Noqaqa 1934 watapi nacekorqani. Tatasneyqa Suizamanta kanku, Timminsmantaj jampusqanku. Chay llajtitaqa uj centro minero, Ontariopitaj kashan (Canadapi). 1939 wata chayta mamayqa Torremanta Qhawaj revistata leeyta qallarerqa, Jehovaj testigosninpa tantakuykunasninkumanpis riyta qallarerqa. Tantakuykunamanqa noqatawan, sojta hermanosniytawan pusawaj kayku. Pisi tiemponmantaj mamayqa bautizakorqa.

Tatayqa chaymanta maytapuni phiñakorqa, jinapis mamayqa ñaupajllamanpuni rerqa. Mamayqa Jehovata tukuy sonqo sirvillarqapuni, 1940 watas chayta Canadapi Jehovaj testigosnin prohibisqa kashajtinkupis. Tatay millay imasta nejtinpis, mamayqa kʼachapuni paywan kaj, maytataj respetaj. Ajina kasqantaj noqatawan hermanosniytawan yanapawarqayku testigosman tukunaykupaj. Tiempowan tataypis cambiarqa, aswan kʼachataj noqaykuwan karqa.

1950 watapi, khuskan wata jina kashajtin, Nueva Yorkman rerqani “Aumento de la Teocracia” nisqa jatun tantakuyman. Chaypeqa mundontinmanta ashkha hermanosta, hermanasta ima rejserqani, Galaad Escuelaman rej hermanospa sumaj experienciasninkutapis uyarerqani. Chayrayku Jehovapaj astawan llankʼayta munarqani. Aswan ñaupajtaña chayta ruwayta munajtiypis, chay kutimantapachaqa astawanraj chayta ruwayta munarqani. Chayrayku wasiyman chayaytawankama precursor regular kanaypaj uj solicitudta apacherqani. Canadamanta sucursaltaj bautizakunaytaraj niwarqa. Chayrayku 1 de octubre de 1950 watapi bautizakorqani, killanmantaj precursor regular kayta qallarerqani. Chaymantataj  Kapuskasingman kachawarqanku. Chay llajtitaqa wasiymanta karitupi kasharqa.

1951 watapi sucursalqa nerqa: “Francesta yachaj hermanos Quebec provinciaman ripuwajchej”, nispa. Chayta nerqa chaypi francesta parlasqankurayku, pisi testigosllataj kasqankurayku. Francestawan inglestawan yachasqayrayku, rinayta nerqani, Rouyn llajtitamantaj kachawarqanku. Chay llajtitapeqa ni pita rejserqanichu, chayrayku qallariypi willarerqaykichej jina, maymanchus rinayta niwarqanku chayllaman rerqani. Chaypitaj sumaj riwarqa. Marcelwanqa sumaj amigos ruwakorqayku, tawa watasta jinataj Quebecpi kusisqa sirverqani. Tiempowantaj precursor especialta chaypi sutichawarqanku.

Quebecpi kashajtiy Galaad Escuelaman invitawarqanku, clase 26 nisqaman. Chaytaj South Lansing llajtapi ruwakorqa (Nueva Yorkpi). Chayman rispa may kusisqapuni kasharqani, graduakorqanitaj 12 de febrero de 1956 watapi. Kachawarqankutaj kunan Ghana b sutiwan rejsinchej chay suyuman, África Occidentalman. Niraj rishaspataj Canadaman kuterqani papelesniyta tramitaj, yuyarqanitaj uj mashkha semanasllapi tukunayta.

Chaywanpis Torontopi qanchis killastapuni qhepakorqani papelesniy llojsimunankama. Chay killastataj Cripps familiaj wasinpi qhepakorqani. Paykunajtaqa Sheila sutiyoj uj warmi wawanku karqa, paywantaj sonqoyta suwachikorqani. Casarakunaykupaj parlapayanaypajña kashajtiytaj, papelesniy llojsimorqa. Sheilawan khuska Jehovamanta mañakorqani, nerqaykutaj viajanallayta, cartastataj siga apachinakunaykuta aswan qhepaman casarakunaykutachus manachus yachanaykupaj. Chayta ruwayqa mana facilchu karqa, tiempowanraj repararqayku allin kasqanta.

