Quriwaptinchik agradecekuna mana michʼakuspataq qurina

MUNAKUYNIYUQ Tatanchik Jehovaqa, Biblia ninjina kamachisninta mayta yanapayta munan (1 Ped. 5:7). Chaytaq rikukun, payta mana wasanchaspa yupaychanapaq yanapawasqanchikpi (Isa. 48:17). Chantapis Jehovaqa, chʼampaykunapi, llakiykunapi ima, chay yanapanwan yanapachikunanchikta munan. Kunanqa, Dios Israel llaqtaman Moisesniqta Ley qusqanta qhawarina.

Jehovaqa kamachisninta munakusqanrayku, chay Leyta churasqanpi, pisi kapuyniyuqkunata yanapanankuta nirqa, wakcha wawasta, viudasta, wak suyumanta kaqkunata ima (Lev. 19:9, 10; Deu. 14:29). Kunan tiempopi Diospa kamachisninmanta wakinkunaqa, hermanospa yanapanta necesitanku, Jehovataq sumaqta chayta yachan (Sant. 1:27). Chayrayku, Jehová juknin kamachinwan yanapayta munawanchik chayqa, chay yanapata mana qhisachananchikchu tiyan. Manaqa agradecekunanchik tiyan.

Bibliaqa, Diospa llaqtan mana michʼakuspa wakkunaman quriyta atisqanta sutʼinchan. ¿Yuyarikunkichu Jesús Jerusalén templopi juk wakcha viudamanta parlasqanta? (Luc. 21:1-4.) Chay viudaqa, Ley kamachisqanmanjina yanapata japʼisqanta mana iskaychakuspa nisunman. Wakcha kaptinpis, mana wakkunamanta yanapata japʼiq warmimantajinachu yuyarikunchik, manaqa kapuyninta tukuy sunqu qusqanmanta. Ajinata ruwasqanqa, maytachá payta kusichirqa, imaraykuchus Jesús nirqajina, “aswan kusiy wajman qoriy qorichikunamanta nisqaqa” (Hech. 20:35). Chay kusiyta tarinapaq, ¿imaynasmantataq ‘wakkunaman qurisunman’? (Luc. 6:38.)

“¿Imaynatá Jehovaman jutʼasun?

Salmistaqa tapurikuq: “Imawantaj Tata Diosman juntʼasaj tukuy allin imasta ruwapuwasqanmantari?”, nispa (Sal. 116:12). ¿Ima yanapastataq Salmista, Jehovamanta japʼirqa? Jehovaqa, ‘mancharisqa, llakisqa’ ima, kachkaptin yanaparqa. Kawsaynintapis, ‘wañuymanta kacharichirqa’. Chayrayku, Jehovaman juntʼayta munaspa imallatapis ruwayta munarqa. ¿Imatá ruwanman karqa? Pay kikin nirqa: “Imatachus ruwanayta Tata Diosman nisqayta kunanqa juntʼapusaj”, nispa (Sal. 116:3, 4, 8, 10-14). Arí, salmistaqa imatachus Jehovapaq ruwasaq nisqanta juntʼayta munarqa, imatachus ruwanan kasqantapis.

Ñuqanchikpis kikinta ruwayta atisunman. ¿Imaynamantá? Diospa kamachisqanta, yuyaychasqanta ima, sapa pʼunchay kasukuspa. Chayrayku, Jehovata yupaychayta imamantapis astawan ñawpaqman churananchik tiyan, espíritu santonwantaq tukuy ruwasqanchikpi yanapachikunanchik tiyan (Ecl. 12:13; Gál. 5:16-18). Jehová, tukuy imata quwasqanchikmantaqa, mana imawanpis payman juntʼayta atisunmanchu. Chaywanpis, payta  yupaychanapaq tukuy atisqanchikta kallpachakusunchik chayqa, sunqunta kusichisunchik (Pro. 27:11). Chaytaq ñuqanchikpaqqa, ¡may sumaq!

Qutuchakuypa allinninta maskʼana

Tukuychá nisunman qutuchakuy imaymanamanta yanapawasqanchikta. Jehovaqa, chayniqta yachachiwanchik. Sutʼincharinapaq, chiqa yachachiykunawanqa, llulla religionpa yachachiyninmanta, runas laqhapijina kawsakusqankumanta ima, kacharichiwanchik (Juan 8:32). Chantapis, “allin kamachi, yuyayniy[uqniqta]”, tantakuykunata, jatuchaq tantakuykunata ima, wakichin, chaypitaq, Paraisopi ni ima llakiyta rikuspa wiñaypaq kawsanapaq yachakunchik (Mat. 24:45-47). Dios qutuchakuyniqta bendeciwasqanchik, qhipaman bendecinawanchikpis, ni imawan kikinchakunchu. Ñuqanchikrí, ¿imatá qutuchakuyrayku ruwasunman?

Apóstol Pablo qillqarqa: “Tukuy cuerpoqa allin wakichisqa kashan, sumaj ujchasqa, sumaj tʼinkisqataj ankuswan. Ajinamanta sapa iman maychus ruwananta juntʼashajtin, tukuy cuerpoqa munakuypi wiñan, purajmanta yanapanakuspa” (Efe. 4:15, 16). Kay pʼiti akllasqa cristianosmanta parlaptinpis, tukuy cristianos kaypi nisqanmanjina ruwananku tiyan. Arí, qutuchakuy wiñananpaq, allinninpaq ima, tukuy cristianos yanapayta atinkuman. ¿Imaynamantá?

