1. ¿Imaraykutaj niña pacienciakuyta atisunmanchu?

SATANASPA sajra pachanpa tukukuynenqa 1914 watapi qallarerqa, Cristo janaj pachapi kamachiyta qallarisqantawan. Jesusqa janaj pachapi Satanasta, supaykunasnintawan maqanakupi atipaytawan, paykunata kay pachaman wijchʼumorqa (Apocalipsis 12:7-9 leey). Satanastaj “paypaj pisi tiempollaña kasqanta” yachan (Apo. 12:12). Jinapis, 1914 watamantapacha pachaj watas jinaña pasan. Diospa wakin kamachisnintaj ancha unayña kasqanta yuyankuman. Noqanchejpis, Jehová kay sajra pachata tukuchinanta suyashaspa, niña pacienciakuyta atisunmanchu.

2. ¿Imatataj kay yachaqanapi ukhuncharisun?

² Niña pacienciakusunmanchu chayqa mana allin yuyaywan imatapis ruwasunman. ¿Imataj yanapawasunman pacienciawan suyakunallapajpuni? Chay tapuyta kutichinapajqa kay tapuykunata ukhuncharisun: 1) ¿Imatataj profeta Miqueas pacienciakusqanmanta yachakunchej? 2) ¿Imas kasqantaj rikuchenqa niña suyakunanchejchu kasqanta? 3) ¿Imaynatá Jehová pacienciakusqanmanta agradecekusunman?

3. ¿Imayna runastaj israelitas Miqueaspa tiemponpi karqanku?

³ (Miqueas 7:2-6 leey.) Miqueasqa sajra rey Ajaz kamachishajtin, israelitas pisimanta pisi niña cheqa sonqochu kasqankuta rikorqa. Payqa israelitas “uj khishka jinamin” kasqankuta nerqa, jinallataj “ithapallu jina”. Imaynatachus khishkasta llujchirejtinchej khishkaykuwanchej, ajinallatataj paykunaqa sajrata ruwasqankuwan wajkunata ñakʼaricherqanku. May sajramanpuni tukusqankuraykutaj, niña familiapipis munanakuy karqachu. Miqueastaj ni imata ruwayta atisqanta reparaspa, Jehovaman llakiyninta willakorqa. Chantá pacienciawan suyakorqa, Jehová maychus tiemponpi allinchananpi atienekuspa.

4. ¿Ima llakiykunapitaj kay tiempopi rikukunchej?

 ⁴ Noqanchejpis Miqueaspa tiemponpi jinallataj, imallatapis paykunallapaj munajkuna chaupipi kausanchej. Ashkha runasqa “mana graciasta qoyta yachajkuna, Diosta mana manchachikojkuna, mana sonqoyojkuna” ima kanku (2 Tim. 3:2-4). Vecinosninchej, llankʼaymanta chayri yachaywasimanta compañerosninchej ajina kasqankuta rikuspataj llakikunchej. Chaywanpis, wakin cristianosqa aswan llakiypiraj rikukunku, imajtinchus Jesusqa familiallankutaj paykunaman churanakunanta nerqa. Nisqantaj Miqueas 7: 5, 6 versiculospi nisqanman rijchʼakun. Jesús nerqa: “Noqaqa runasta tʼaqanachej jamuni: Churita tatanmanta, ususita mamanmanta, ñojchʼatapis suegranmanta. Ajinamanta runaj enemigosnenqa wasillanmantataj kanqanku”, nispa (Mat. 10:35, 36). Arí, familianchejmanta mana cristiano kajkuna asipayawasqanchejta, chejnikuwasqanchejta ima muchoyqa mana atikullanchu. Jinapis sinchʼita sayana, cheqa sonqollapuni kana, pacienciawantaj suyakuna Jehová chayta allinchananta. Jehovamanta yanapata mañakusun chayqa pay kallpachawasun, yachaytataj qowasun.

5, 6. ¿Imastataj Miqueas pacienciakusqanrayku rikorqa, chaywanpis ima profecía juntʼakusqantataj mana rikorqachu?

⁵ Miqueasqa pacienciakusqanrayku rey Ajaz wañuchisqa kasqanta, kamachiynin tukukapusqanta ima rikorqa, jinallataj cuentanmanta Ezequías kamachiyta qallarisqantapis, pichus israelitasta yanaparqa Diosta watejmanta yupaychanankupaj. Chantapis Miqueasqa rikullarqataj Samariaj contranpi qhelqasqan imaynatachus juntʼakusqanta. Chaytaj karqa asirios Israelpa chunka ayllusninpa llajtasninta japʼikapushajtinku (Miq. 1:6).

