Soltero kachkaspa Diospaq sumaqta llamkʼay

“Pichus [soltero kayta] japʼeqayta atejqa japʼichun.” (MAT. 19:12.)

1, 2. a) ¿Imaynatá Jesusjina Pablojina Diospa kamachisnin soltero kayta qhawanku? b) ¿Imaraykutaq wakin, soltero kayta mana Diospa regalontajinachu qhawanku?

CASARASQA kawsayqa, tukuypaq Diospa sumaq regalon (Pro. 19:14). Chaywanpis, achkha soltero cristianosqa, kusisqas kawsakullankutaq. Juk soltero hermano Harold sutiyuq 95 watasniyuq nin: “Hermanosta wasiyman waqyarini, mana sapay kayta manchachikusqayraykuchu, manaqa soltero kayta Diospa regalontajina qhawasqayrayku”, nispa.

² Jesuspis apóstol Pablopis casarasqa kay, soltero kay ima, Diospa regalosnin kasqanta nirqanku (Mateo 19:11, 12; 1 Corintios 7:7, ñawiriy). Chaywanpis, mana tukuychu munasqankurayku solteros qhipakanku. Wakinqa, casarakunankupaqjina qharita chayri warmita mana tarisqankurayku, wakintaq watastaña casarasqas kaspapis, divorciakusqankurayku, qusanku chayri warminku wañupusqanrayku sapanku qhipakunku. Jina kaptin, ¿imaptintaq soltero kay, Diospa regalon kasqanta nisunman? ¿Imaynatá solteros Diospaq astawan llamkʼayta atinkuman?

 Sumaq regalo

3. Soltero kaqkuna, ¿imastá ruwayta atinku?

³ Solterosqa, Diospaq astawan llamkʼanankupaq, wak hermanoswan riqsinakunankupaq, Jehovaman astawan qayllaykunankupaq ima, aswan tiempoyuq kanku (1 Cor. 7:32-35). Chaykunata ruwayta atisqankurayku achkha cristianosqa, juk tiempollatapis solteros qhipakunku. Chaywanpis wakinkunaqa, solteros qhipakuypi mana yuyallarqankupischu. Chayjinapi rikukuspataq Diosmanta mañakuspa, allinta tʼukurispa ima, Diospa yanapayninwan ñawpaqllamanpuni rinankuta repararqanku. Ajinamanta, solterollapuni qhipakuyta munanku (1 Cor. 7:37, 38).

4. ¿Imaraykutaq solteros Jehovapaq tukuy sunqu llamkʼayta atinkuman?

⁴ Solterosqa, Jehovawan llaqtanpi kaqkunawanpis allinpaq qhawasqa kanankupaqqa, mana casarakunankupunichu kasqanta sutʼita yachanku. Jehovaqa, sapa juk kamachisninta munakun (Mat. 10:29-31). Diospa munakuyninmantaqa, ni pi, nitaq imapis tʼaqawasunmanchu (Rom. 8:38, 39). Chayrayku, casarasqas chayri solteros kaspapis, Jehovapaq tukuy sunqu llamkʼanallapuni.

5. Soltero kachkaspa Diospaq allinta llamkʼanapaq, ¿imataq yanapawasun?

⁵ Jehovaqa, soltero kayta regalotajina quwanchik. Chayrayku, qharipis, warmipis, waynapis, machu runapis chayri soltero qhipakuyta akllaqpis, sapalla kachkaspa Diospaq allinta llamkʼanapaq kallpachakuna. Kunanqa, ñawpa cristianos imaynatachus soltero kachkaspa Diospaq llamkʼasqankumanta qhawarisun.

Soltero waynas

6, 7. a) ¿Ima sumaq llamkʼaytataq Felipep ususisnin ruwarqanku? b) ¿Imaynatá Timoteo soltero kachkaspa llamkʼarqa chantá ima bendicionestataq Jehovapaq llamkʼasqanrayku japʼirqa?

