KAY tiempopi pillatapis pʼachasninta llikʼirakojta rikuspa ichapis loco kasqanta yuyasunman. Chaywanpis Biblia nisqanman jina, ñaupa tiempomanta runas sinchʼi phutisqa, llakisqa, kʼumuykachachisqa, rabiasqa kasqankuta rikuchinankupaj pʼachasninkuta llikʼej kanku.

Sutʼincharinapaj: Rubenqa, Joseta wata runa kananpaj vendeykusqankurayku mana yanapayta atisqanta yachaspa ‘llakiywan pʼachasninta llikʼikorqa’. Tatan Jacobpis, Joseta uj sajra animal mikhuykusqanta yuyaspa pʼachasninta llikʼikullarqataj (Gén. 37:18-35). Jobpis, wawasnin wañupusqankuta yachaspa “pʼachasninta llikʼirakorqa” (Job 1:18-21). Kuraj kaj sacerdote Eliman israelitas, iskaynin wawasninpiwan wañurachisqa kasqankuta, Diospa arcantapis filisteos apakapusqankuta willaj soldadoj “pʼachasnin[pis] llikʼirasqa” kasharqa (1 Sam. 4:12-17). Josiaspis, leymanta librota leejta uyarispa “pʼachasninta llikʼikorqa”, imaraykuchus repararqa Diospa llajtan mana chayman jinachu ruwashasqanta (2 Rey. 22:8-13).

Jesusta jatun juntapi wañuchinankupaj tumpashajtinku kuraj kaj sacerdote Caifás “pʼachasninta llikʼirak[orqa]”. Imajtinchus yuyasqanman jina Jesús Diospa contranta rimasharqa (Mat. 26:59-66). Judíos yachachisqankuman jina, pillapis Diospa contranpi rimajta uyarispa pʼachasninta llikʼikunan karqa. Jerusalén templo thuñisqa kasqanmanta qhepamantaj kaytañataj yachacherqanku: “Diospa contranpi rimajta uyarejqa mana pʼachasninta llikʼikunanchu tiyan, llikʼikunman chaytaj chay pʼachan qʼala llikʼirasqa kanqa”, nispa.

Arí, cheqamanta sinchʼita sonqonta nanachikuspa uj runa pʼachanta llikʼikojtillan Jehovaqa allinpaj qhawaj. Chayrayku llajtanman nerqa: “Qankunaqa [...] Diosman kutirikampuychej. Pʼachasniykichejta llikʼinaykichejtaqa, sonqoykichejta llikʼiychej”, nispa (Joel 2:13).