Uj killatapuni trenpi, cargata apaj barcopi, avionpi ima viajasqaytawan, Accra llajtaman chayarqani, Ghanaj capitalninman. Chaypeqa superintendente de distritota sutichawarqanku, viajanaytaj karqa tukuynin Ghanaman, Costa de  Marfilman, Togolandiaman ima (kunantaj Togo sutikun). Sucursalqa chay lugaresman chayanaypaj jina uj autota qowarqa. Chaykunamanqa casi sapallaypuni rej kani, maytataj gustawaj hermanosta visitariy.

Semana tukukuytaqa asambleas de circuitopi ashkha imaynasmanta yanapakoj kani. Jatun Tantakuna Wasis mana kapuwasqaykurayku, hermanosqa bambú kʼaspimanta, palmera hojasmantawan llanthuchata jina ruwaj kanku llanthu urapi kanaykupaj. Mikhunata jallchʼanapaj heladeras mana kasqanraykutaj, hermanosqa kausashajta animalesta apamoj kanku, chay tantakuyman jamojkunapajtaj ñakʼaj kanku.

Chay jatun tantakuykunapeqa asikunapaj jina wakin imas pasaj. Uj kuteqa hermano Herb Jennings c discursota qoshajtin, kaymanta jinalla uj maltón torito escapakamuspa plataformaj ñaupaqenta correspa pasarqa. Chay toritoqa mana yacharqachu maymanchus rinanta, hermano Herbtaj chʼinlla sayasharqa. Chaymantaraj tawa kallpasapa hermanos chay toritota japʼispa apakaporqanku, chaypi kajkunataj mayta tʼajllarikorqanku.

Chaupi semanataqa La Sociedad del Nuevo Mundo en acción nisqa peliculata qaylla ranchitospi rikuchimoj kani. Chay peliculata rikuchinaypajqa uj yuraj sabanata iskay postesman chayri iskay sachʼasman japʼiykuchispa warkhuykoj kani. Runasmanqa mayta gustaj chay peliculata qhaway, ashkhasqa ni jaykʼaj uj peliculata qhawasqankurajchu. Chay peliculapi bautizakojkuna rikhurimojtintaj mayta tʼajllarikoj kanku. Chay peliculata qhawaspa repararqanku Jehovaj testigosnenqa mundontinpi ujchasqa kasqanchejta.

Africapi iskay watata kasqaytawan, 1958 watapi uj asamblea internacionalman rerqani, chaytaj Nueva York llajtapi apakorqa. Maytapuni kusikorqani chaypi Sheilawan tinkuspa. Payqa Quebecpi precursora especial jina sirvisharqa, chay asambleamantaj jamusqa. Chay kutikama cartasta apachinakushallarqaykupuni. Chaypi khuska kaspataj casarakunaykupaj paywan parlarqani, paytaj “ya” niwarqa. Hermano Knorrman d uj cartata apacherqani Sheila Galaad Escuelaman rinanpaj, chaymantataj Africaman kachamunankupaj. Paytaj “ya” niwarqa. Sheila Ghanaman chayamojtintaj, Accrapi casarakorqayku 3 de octubre de 1959 watapi. Iskayniyku repararqayku Jehovaqa maytapuni bendeciwasqaykuta payta ñaupajman churasqaykumanta.