⁶ Chaywanpis, Miqueasqa Jehová imastachus qhelqananpaj yuyaychasqanta mana tukuynintachu juntʼakojta rikorqa. Sutʼincharinapaj, kayta qhelqarqa: “Jaqay qhepa kaj pʼunchaykunapeqa, maypichus Tata Diospa Templon kashan, chay orqoqa aswan jatumpaj qhawasqa orqo kanqa. Tukuy orqosmanta aswan jatumpuni kanqa, tukuy nacionestaj chayman jamonqanku. May chhika naciones jamuspa, nenqanku: Jamuychej, Tata Diospa orqonman wicharinachej”, nispa (Miq. 4:1, 2). Miqueasqa chay profecía juntʼakusqanta mana rikojtinpis, wañupunankama Jehovaman cheqa sonqo kayta munarqa, wajkuna imata ruwajtinkupis. Chayrayku nerqa: “Waj nacionesqa dioskunankoj sutinkupipis purichunku; noqanchejrí Señorninchej Tata Diospa sutimpi purisunchej wiñaypaj”, nispa (Miq. 4:5). ¿Imaraykú Miqueas chay ñakʼariy tiempopi pacienciawan suyakuyta aterqa? Jehová tukuy nisqasninta juntʼananmanta mana iskayrayasqanrayku. Arí, chay cheqa sonqo profetaqa Jehovapi atienekorqa.

7, 8. 1) ¿Imaraykutaj Jehovapi atienekusunman? 2) ¿Imata ruwajtinchejtaj tiempo ima jina riponqa?

⁷ ¿Miqueas jinallatajchu Jehovapi atienekunchej? Noqanchejqa Miqueaspa qhelqasqanta juntʼakojta rikushanchej. Kay “qhepa kaj pʼunchaykunapeqa” may chhika runas tukuy nacionesmanta, ayllusmanta, tukuy parlaykunamantawan, “maypichus Tata Diospa Templon kashan”, chay orqoman wicharinku. Paykunamanta ashkhasqa purajmanta chejninakoj suyusmanta kanku. Chaywanpis “espadasninkuta rejasman” tukuchinku, “nitaj wañuchinaku maqanakupajpis” wakichikunkuchu (Miq. 4:3). ¡May sumaj Jehovaj llajtanmanta kayqa!

⁸ Jehová kay sajra pachata chinkachinantaqa mayta munashanchej. Chaywanpis, pacienciawan suyakunapajqa Pay jina yuyananchej tiyan. Jehovaqa uj pʼunchayta wakichinña “kachamusqan runanejta”, nisunman Jesucristonejta runasta juzgananpaj (Hech. 17:31). Chaywanpis niraj chay kashajtin, Jehovaqa runas salvasqa kanankupaj cheqa kajta rejsinankuta, chayman jinataj kausanankuta munan. Arí, runaspa  kausayninkoqa wañuy patapi kashan (1 Timoteo 2:3, 4 leey). Runa masinchejman Diosmanta yachachinapaj tiemponchejta churasun chayqa tiempo ima jina riponqa. Tumpamantawanqa ichapis ujllata chay tiempo tukukaponqa. Chay kajtintaj, Reinomanta willanapaj tiemponchejta churasqanchejmanta mayta kusikusun.

9-11. ¿Juntʼakunñachu 1 Tesalonicenses 5:3 nisqan? Sutʼinchariy.

⁹ (1 Tesalonicenses 5:1-3 leey.) Tumpamantawanqa naciones kayta nenqanku: “Tukuy imapis allillan; ni imamanta llakikuna kanchu”, nispa. Chayta nisqankuwan mana chʼaukiyachikuyta munanchejchu chayqa Pabloj nisqanta kasukuna. Pay nerqa: “Ama puñuspa qhawana. Chʼaki sonqo runas jina yuyayninchejpi kana”, nispa (1 Tes. 5:6). Chayrayku, imastañachus naciones ruwasqankumanta parlarina. Chaytaj, rijchʼarisqallapuni kanapaj yanapawasunchej.

