayta atillanchejchu chay, chayri Jehovata kusiyllawanpuni mana sirviyta atillanchejchu chayqa, sonqomantapacha orakuna, Palabrantataj estudiana yanapanawanchejpaj, chantapis hermanospa yanapayninkuta japʼikuna, suyakuyninchej yuyayllapunitaj kana. Ajinamanta “Diospa jatun atiynin” kallpachawasun, “pacienciawan, kusiywantaj tukuy imapi sinchʼita” sayanapaj (Col. 1:11).