1961 watapi Camerunman kachawarqayku, chaypitaj niwarqanku mosoj sucursalta rikhurichiypi yanapakunayta. Ashkha ruwanasniyoj karqani, sucursalmanta encargadota churawasqankuraykutaj ashkha imastaraj yachakunay karqa. 1965 watapi Sheila onqoj rikhurerqa, tatas kanaykuta yachaspataj ni imanakuyta aterqaykuchu. Pisimanta pisitaj wawitayoj kanaykuta yachaspa may kusisqaña kasharqayku, Canadaman kutipunaykupajpis wakichikusharqaykuña. Jinallapi uj jatun llakiy qhatiriwarqayku.

Wawitayku wijsapi kashaspallaraj wañuporqa. Doctorqa niwarqayku wawitaykoqa qharisitu kasqanta. Chaymanta kunankama 50 watasña pasajtinpis manarajpuni chayta qonqayta atiykuchu. Chay kutipi manchay llakisqapuni kashajtiykupis quedakunallaykuta nerqayku, chay asignacionniyku maytapuni gustawasqaykurayku.

Camerunmanta hermanosqa sapa kuti qhatiykachasqas kaj kanku politicaman mana satʼikusqankurayku. Elecciones chayamojtintaj aswan dificilraj hermanospaj kaj. 13 de mayo de 1970 watapitaj imatachus mayta manchachikusharqayku chay pasarqa: Gobiernoqa Jehovaj testigosninta prohiberqa. Chayrayku may kʼachitu sucursalniykuta qhechuwarqayku, chaypeqa phishqa killasllataraj kasharqayku. Uj semanallapi tukuynin misionerosta chay suyumanta wijchʼumuwarqayku. Hermanosta maytapuni munakusqaykurayku mana ripuyta atillarqaykuchu, maytataj paykunamanta llakikorqayku.

Chantá Francia sucursalpi sojta killasta karqayku, chaymantapachataj tukuy atisqaykuta ruwarqayku Camerunmanta hermanosta yanapanaykupaj. Chay watallapitaj diciembre killapi Nigeria sucursalmanñataj kachawarqayku, Camerún chay sucursalpa makinman pasasqanrayku. Nigeriamanta hermanosqa chunka makiwan japʼikuwarqayku, chaypitaj may kusisqas sirverqayku.

Sheilaqa unaysitutaña sinchʼi onqosqa kasharqa. Chayrayku 1973 watapi mana yacharqaykuchu imatachus ruwanaykuta. Nueva Yorkpi uj jatun tantakuypi kashajtiyku Sheilaqa waqay ñawilla niwarqa: “Manaña atinichu, saykʼuniña, sapa día onqosqalla kani”, nispa. Iskayniyku 14 watas kurajtaña África Occidentalpi sirvisharqayku. Noqaqa may kusisqa kasharqani warmisitay yanapawasqanmanta, chaywanpis wakin imasta ruwayta saqenayku karqa. Sumajta parlarikuytawan, Jehovamantapis unayta mañakuytawan, Canadaman kutipunaykuta nerqayku, Sheila aswan sumaj cuidasqa kananpaj. Asignacionniykuta, misioneros kasqaykutapis saqepuytaqa nipuni atillarqaykuchu, manchay llakisqapuni kasharqayku.

Canadaman chayaytawan uj amigoypa negocionpi trabajota tarikorqani, payqa autosta vendej Torontoj norte ladonpi. Chaypeqa uj apartamentota alquilakorqayku, mueblestapis mana mosojtachu rantikorqayku, chayrayku mana manuchakuspalla chaypi tiyakuyta qallarerqayku. Ñaupajta jina kapuwasqallaykuwan kausakuyta munarqayku, ajinamanta aswan qhepaman tukuy tiempoykuwan Jehovapaj llankʼanaykupaj. Niraj imapitaj chayta ruwayta aterqayku.