Wakkunata sunquchanapaq, kallpachanapaq ima, tukuy tiempo kallpachakuspa (Rom. 14:19). Chantapis, ‘tukuy cuerpo munakuypi wiñananpaq’, espiritup puquyninmanta kʼacha kaykunata hermanosninchikman rikuchispa, yanapallasunmantaq (Gál. 5:22, 23). Mana chayllachu, “sapa kuti tukuypaj allinta ruwana, astawanqa creeypi hermanosninchejpaj” (Gál. 6:10; Heb. 13:16). Pablo nirqajina, sapa jukninchik —waynas, sipaskuna, kuraqkuna ima— munakuyninchikwan qutuchakuy wiñananpaq yanapayta atisunman.

Chantapis, yuyayninchikta, kallpanchikta, kapuyninchikta ima, Diospa Reinonmanta willamunapaq apaykachasunman. Jesucristo nirqa: “Kayta mana pagaspalla japʼerqankichej”, nispa. Ñuqanchikrí, ¿imatá ruwasunman? Payllataq kutichirqa: “Amallataj pagachikuychejchu”, nispa (Mat. 10:8). Chayrayku, Diospa Reinonmanta runasman willamunapaq, yachachimunapaq ima, astawan tiempochakuna (Mat. 24:14; 28:19, 20). ¿Ruwayta munasqaykita mana juntʼayta atiptiykirí? Jesús wakcha viudamanta parlasqanpi, tʼukuriy. Chay viudaqa pisi qullqillata churarqa. Chaywanpis, Jesús nisqanmanjinaqa wakkunamanta astawan qurqa, ¿imaraykutaq? Imaraykuchus chay viudaqa, tukuy atisqanta qurqa (2 Cor. 8:1-5, 12).

Yanapawasqanchikta agradecekuna

Wakin kutipiqa, ñuqanchikñataq qutuchakuypa yanapanta necesitasunman. Ajina kaptinqa, hermanos yanapawasqanchikta tukuy sunqu japʼikuna, ajinamanta chʼampaykunata atipayta atisunchik. Jehová Diosqa, ‘michiqkunata’, qutuchakuyta munakuywan michinankupaq churan. Paykunaqa, ima chʼampay kaptinpis yanapawasunpuni (Hech. 20:28). Ancianos, hermanos imaqa, qutuchakuypi kaqkunata sunquchayta, jarkʼayta, yanapayta ima, munanku (Gál. 6:2; 1 Tes. 5:14).

Imamantapis maychus kaqta yuyanaykipaq kallpachakuy. Hermanos yanapasusqankumanta agradecekuytataq ama qunqakuychu. Chay yanapaqa, Diospa kʼacha yanapayninmanta kasqanta yuyarikuy (1 Ped. 4:10). ¿Imaraykutaq agradecekuy may allinpuni? Imaraykuchus, mana agradecekuyta yachasunmanchu chayqa, kay saqra pachap yuyayninwanchá chimpachikuchkasunman.

Maychus kaqllata yuyana

Pablo, Filipos qutuchakuyman cartanta qillqaspa, Timoteota ajinata nirqa: “Mana  pipis noqawan kanchu pay jina qankunamanta munakuywan yuyarikojqa, allinniykichejta maskʼaspa”, nispa. Chantá nillarqataq: “Tukuy maskʼanku ari paykunaj allinnillankuta, manataj Cristo Jesuspa munayninta ruwaytachu”, nispa (Fili. 2:20, 21). Pablop nisqanpi tʼukurispa, kayta tapurikuna: “¿Imatá ruwayman mana ‘allinnillayta’ maskʼanaypaq?”.

Ni jaykʼaq, hermanosninchik ñuqallanchikpaq tiempochakunankuta, uyarinawanchikta ima, mañananchikchu tiyan. ¿Imaraykutaq? Kaypi tʼukurina: Imallapis kaptin, ¿manacharí hermanosninchik qullqita jaywanawanchikta mañasunmanchu? Imaynallamantapis yanapawasqanchiktaqa agradecekunchik, chaywanpis mana yanapanawanchiktapuniqa nisunmanchu. Kikillantaq tiemponkuwan, yanapayninkuwanpis, mayta yanapayta munawaptinchikpis, allin yuyaywan maychus kaqllata paykunamanta suyananchik tiyan. Chantapis, ñuqanchikqa mana tanqasqajinachu yanapanawanchikta munanchik.

Hermanosqa yanapayta munaspapis, ichá wakin kutiqa mana munasqanchikmanjinapunichu yanapawasun. Ajina kaptinqa, salmistajina Jehovap yanapayninpi suyakunanchik tiyan (Sal. 116:1, 2; Fili. 4:10-13).

Tukuchanapaq, Jehová imaynallamantapis yanapata quwasqanchikta ama qhisachanachu, astawanraq llakiypi rikukuspaqa (Sal. 55:22). Diosqa, ima yanapatapis tukuy sunqu japʼikuspa agradecekunata munan. Chantapis Jehovaqa, ñuqanchikpis tukuy sunqu kusiywantaq, qunanchikta munan. Chayrayku, chiqa kaq yupaychayta, ima tiempollapipis jatunpaq qhawachinaykipaq, ‘sunquykipi’ allinta kallpachakuy (2 Cor. 9:6, 7). Ajinamanta, yanapasuptinkuqa agradecekunki, yanaparispataq tukuy sunqu yanaparinki.

[31 paginapi recuadro, dibujos/fotos]

“Imawantaj Tata Diosman juntʼasaj tukuy allin imasta ruwapuwasqanmantari?” (Sal. 116:12)

▪ Atisqanchikmanjina “sapa kuti tukuypaj allinta ruwana”

▪ Wakkunata sunquchanaykipaq, kallpachanaykipaq ima, kallpachakuy

▪ Atisqaykimanjina Diospa Reinonmanta runasman willamunaykipaq, yachachimunaykipaq ima, tiempochakuy