¹⁰ Nacionesqa ñaupaj kaj guerra mundial tukukojtin allin kausay kananta munarqanku, jinallataj iskay kaj guerra mundial tukukusqantawanpis. Ñaupaj kajpeqa Liga de Naciones nisqata sayarichikorqa, allin kausayta apamunanta suyaspa. Iskay kaj guerra tukukusqantawantaj, Naciones Unidas nisqatañataj sayarichikorqa, mayqenpichus runas mayta atienekorqanku. Suyusta kamachejkuna, religionta kamachejkunapis, chay organizaciones allin kausayta apamunanta suyarqanku. Sutʼincharinapaj, Naciones Unidas nisqaqa tukuy yachanankuta 1986 watata, Jallpʼantinpi Allin Kausay Wata nispa suticharqanku. Chay watapeqa ashkha kamachejkuna, religionta kamachejkuna ima Católica Iglesiata umachajwan Italia suyupi Asís llajtapi tantakorqanku, allin kausay kananta mañakunankupaj.

¹¹ Chaywanpis chay kutispi, waj kutispipis allin kausaymanta parlasqanku, mana 1 Tesalonicenses 5:3 versiculopi nisqanta juntʼarqachu. ¿Imaraykú? Imaraykuchus “ujllata [...] tukuchisqa kanqanku” nikusqanqa niraj juntʼakunchu.

12. ¿Imatataj yachanchej “Tukuy imapis allillan; ni imamanta llakikuna kanchu”, nispa nikunanmanta?

 ¹² ¿Pitaj “Tukuy imapis allillan; ni imamanta llakikuna kanchu”, nispa nenqa? ¿Ujchakonqankuchu chay nikusqanman llulla religionesta kamachejkuna? ¿Imatá ruwanqanku nacionesmanta kamachejkuna chayta nikushajtin? Bibliaqa mana chayta sutʼinchanchu. Chaywanpis, imaynachus kananta mana yachajtinchejpis chayri creenapaj jina kajtinpis, chay nikusqanqa runata llutʼaykunallapaj kanqa. Imajtinchus kay sajra pachaqa Satanaspa makillanpipuni kakushanqa, chantapis qʼala ismusqañapis chayri mullphasqañapis kanman jina kashan, jinallapunitaj kanqa. Chayrayku, mayta pantasunman chay nisqankupi atienekuspa, kay pachamantaj ujchakuspaqa.

13. ¿Imaraykutaj ángeles chinkachiy wayrasta jarkʼashanku?

¹³ (Apocalipsis 7:1-4 leey.) Noqanchejqa 1 Tesalonicenses 5:3 versiculopi nisqan juntʼakunanta suyashanchej. Chay juntʼakunankamataj, atiyniyoj angelesqa manchay ñakʼariy wayrasta jarkʼashanku. ¿Imatataj suyashanku? Apóstol Juan nisqanman jinaqa “Diosninchejpa kamachisninta” nisunman ajllasqa cristianosta wiñaypaj sellakunanta. * Tukuyninku wiñaypaj sellasqa kajtinkutaj, angelesqa chay chinkachiy wayrasta niña jarkʼanqankuchu. ¿Imataj chay jawa kanqa?

14. ¿Imataj rikuchin Jatun Babiloniaj tukukuynin qayllitapiña kasqanta?

¹⁴ Jatun Babiloniaqa mayqenchus tukuy llulla religioneswan ninakun, chinkachisqa kanqa. Chay kajtintaj “ashkha runas”, “jatuchaj naciones, tukuy laya parlayniyojkuna ima” niña payman kutisqachu kanqanku. Tukukuynin qayllapiña kasqantaj rikukushanña (Apo. 16:12; 17:15-18; 18:7, 8, 21). Arí, kunanña rikukushan, imajtinchus telenejta, radionejta, waj imasnejtapis tukuynejpi uyarikushan religionespa contranpi, jinallataj kamachejkunasninkoj contranpipis rimakusqanta. Chaytaj rikuchin manaña runas paykunapi atienekushasqankuta. Jinapis, Jatun Babiloniata kamachejkunaqa ni imamanta phutikunankuchu kasqanta yuyanku. Chay jinata yuyaspataj, ¡mayta pantashanku! “Tukuy imapis allillan; ni imamanta llakikuna kanchu” nikusqantawanqa Satanaspa pachanmanta políticos, llulla religionpa contranpi ujllata oqharikuspa qʼalata, wiñaypajtaj chinkachenqanku. Chayrayku, allin kanman chaykunata rikunapaj tumpata suyarikunallanchej (Apo. 18:8, 10).

15. ¿Imaraykutaj Jehová pacienciakushallanpuni?

