¿Imaraykutaj imaymana parlaykunapi ashkha Biblias tiyan? Chay Biblias, ¿yanapawanchejchu Diospa Palabranta entiendenapaj? Imaynatachus chay Bibliasta rikhurichisqankuta yachayqa, yanapawasunchej chayta yachanapaj.

Maykʼajchus, pitajchus Bibliata qhelqasqanta qhawarina.

Bibliaqa iskaypi tʼaqasqa kashan. Ujnenqa 39 librosniyoj, chaykunataj “Diospa palabran” (Romanos 3:2). Diosqa kasukoj runasta yuyaycharqa chay librosta qhelqanankupaj. Qhelqarqankutaj 1.100 wataspi jina. Chay runasqa Jesús niraj jamushajtin 1513 watamantapacha qhelqayta qallarerqanku, 443 wata chaynejkama. Chay runasqa hebreopi qhelqarqanku, chayraykutaj chay librosqa Hebreo Qhelqasqa sutikun, “Ñaupa Testamento” sutiwanpis rejsikullantaj.

Qhepan kajtaj 27 librosniyoj, chay librostapis “Diospa palabranta” jinallataj rejsikun (1 Tesalonicenses 2:13). Diosqa Jesuspa wakin yachachisqasninta yuyaycharqa chay librosta qhelqanankupaj. Chay librostaqa Jesús jamusqanmantaña 60 watas jinallapi qhelqarqanku, 41 watamanta, 98 watakama. Griegopitaj qhelqarqanku, chayrayku chay librosqa Griego Qhelqasqa sutikun, “Mosoj Testamento” sutiwanpis rejsikullantaj.

Rikunchej jina Bibliaqa 66 librosniyoj, chaynejtataj runasqa Diosmanta yachakunkuman. Jinapis, ¿imaraykutaj ashkha Biblias ruwakorqa? Chayta yachanapaj kinsa imasta qhawarina.

• Runas parlayninkupi Bibliata leenankupaj.

• Bibliata copiajkunaj pantasqankuta allinchanapaj, qallariypi imaynachus Biblia qhelqakusqanman jina kananpaj.

• Runaspa parlayninkuman jina kananpaj.

Qhawarinachej iskay Bibliasta tijrachishajtinku imaschus kasqanta.

Jesús jallpʼaman jamunanpaj 300 watas faltashajtin, wakin judíos Ñaupa Testamentota griegoman tijracherqanku. Chaytataj Septuaginta griega sutiwan rejsikorqa. Chay Bibliata ruwakorqa judiosta “Diospa qhelqasqa” palabranpi kanallankupajpuni yanapananpaj. Imajtinchus chay tiempopi judiosqa griegota astawan parlaj kanku (2 Timoteo 3:15).

Septuaginta Bibliaqa ashkha mana judío runasta Bibliamanta yachakunankupaj yanaparqa. Imajtinchus chay runasqa griegota parlaj kanku. Profesor Wilbert Howard nerqa: “Kay 50 watas chaynejpi Septuaginta Bibliata Iglesia Cristiana apaykachayta qallarerqa, chay iglesiaj misionerosnintaj, ‘Jesús Mesías kasqanta chay Bibliapi rikuchinankupaj’ sinagogamanta sinagoga rerqanku”, nispa (Hechos 17:3, 4; 20:20). Ajinata ruwasqankurayku Frederick Bruce nisqanman jina, judiosqa “Septuaginta Bibliamanta manaña yachayta munarqankuchu”.

Jesuspa yachachisqasnenqa Griego Qhelqasqasta, Septuaginta Bibliawan ujchaykorqanku, ajinamanta kay tiempopi Bibliaqa 66 librosniyoj.

Tukuynin Biblia qhelqakuyta tukukorqa. Chaymanta 300 watasninman jinataj, Jerónimo latín parlayman tijrachiyta tukorqa. Chay Bibliatataj tiempo pasasqanman jina Vulgata latina nisqa rejsikun. ¿Imaraykú chay Biblia necesitakorqa? The International Standard Bible Encyclopedia nisqanman jina, Jeronimoqa “Biblias mana allin tijrasqachu kasqankuta, tijrajkuna yapaykusqankuta, orqhosqankutataj allinchayta munarqa”.

Jeronimoqa chaykunata allincharqapuni. Jinapis aswan qhepaman Iglesiaqa Vulgata latina Bibliallata apaykachakunanta nispa mayta pantarqa. Chay Bibliataqa ashkha watasta apaykacharqanku, nitaj runasta Bibliata entiendenankupaj yanaparqachu, imajtinchus aswan qhepaman niña latinta parlarqankuchu.

Waj Biblias rikhurerqa, chaykunamanta ujnintaj Peshitta siríaca nisqa karqa. Chay Bibliataj rikhurerqa 500 watas chaynejpi. Apaykachakorqataj 1400 watas chaynejkama. Chay watas chaynejllapitaj orqhoyta munarqanku runas parlayninkupi entiendenankupaj jina Bibliasta.

Inglaterrapi John Wyclef chay Bibliasmanta inglesman tijrachiyta qallarerqa 1400 watas tukukuyta. Chaytataj ruwarqa runas parlayninkupi entiendenankupaj. Pisi tiemponman Johannes Gutenberg Bibliasta imprimerqa. Chaytaj Bibliamanta yachaj runasta yanaparqa Europapi tukuy laya parlaykunapi Bibliata runasman jaywanankupaj.

Inglés parlaypi ashkha Biblias llojsisqanmanta, yachayniyoj runas nerqanku uj parlayllapi ashkha Biblias kasqanqa mana allinchu kasqanta. Jinapis 1800 watas chaynejpi, Inglaterra suyumanta John Lewis nerqa: “Watas pasasqanman jina, runasqa niña kikintachu parlanku, chayrayku runaspa parlasqankuman jina Bibliasta allinchananku karqa. Ajinamanta kay tiempomanta runaspis Bibliata entiendenankupaj”, nispa.

Bibliamanta yachaj runasqa kay tiempopi astawanraj Bibliata allinchayta atinku. Imaraykuchus paykunaqa ima parlaykunapichus qallariypi Biblia qhelqakusqan parlaykunamanta astawan yachanku. Yanapachikuytataj atinku kunallanraj ñaupa tiempomanta qhelqasqasta tarisqankuwan. Tukuy chaykunawanqa Bibliata unay qhelqasqasman jina cheqan kananpaj allinchanku.

May sumajpuni parlayninchejpi mosoj Biblias kasqanqa, jinapis sumajta ajllana tiyan. * Diosta tukuy sonqo munakusqankurayku Bibliata allinchajtinkoqa, mayta yanapawasun.