⁶ Felipeqa, mana qhariq chayasqan tawa ususisniyuq karqa, payjinataq sunqu kʼajaywan Diosmanta willaq kanku (Hech. 21:8, 9). Kay sipaskunaqa, Joel 2:28, 29 pʼitispi nisqanmanjina espíritu santop yanapayninwan Diosmanta parlarqanku.

⁷ Timoteo waynapis soltero kachkaspa, Diospaq mayta llamkʼarqa. Paytaqa, juchʼuymantapacha “Diosmanta Qhelqasqata” maman Eunice, jatun maman Loida ima, yachachirqanku (2 Tim. 1:5; 3:14, 15). Paykunaqa, Listra llaqtapi tiyakurqanku, ichapis 47 watapi, Pablo ñawpaq kutirayku qutuchakuyta waturichkaptin Diosmanta yachakurqanku. Pabloqa, iskay watasninman Listra qutuchakuyta iskay kaq kutipi waturichkaptin, ichapis Timoteoqa, 20 watasniyuqña karqa. Payqa, waynallaraq karqa nitaq unayraqchu Diosta riqsisqanmanta karqa, chaywanpis Listra qutuchakuymanta ancianos, qayllanpi kaq Iconio qutuchakuymanta ancianos ima, paymanta  “allinta parlaj kanku” (Hech. 16:1, 2). Pabloqa, chayta uyarispa Timoteota, paywan misionerojina rinanpaq pusarqa (1 Tim. 1:18, 19; 4:14). Timoteo casarakusqantachus manachus mana yachanchikchu. Chaywanpis Pablo paywan khuska rinanta nisqantaqa, tukuy sunqu kasukurqa achkha watastataq soltero kachkaspa qutuchakuykunata waturispa, misionerojina ima, llamkʼarqa (Fili. 2:20-22).

8. ¿Imataq Juan Marcosta Diospaq astawan llamkʼananpaq yanaparqa, chantá ima bendicionestataq japʼirqa?

⁸ Juan Marcospis wayna kachkaspa, solterojina Diospaq sumaqta llamkʼarqa. Pay, maman María, primon Bernabé ima, Jerusalenpi kaq qutuchakuymanta ñawpaq cristianos karqanku. Payqa ichapis qhapaq familiamanta karqa, imaraykuchus llaqta chawpipi wasiyuq, sirvientayuq ima, karqa (Hech. 12:12, 13). Chaywanpis payqa, mana allinnillanpichu yuyarqa, nitaq sumaq wasiyuq, familiayuq, kapusqanwantaq kusisqa kawsakuytachu maskʼarqa. Marcostaqa, apostoleswan sumaqta masichakusqanrayku misionero kayta munananpaq yanaparqa. Chayrayku, Pablo, Bernabé ima, ñawpaq viajenkupi paykunawan rinanta niptinku, mana iskaychakuspa rirqa (Hech. 13:5). Aswan qhipamantaq Bernabewan viajarqa, watasninmantaq Babiloniapi Pedrota yanapallarqataq (Hech. 15:39; 1 Ped. 5:13). Machkha watatachus soltero qhipakusqanta mana yachanchikchu, chaywanpis wakkunata yanapasqanrayku, Diospaq astawan llamkʼasqanrayku ima, Bibliaqa may riqsisqa kasqanta rikuchin.

9, 10. ¿Imaynasmantá Diospaq astawan llamkʼayta atinkuman soltero waynas? Sutʼinchariy.

⁹ Kay tiempopipis achkha waynas, soltero kachkaspa Diospaq astawan llamkʼayta akllanku. Paykunaqa, mana casarasqa kay “Señorta tukuy sonqo sirvina[nkupaq]” ni ima jarkʼasqanta yachanku imaynatachus Marcos, Timoteo ima ruwarqanku, ajinata (1 Cor. 7:35). Arí, chayqa chiqapuni. Imaraykuchus paykunaqa, precursores kayta, wak qalluta yachakuyta, Tantakunapaq Wasista, sucursalesta ima, ruwaypi yanapakuyta atinku, Escuela de Entrenamiento Ministerial nisqaman chayri Betelman riyta atillankumantaq. Wayna niraq casarakunkichu chayqa, ¿chaykunata ruwachkankichu?