¹⁵ Jehovaqa runas sutinta pisipaj qhawajtinkupis, chayta allinchananpaj pacienciawan suyashan. Imaraykuchus Payqa mana munanchu allin sonqoyoj runas chinkayman rinankutaqa (2 Ped. 3:9, 10). ¿Jehová jinachu noqanchejpis yuyanchej? Niraj chay pʼunchay chayamushajtin, ¿imaynasmantataj rikuchisunman Jehová pacienciakusqanmanta agradecekusqanchejta? Chayta qhawarina.

16, 17. 1) ¿Imaraykutaj chiriyasqa kajkunata yanapananchej tiyan? 2) ¿Imaraykutaj paykuna usqhayllata Jehovaman kutinpunanku tiyan?

¹⁶ Chiriyasqa kajkunata yanapana. Jesús nerqa uj chinkasqa ovejita tarisqa kajtin, janaj pachapi may kusiy kasqanta (Mat. 18:14; Luc. 15:3-7). Cheqamanta nisunman Jehovaqa sutinta munakorqanku chaykunamanta llakikusqanta, kunan chiriyasqa kashajtinkupis. Paykunata qotuchakuyman kutirimunankupaj yanapajtinchejqa Jehová, angelespis mayta kusikunku.

¹⁷ Qanrí, ¿niñachu Diosta yupaychana imasta ruwashanki? Ichapis uj hermano  sonqoykita nanachisusqanrayku, niña tantakuykunaman rishankichu. ¿Unayñachu chay karqa? Jina kajtenqa kaykunata tapurikuy: “¿Aswan allintachu kausakuni? ¿Aswan kusisqachu kani? ¿Jehovachu sonqoyta nanachiwarqa chayri uj juchasapa runachu? ¿Maykʼajllapis Jehová noqawan sajrachu karqa?”, nispa. Cheqamantapuni nisunman Tata Diosqa noqanchejwan may kʼacha kasqanta. Payqa sonqonta nanachejtinchejpis, allin kaj imasta qollawanchejpuni (Sant. 1:16, 17). Chaywanpis, Jehovaj pʼunchaynin qayllapiña kasqanrayku, kunan tiempo kashan munasqa Tatanchejman, qotuchakuyman ima kutinpunaykipaj. Imajtinchus chayllapimin jarkʼasqa kayta atinchej (Deu. 33:27; Heb. 10:24, 25).

18. ¿Imaraykutaj qotuchakuyta ñaupajman apajkunata kasukuna?

¹⁸ Qotuchakuyta ñaupajman apajkunata kasukuna. Jehovaqa uj kʼacha michej jina pusawanchej, jarkʼawanchejtaj. Chaytataj, Kuraj Kaj Michej Jesusnejta ruwashan (1 Ped. 5:4). Chantapis, Jallpʼantinpi pachaj waranqa kuraj qotuchakuykunata may chhika michejkuna qhawashanku (Hech. 20:28). Paykunata tukuy sonqo kasukuspaqa Jehovata, Jesusta ima tukuy imata noqanchejrayku ruwasqankumanta, mayta agradecekusqanchejta rikuchinchej.

19. ¿Imaynatataj astawan ujchaykukusunman?

¹⁹ Astawan ujchaykukuna. ¿Imataj chay niyta munan? Sumaj wakichisqa soldadosqa contrankupi enemigosninku oqharikojtinku, astawan ujchaykukunku. Ajinamanta sinchʼita sayanku, nitaj atipachikullankuchu. Satanaspis Diospa llajtanpa contranpi astawan oqharikushan. Chayrayku mana noqanchejpura phiñanakuna tiempochu. Astawanqa kunan tiempo kashan ujchaykukunapaj, pantaykunasninchejta qonqayman churanapaj, Jehovapitaj atienekunapaj.

20. ¿Imatataj kunan ruwananchej tiyan?

²⁰ Tukuyninchej rijchʼarisqa kana, salvawajninchej Diosnillanchejpitaj suyakuna. Chantapis, “Tukuy imapis allillan; ni imamanta llakikuna kanchu” nikunanta, jinallataj ajllasqa cristianos wiñaypaj sellasqa kanankutapis pacienciawan suyakunallapuni. Chantataj, tawantin ángeles chinkachiy wayrasta kachaykamonqanku, Jatun Babiloniataj chinkachisqa kanqa. Chay imas kananta suyashaspa Jehovaj llajtanta ñaupajman apajkunata kasukunallapuni. Satanaspa, jinallataj supaykunasninpa contrankupi sinchʼita sayaykunapaj astawan ujchaykukuna. Chantapis uj salmista nisqanman jina ruwana, pay nerqa: “Sonqochakuychej kallpachakuychejtaj, Tata Diospi tukuy suyakojkuna”, nispa (Sal. 31:24).