Bibliaqa wañupojpa ayanta ruphachiyta mana juchachanchu.

Astawanpis Bibliaqa, wakin runaspa ayanku, tullusninku ima ruphachisqa kasqanmanta parlan (Jos. 7:25; 2 Cró. 34:4, 5). Chayta ruwasqankutaj chay runas mana pʼampanapaj jina kasqankuta rikuchej. Chaywanpis mana jinapunichu karqa.

Rey Saulmanta, kinsantin wawasninmantawan parlarina. Paykunaqa filisteoswan maqanakushaspa wañorqanku. Saulpata ujnin wawan Jonatán karqa, Davidpa munasqa amigon. Galaadpi kashan, chay Jabes llajtapi tiyakojkunaqa, filisteos Saulta, wawasnintawan wañuchisqankuta uyariytawan, ayasninkuta Bet-sán perqamanta orqhomuspa ruphaykucherqanku, tullusninkutataj pʼampaykorqanku. Davidtaj jatunpaj qhawarqa chay ruwasqankuta (1 Sam. 31:2, 8-13; 2 Sam. 2:4-6).

Bibliaqa wañusqas kausarimunankuta nin, nisunman Dios watejmanta wañusqasman kausayta qonanta. Ayasninku ruphasqa kajtin chayri manapis, Jehovaqa kausarichenqa. Tʼukurinachej kinsa cheqa sonqo hebreospi, paykunataqa rey Nabucodonosor nina laurashaj hornoman wijchʼuykucherqa. Paykunataj mana manchachikorqankuchu ruphasqas wañuyta, Jehová paykunata kausarichiyta atisqanta yachasqankurayku (Dan. 3:16-18). Jehovaj wakin kamachisnin ruphasqas chayri waj jinasmanta wañorqanku, ayasninkumanta ni ima yachakojtinpis kausarimonqanku. Hitlerpa kamachiyninpi cheqa sonqo cristianos presochasqa kashaspa wañorqanku, paykunaj ayasninku ruphachisqa kajtinpis kausarimonqanku (Apo. 20:13).

Jehovaqa uj runata kausarichinanpaj mana ayantachu necesitan. Chay cheqa kasqanta yachanchej ajllasqa cristianospa kausayninkupi. Imaynatachus Jesús ‘espiritupi kausarimorqa’ ajinallatataj ajllasqa cristianosqa cielopi kausanankupaj kausarimunku. Paykunataj imayna kʼacha kaykunasniyojchus karqanku, chay kʼacha kaykunasniyojllataj kausarimonqanku (1 Ped. 3:18; 1 Cor. 15:42-53; 1 Juan 3:2).

Wañusqas kausarimunankupi suyakuyninchejqa, Jehová wañusqasta kausarichimuyta atisqanpi, nisqasninta juntʼayta munasqanpi creesqanchejmanta kashan (Hech. 24:15). Ñaupa tiempopi imaynatachus wañusqasta kausarichisqanta mana yachanchejchu, nillataj yachanchejchu imaynatachus qhepaman kausarichinantapis. Chaywanpis Jehová wañusqasta kausarichinanpi atienekunchej, Jesusta kausarichisqanrayku (Hech. 17:31; Luc. 24:2, 3).

Uj cristianoqa, familianmanta pillapis wañupojtin ayanta ruphachiytachus manachus ajllananpaj, suyunpi imatachus runas nisqankupi, imatachus leyes nisqanpi, waj imaspi ima tʼukurinan tiyan (2 Cor. 6:3-5). Chayrayku ayata ruphachiyta chayri manapis sapa uj chayri familia jina ajllana tiyan.