¹⁰ Mark niraq 20 watasniyuq kachkaspa, precursor kayta qallarirqa. Chaymantataq Escuela de Entrenamiento Ministerial nisqaman rirqa, achkha suyuspitaq Diospaq llamkʼarqa. Payqa, 25 watasta precursorjina llamkʼasqanmanta nin: “Qutuchakuypiqa hermanosta yanaparinipuni, paykunawan willaq lluqsini, wasinkuman waturiq rini, wasiyman mikhurinankupaq waqyarini, Diospa qayllanpi kanallankupaqpunitaq kusirikunapaq tantakuykunata wakichini. Chayta ruwaspataq, ¡mayta kusikuni!”, nispa. Arí, Mark nisqanmanjina wakkunaman qurispaqa, aswan kusiyta tarinchik. Chaytataq Diospaq astawan llamkʼaqkuna rikunku (Hech. 20:35). Waynas imastapis ruwayta munankichik chayri yachankichik chayqa, Señorpaq astawan llamkʼayta atiwaqchik (1 Cor. 15:58).

11. Mana usqhayllata casarakuqkuna, ¿imastá yachakunkuman?

¹¹ Wak waynasjina ichapis juk pʼunchay casarakuyta munanki. Chaywanpis mana usqhayllata casarakuypi yuyaychu. Pabloqa, “tiempo pasa[nantaraq]”, qhariwarmijina puñuykuyta munay pisiyananta suyakunaykitaraq nichkarqa (1 Cor. 7:36). Chantapis ñawpaqtaqa, qamraq imaynachus kasqaykita allinta yachanayki tiyan, ajinamanta pichus qusayki chayri warmiyki kananta allinta akllanki, chaypaqtaq tiempo pasananraq tiyan. Casarakuspa tratota ruwaytaqa, Dios may jatunpaq qhawan, chaytataq ama qunqaychu, imaraykuchus chayqa tukuy kawsayniykipaq kanqa (Ecl. 5:2-5).

Mana casarasqa cristianos

12. a) ¿Imatá viuda kachkaspa Ana ruwarqa? b) ¿Imatá Ana rikurqa?

¹² Lucas Evangeliopiqa, Ana warmimanta  parlachkan, qusantaq casarakusqankumanta qanchis watasninman wañupurqa. Bibliapiqa, mana ninchu wawasniyuq kasqanta, chayri watiqmanta casarakuyta munasqantapis, chaywanpis 84 watasniyuq kachkaptin viudallapuni kachkasqanta nin. Chantapis ajinapi rikukuspaqa, Jehovaman astawan qayllaykusqanta nin. Payqa, temploman rillaqpuni chaypitaq “tuta pʼunchay sirvispa, ayunaspa, Diosmantataj mañaku[q]” (Luc. 2:36, 37). Rikunchikjina Anapaqqa, kawsayninpi Diosta yupaychay ñawpaqpi karqa. Arí, Anaqa mayta kallpachakunan karqa, chaywanpis temploman risqanraykupuni wawita Jesusta rikurqa, Mesías kaptintaq salvayta atisqanmanta willarqa (Luc. 2:38).

13. a) ¿Imaynatá Dorcas sumaq llamkʼaq cristiana kasqanta yachanchik? b) ¿Ima bendiciontataq Dorcas kʼacha kasqanrayku japʼirqa?

¹³ Dorcas chayri Tabita sutiyuq cristianaqa, Jerusalenpa qayllanpi Jope llaqtitapi mama quchap kantunpi tiyakuq. Biblia paymanta parlaspaqa mana casarasqa kasqanta nin, chaywanpis aswan qhipaman imaynachus kasqanmanta mana ninchu. Chaywanpis Dorcasqa, “sumaj ruwanasta ruwaspapuni kaj, wajchastapis yanapaspa”. Payqa, wakcha viudaspaq, wakkunapaq ima, pʼachasta siraq, chayrayku paytaqa, mayta munakuq kanku. Chaywanpis unquykuspa wañupurqa, chayraykutaq qutuchakuymanta hermanosqa, payta kawsarichinanpaq Pedrota waqyachirqanku. Kawsarisqanmantaqa, Jope llaqtamanta tukuy yacharqanku, chayrayku Diosmanta achkhas yachakurqanku (Hech. 9:36-42). Chay yachakuqkunapis ichá Dorcas kʼacha kasqanta rikullarqankutaq.