 Norvalpi (Ontariopi), Jatun Tantakuna Wasita ruwasharqanku, chaypitaj sabadosta voluntario jina yanapakuyta qallarerqani. Tiempowanqa Jatun Tantakuna Wasimanta encargado kanayta niwarqanku, Sheila pisimanta pisi allinyapushasqanraykutaj chay asignacionta japʼikunaykuta nerqayku. Chayrayku junio de 1974 watapi, chaypi kaj apartamentoman tiyakoj riporqayku. May kusisqapuni kasharqayku ñaupajta jina Jehovapaj tukuy tiempoykuwan llankʼayta atisqaykumanta.

Warmisitayqa pisimanta pisi astawan allinyaporqa. Iskay watasninmantaj, congregacionesta waturinayta niwarqanku, noqaykutaj “ya” nerqayku. Manitoba provinciapi kaj congregacionesta waturej kayku, chay lugarespeqa manchaytapuni chirin. Chaywanpis hermanosqa may munakuyniyoj kanku. Chaypi yachakorqayku Jehovaqa mana uj lugarpi sirvisqanchejtachu allinpaj qhawasqanta, manachayqa maypi kaspapis paypaj tukuy atisqanchejta ruwasqanchejta.

Ashkha watastaña congregacionesta waturishajtiyku, 1978 watapi Canadá Betelman invitawarqayku. Pisi tiemponmantaj uj imata yachakorqani, uj yuyaychayta mana japʼikusqayrayku. Montrealpi uj sumaj tantakuy ruwakorqa, niwarqankutaj chaypi uj hora y mediata francespi discursota qonayta. Chaywanpis discursoyqa uyarejkunata puñurpachinanpaj jina karqa. Chayrayku Departamento de Serviciomanta uj hermano noqawan parlarqa. Chay kutispeqa manaraj reparakojchu kani mana sumaj discursantechu kasqayta, chayrayku chay yuyaychawasqanta mana allin sonqowanchu japʼikorqani. Ancha sutʼi simi kasqanta, ancha yapasqatataj parlasqanta yuyaspa phiñakorqani, yuyarqanitaj mana allinta ruwasqallayta qhawashasqanta. Pay chayta yuyaychawasqanrayku, imaynatachus yuyaychawasqanrayku ima, chay yuyaychawasqanta mana japʼikuspa pantarqani.

Uj mashkha diasninmantaj Sucursalta Kamachejkunamanta ujninñataj noqawan parlarqa. Paymantaj nerqani mana allin sonqowanchu chay yuyaychayta japʼikusqayta, maytataj pesachikusqayta. Chantataj pichus yuyaychariwarqa chay hermanomanta perdonta mañakoj rerqani, paytaj tukuy sonqo perdonawarqa. Chaypi yachakorqani kʼumuykukoj sonqo kanay kasqanta, chaytataj ni jaykʼaj qonqasajchu (Pro. 16:18). Chay kutipi pantasqaymanta ashkha kutista Jehovamanta mañakorqani, kunantaj ima yuyaychaytapis allin sonqowanpuni japʼikuyta munani.

Canadá Betelpeqa 40 watas kurajtaña yanapakushani, 1985 watamantapachataj Sucursalta Kamachejkunamanta ujnin kani. Febrero de 2021 watapi munasqa warmisitay wañuporqa, maytataj payta faltachani. Chantapis astawanña onqoykachani. Chaywanpis Jehovata sirviypi ashkha ruwanasniyoj kaspa may kusisqa kani. Chayrayku mana reparallanipischu tiempo ‘ima jina pasapusqanta’ (Ecl. 5:20). Ashkha llakiykunapi rikukojtiypis, Jehovata sirvispa kusisqa kausakusqayqa ni imawan kikinchakunchu. 70 watastapuni Jehovata kausayniypi ñaupajman churasqay, payta sirvinaypajtaj tukuy tiempoyta churasqayqa may sumajpuni noqapaj. Jehovamanta mañakuni tukuy jóvenes payta sirviyta ñaupajman churanankuta. Ajinallamanta kusisqa, sonqo juntʼasqataj kausakuyta atenqanku.