Sajonia nisqaj ujnin llajtitanpi nacekorqani, chaytaj ñaupajta República Democrática Alemana karqa. Wasiypeqa allinta kausakoj kayku, tatasniypis allin imasta yachachiwarqanku. República Democrática Alemanaqa comunista gobiernoyoj karqa, chayrayku Sajoniapi runasqa religionta pisipaj qhawaj kanku. Noqapis 18 watasniykama Diospi mana creejchu kani, comunistataj karqani.

Tukuy runas uj rejlla kananku allin rijchʼawasqanrayku, comunista karqani. Yuyarqanitaj mana ujkunalla qhapaj kanankupaj, tukuy yanapanakunankuta. Chayrayku jóvenes comunistas nisqa organizacionpi yanapakuyta qallarerqani. Chunka tawayoj kashajtiytaj papelta reciclaspa mayta llankʼarqani, chayraykutaj Aue nisqamanta autoridadesqa agradecekuspa uj premiota qowarqanku. Jovencitollaraj kashajtiypis chay suyumanta aswan rejsisqa politicoswan rejsinakorqani. Chayrayku yuyarqani sumajta ruwashasqayta, aswan qhepamanpis allin rinawanta.

Manataj yuyasqayman jinapunichu karqa. Kay 1989 watapi Alemania occidental, Alemania orientalwan ujchaykukorqanku, Europaj inti llojsimuynin ladopi runastaj niña comunistaschu karqanku. Repararqanitaj comunistas sajra imasta ruwashasqankuta. Imaraykuchus mana comunistas kayta munajkunata pisipaj qhawaj kanku. Comunistasqa yanapanakunata nej kanku. Jinapis runasta kusichinallanpajsina nej kanku. Chay tukuy imastaj mayta llakichiwarqa.

Chaymantapachataj musicamantawan, pinturamantawan astawan yachakuyta munarqani. Universidadman yaykunaypaj uj academiapiraj musicata estudiarqani, maytapuni chaymanta yachakuyta munarqani. Imatachus tatasniy yachachiwasqankutaqa qonqakaporqani. Kusikuyllata munasqayraykutaj wakin kutisqa uj chicawantaj waj chicawantaj llojsej kani. Jinapis llakisqallapuni karqani, cuadrosta pintasqaypi llakiyneyqa sutʼi rikukorqa. Tapukojtaj kani: ¿Imaynataj kausay aswan qhepanman kanmanri? ¿Imapajñataj kausanchejri?, nispa.

Tapuykunasniypaj kutichiykunasninta tarispa tʼukulla qhepakorqani. Uj tarde academiapi kashajtiy, uj joveneswan  parlarerqani. Paykunaqa imaynachus qhepaman kausay kananmanta parlarisharqanku. Paykunamanta ujnenqa Mandy * karqa, payqa Jehovaj testigon karqa, sumajtataj yuyaychariwarqa. Pay niwarqa: “Andreas, kausaymanta, aswan qhepaman imaynachus kausay kananmanta yachakuyta munaspaqa Bibliata estudiawaj”, nispa.

Iskayrayaspapis, yachakuyta munallarqanipuni. Mandyqa imatachus Daniel capítulo 2 nisqanta rikuchiwarqa, leeytawantaj mayta tʼukorqani. Chay capituloqa ashkha atiyniyoj suyusmanta parlan, chaykunamantataj kunankamapis parlakullanpuni. Chantá imaynachus qhepaman kausayninchej kananmanta profeciasta rikuchiwarqa, chaypacharaj tapuykunasniypa kutichiykunasninta tarerqani. Jinapis tapukullarqanipuni: ¿Pitaj chay profeciasta qhelqacherqari? ¿Pitaj imachus qhepaman kananta sutʼita niyta atinmanri? ¿Chaykuna Dios kasqantapuni rikuchinchu?, nispa.

Mandyqa Horstta, Angelikatawan rejsichiwarqa. Paykunaqa Jehovaj testigosnin kanku, Bibliaj nisqanta sumajta entiendechiwarqanku. Repararqanitaj Jehovaj testigosnillan Diospa sutinta oqharisqankuta, runasmantaj yachachisqankuta (Romanos 10:13; Mateo 6:9). Yachakorqani Diosqa tukuy runasman kay jallpʼapi wiñay kausayta qonanta. Salmo 37:9 nin: “Diospi suyakojkunarí kay pachata herenciapaj japʼenqanku”, nispa. Kusikorqani Bibliaj nisqanman jina kausakoj runas, wiñay kausayta japʼinankumanta.

Bibliaj nisqanman jina kausakuytaqa mana atillarqanichu. Musicata, pinturata estudiasqayrayku may kasqayta creekoj kani. Chayrayku llampʼu sonqo kanaypaj mayta kallpachakunay karqa. Chʼichi kausayniyta mana saqeyta atillarqanichu. Jehovaman mayta agradecekuni leyesninman jina kausakunankupaj kallpachakojkunawan pacienciakusqanmanta, paykunata munakusqanmanta, entiendesqanmanta ima.

Chunka pusajniyoj watastapuni comunista karqani, nitaj Diospi creejchu kani. Bibliataj kausayniyta cambianaypaj yanapawarqa. Yachakusqayqa reparachiwarqa mana qhasipajchu kausashasqayta, qhepaman imaynachus kausay kananmantataj manaña llakikorqanichu. Kay 1993 watapi Jehovaj testigon jina bautizakorqani, 2000 watapitaj Tabithawan casarakorqani. Payqa sinchʼi creeyniyoj, Bibliamanta runasman yachachinaykupaj tukuy atisqaykuta tiempochakuyku. Yachachisqayku runasmanta wakenqa noqa jina comunistas karqanku, nitaj Diospi creejchu kanku. Mayta kusikuni paykunata Jehová Diosta rejsinankupaj yanapasqaymanta.

Tatasneyqa mana munarqankuchu Jehovaj testigosninwan masichakunayta. Jinapis aswan qhepaman repararqanku paykunawan masichakusqay kausayniypi yanapashawasqanta. Kunanqa tatasniy Bibliata estudiashanku, tantakuykunamanpis rishanku. Chaytaj mayta kusichiwan.

Bibliapeqa casarasqaspaj yuyaychaykuna tiyan, chayman jina kausakunaykupajtaj Tabithawan mayta kallpachakushayku, chaytaj mayta kusichiwayku. Sutʼincharinapaj, Bibliaqa yuyaychawanchej mana wasanchanakunata. Chayman jina kausakunaykupaj kallpachakusqaykuraykutaj, aswan ujchasqas kayku (Hebreos 13:4).

Kausaymanta, imachus aswan qhepaman kananmanta imaqa, mana llakikuniñachu. Jehovaj testigosnenqa jallpʼantinpi familia jina kanku, ujchasqastaj kanku, noqataj paykunamanta ujnin kani. Jehovaj testigosnin ukhupeqa mana pipis aswan sumajpaj qhawasqa kanchu. Chay jina kausaytataj unaymantapachaña maskʼarqani.