14. ¿Imaraykutaq achkha solteros Jehovap qayllanpi kasqankuta reparanku?

¹⁴ Kay tiempopipis Anajina, Dorcasjina achkha mana casarasqa cristianos kanku. Wakinqa, casarakunankupaqjina qusata chayri warmita mana tarisqankurayku mana casarakunkuraqchu, wakintaq divorciasqas chayri viudos, viudas ima, kanku. Kay cristianosqa mana qusanku chayri warminku atienekunankupaq kasqanrayku, Jehovaman astawan qayllaykunku (Pro. 16:3). Juk hermana Silvia sutiyuq 38 watas kuraqtaña Betelpi llamkʼan, payqa soltera kasqanta juk bendiciontajina qhawan, nintaq: “Wakin kutiqa ñuqallapuni tukuy imata muchunaypaq kallpachakusqaymanta saykʼuniña, tapurikunitaq: ‘¿Pitaq ñuqata kallpachawanqarí?’, nispa. Chaywanpis Jehová imatachus necesitasqayta yachasqanqa, payman astawan qayllaykunaypaq kallpachawan. Chantapis tukuy imaymanamanta kallpachawan”, nispa. Tukuy payjina Jehovaman qayllaykuptinchikqa, pay kallpachanawanchikmanta, munakuywan yanapanawanchikmanta ima, mana iskaychakusunmanchu.

15. ¿Imaynatá mana casarasqa cristianos munakuyninkuta wakkunaman rikuchiyta atinkuman?

¹⁵ Chantapis mana casarasqa kaqkunaqa, astawan wakkunawan masichakuyta atinku (2 Corintios 6:11-13, ñawiriy). Juk cristiana Jolene sutiyuq 34 watastaña precursora especialjina llamkʼaq nin: “Tukuy hermanoswan masichakuni mana wiñay masisnillaywanchu. Solterosqa, Jehovapaq astawan llamkʼayta atinchik, familianchikta, hermanosta, wak runasta ima, yanapayta atinchik. Watas pasasqanmanjinataq soltera kasqaymanta may kusisqa sientekuni”, nispa. Arí, machitu chayri unqusqa hermanos, sapallanku tatamamas, waynas, sipas, qutuchakuymanta wakkuna ima, solteros ruwasqankuta may allinpaq qhawanku. Chantapis wakkunata kʼachamanta yanaparispaqa, mayta kusikunchik. Chayrayku tapurikuna: “¿Wakkunaman munakuyniyta rikuchillaymantaqchu?”, nispa.

Solterosllapuni chayri solterasllapuni

16. a) ¿Imaraykutaq Jesús mana casarakurqachu? b) ¿Imaynatá Pablo soltero kaspa Diospaq llamkʼarqa?

¹⁶ Jesusqa, ni jaykʼaq casarakurqachu. Payqa, Diospa kamachisqanta ruwananpaq wakichikunan  karqa, chaytataq juntʼanan karqa. Chantapis, payqa mayta viajaq, tutamantapacha chʼisiyaykama llamkʼaq, kawsaynintataq ñuqanchikrayku qurqa. Arí, Jesusqa soltero kasqanrayku tukuy imata ruwayta atirqa. Pablopis achkha kilometrosta purillarqataq willayninpipis tukuy laya chʼampaykunata atiparqa (2 Cor. 11:23-27). Ichá Pabloqa, casarasqa karqa chaywanpis apostoljina sutichasqa kasqanmanta soltero qhipakuyta akllarqa (1 Cor. 7:7, 8; 9:5). Jesuspis Pablopis cristianosta paykunajina atiptinkuqa, Diospaq astawan llamkʼayta atinankupaq solteros qhipakunankuta yuyaycharqanku. Chaywanpis paykunaqa, Diospa kamachisnin mana solterollapuni qhipakunankutachu nichkarqanku (1 Tim. 4:1-3).

17. a) ¿Imatataq Jesusjina, Pablojina wakin cristianos ruwanku? b) ¿Imaynatá yachanchik Jehová, paypaq llamkʼaqkunata allinpaq qhawasqanta?

¹⁷ Kay tiempopipis, achkha cristianos Diospaq astawan llamkʼayta munasqankurayku mana casarakunkuchu. Haroldqa, 56 watas kuraqtaña Betelpi llamkʼachkan, nin: “Betelpi 10 watastaña llamkʼachkaptin achkha qhariwarmikunata unquyrayku, tatasninkuta qhawanankurayku ima, ripuqta rikurqani. Tatasniy wañupusqankurayku mana pitapis qhawanaychu karqa, chaywanpis Betelpi llamkʼaytaqa, may allinpaq qhawarqani chayrayku mana casarakuyta munarqanichu”, nispa. Chantapis achkha watastaña precursorajina llamkʼaq Margaret sutiyuq hermanaqa nin: “Achkha kutista casarakunaypaq parlapawarqanku chaywanpis ni jaykʼaq casarakurqanichu. Mana qusayuq kasqayrayku achkha tiempoyuq kani, Diospaq astawan llamkʼayta atini chaytaq mayta kusichiwan”, nispa. Arí, Jehovaqa paypaq llamkʼaqkunata ni jaykʼaq saqirparinchu (Isaías 56:4, 5, ñawiriy).

Solteros kachkaspa Diospaq astawan llamkʼay

18. ¿Imaynatá soltero cristianosta kallpachasunman, yanapasunman ima?

¹⁸ Soltero kachkaspa Jehovapaq tukuy sunqu llamkʼasqankumantaqa, mayta kusikunchik. Kay hermanosta qutuchakuypi kʼacha kaykunasninta rikuchichkasqankumanta, hermanosta yanapachkasqankumanta ima, may allinpaq qhawanchik. Paykunapaq, wawqis, panas, mamas, wawas ima, kasqanchikta rikuchinanchik tiyan. Ajinamanta, ni jaykʼaq sapayakunqankuchu (Marcos 10:28-30, ñawiriy).

19. Soltero kachkaspa, ¿imatataq ruwayta atiwaq?

¹⁹ Kay yachaqanapiqa, ñawpa tiempopi, kunan tiempopi ima, solteros kaqkuna Diospaq kusisqas llamkʼasqankuta rikunchik. Qampis munasqaykirayku chayrí wak imasrayku soltero qhipakunki chayqa, kay yachakusqanchik solterojina Diospaq kusisqa llamkʼanallaykipaqpuni, mayta yanapasunanta munayku. Regalosmanta parlarina: wakin regalostaqa, mayta suyanchik, wakintataq mana suyachkaptillanchik japʼinchik. Wakin regalostarí japʼiytawan may allinpaq qhawanchik, wakinkunatataq tiempo pasasqanmanraq allinpaq qhawanchik. Soltero kaytapis kikillantataq qhawanachik. Soltero kachkaspa, ¿imatataq ruwawaq? Jehovaman qayllaykuy, paypaq tukuy sunqu llamkʼay, munakuyniykitataq wakkunaman rikuchiy. Casarasqa kay, soltero kaypis Diospa sumaq regalon, chayta Dios allinpaq qhawasqanta yachaspa allillanpaqtaq qhawasunchik.

¿Yuyarikunkichu?

• ¿Imaraykú soltero kay Diospa regalon kasqanta nisunman?

• ¿Imaraykú wayna kachkaspa soltero qhipakuy juk bendición?

• ¿Imaynasmantá soltero cristianos, Jehovaman astawan qayllaykunkuman, wakkunamanpis munakuyninkuta rikuchinkuman?

[Tapuykuna]

[18 paginapi dibujos/fotos]

Soltero kachkaspa, ¿Diospaq astawanchu llamkʼachkanki?