KAY 1870 watapi uj qotu runas Pittsburghpi (Allegheny, Pensilvania, Estados Unidospi) Diospa Palabranta ukhunchayta qallarerqanku. Chay qotitutataj Charles Taze Russell ñaupajman apasharqa, Jesuspa wañuyninmanta ukhunchaytawantaj, repararqanku Diospa munaynin juntʼakunanpaj Jesuspa wañuynin yanapasqanta. Paykunaqa maytachá kusikorqanku, Jesuspa wañuyninrayku tukuy runas salvakuyta atisqankuta yachaspa. Chaytaj sapa wata Jesuspa wañuyninta yuyarinankupaj tanqarqa (1 Cor. 11:23-26).

Hermano Russellqa, Zionʼs Watch Tower (La Torre del Vigía de Sión) revistata orqhorqa, chaypitaj qhelqarqa Jesuspa wañuyninnejta Dios munakuyninta rikuchiwasqanchejta. Chay revistaqa, Jesuspa Wañuyninta Yuyarinapaj tiempo “may sumaj tiempo” kasqanta nerqa. Chantapis leejkunata yuyaycharqa, Pittsburghpi, waj lugarespi, juchʼuy qotituspipis Jesuspa Wañuyninta Yuyarinapaj tantakuyta ruwanankuta. Nerqataj, kinsa chayri iskay manachayri ujllapis kajtinku, “Jesucristo paykunawan khuska kananta”.

Sapa wata Pittsburghman Jesuspa Wañuyninta Yuyarinapaj tantakuyman rejkuna, astawan yapakorqanku. Chay tantakuypaj invitaciontaj “kay tantakuypeqa kʼacha runaswan tinkunki, risqaykichejmantataj kusikonqanku”, nerqa. Jinapunitaj karqa. Pittsburghmanta hermanosqa, chay tantakuyman rej hermanosta wasinkuman wajyarikoj kanku, mikhuytapis qoj kanku. Kay 1886 watapitaj Jesuspa Wañuyninta Yuyarinapaj tiempopi ashkha pʼunchaykunata “Tukuypaj Tantakuy” ruwakorqa. Watch Tower revistataj nerqa: “Kay tantakuymanqa, Jesusta, hermanosninta, cheqa kajta ima munakusqaykichejrayku jamuychej”, nispa.

Bibliamanta Yachaqajkunaqa Pittsburghpi ashkha watasta Jesuspa Wañuyninta Yuyarinapaj tantakuykunata wakicherqanku, chaymantaj Jesuspa wañuyninpi creejkuna rej kanku. Pisimanta pisitaj paykuna yapakorqanku, chay tantakuykunatapis pachantinpi astawan ruwarqanku, chay tantakuykunaman rejkunapis yapakullarqataj. Ray Boppqa Chicagopi kaj eclesia nisqamanta (kunanqa qotuchakuy nikun) karqa, nisqanman jina 1910 wata chaynejpi imaswanchus Jesuspa wañuyninta yuyarikoj chaykunataqa unaypi pasaj kanku. Imaraykuchus tukuyninkupunisina tʼantata mikhoj kanku, vinotapis ujyaj kanku.

 ¿Imaswantaj Jesuspa wañuyninta yuyarej kanku? Jesús Señorpa Cenanta ruwashaspa vinota apaykachasqanta yachakojtinpis, Watch Tower revistapeqa pisi kallpasta mana urmachinapaj, uvasmanta chayri chayasqa uvas pasasmanta jugollawan yuyarinata uj tiempota yuyaychakorqa. Vinowanpuni yuyarina kasqanta nejkunapajtaj vino kaj. Tiemponmantaj, Bibliamanta Yachaqajkunaqa sutʼita entienderqanku ni imawan yapasqa vino, Jesuspa yawarninwan ninakusqanta.

Jesuspa Wañuyninta Yuyarinapaj tantakoyqa, Jesuspa wañuynin yanapawasqanchejpi tʼukurinankupaj hermanosta yanapaj. Wakin qotuchakuykunapitaj, hermanosqa umallirichikushajtin mayta phutikoj kanku, tantakuy tukukusqantawantaj chʼinllamanta ripoj kanku. Chayrayku 1934 watapi Jehová nisqa libro sutʼincharqa mana llakiywanchu Jesuspa wañuyninta yuyarikunata, manaqa kusiywan. Sutʼinchallarqataj, imaynatachus Jesusta wañuchisqankupi mana anchata yuyanata, manaqa 1914 watapi kamachiyta qallarisqanpi yuyanata.

Kay 1935 watapi Apocalipsis 7:9 nisqan sutʼinchakorqa. Chaypeqa “may chhika runas[manta]” parlan, chaytataj ñaupajpi “ashkha runas” nej kanku. Chay watamantapachataj niña tukuychu Señorpa Cenanpi tʼantata mikhorqanku, vinotapis ujyarqanku. Niraj chay sutʼinchakushajtintaj, yuyaj kanku may chhika runasmanta kajkuna uj qotu runaslla kasqankuta, nitaj sonqo kʼajaywanchu willasqankuta. Chay watatajrí, sutʼinchakorqa chay qotu mana yupay atina kasqanta, kay Jallpʼapi kausakuyta suyakushasqanta ima. Pisi tiemponmantaj Russell Poggensee hermano sumajta tʼukuriytawan nerqa: “Diospa espíritu santon sonqoyman mana sutʼincharqachu janaj pachaman ripunay kasqanta”, nispa. Chay hermano, waj hermanos ima Jesuspa Wañuyninta Yuyarinapaj tantakuypi niña tʼantata mikhojtinkupis nitaj vinotapis ujyajtinku, chay tantakuyman rillarqankupuni.

Jesuspa Wañuyninta Yuyarinapaj tiempopi, astawan willakoj, ajinamanta runas Jesuspa wañuyninta jatunpaj qhawasqankuta rikuchiyta aterqanku. Kay 1932 watapi Bulletin nisqapi cristianosman nikorqa mana tantakuykunallamanchu rinanku kasqanta, manaqa Bibliaj cheqa yachachiyninmanta willamunanku kasqanta. Arí, cheqa cristianos kasqankuta rikuchinanku karqa. Kay 1934 watapi, Bulletin nisqapi willaypi astawan yanapakojkunata wajyarikorqa, chaypajtaj tapurerqa: “¿Jesuspa Wañuyninta Yuyarinapaj tiempopi 1.000 yanapakojkunaman chayasunchu?”, nispa. Ajllasqa kajkunamantaj Informant nisqapi nerqa: “Reinomanta willaspalla cheqamanta kusiyta tarinkichej”, nispa. Tiempo pasasqanman jinataj, kay Jallpʼapi tiyakuyta suyakojkunapis chay kusiyta tarillankumantaj karqa. *

Jehovaj testigosninpajqa, Jesuspa Wañuyninta Yuyarinapaj tantakuy ni imawan kikinchakunchu. Chayrayku ima chʼampaypi rikukuspapis rinkupuni. Kay 1930 watapi Pearl English, hermanan Orawan, chay tantakuyman 80 kilometrosta rerqanku. Misionero Harold Kingtaj China suyupi carcelpi wisqʼasqa kashaspa, Jesuspa Wañuyninta Yuyarinapaj tantakuymanta yarawista, takiykunata ima qhelqarqa. Arrozmanta tʼantata, yana uvasman rijchʼakoj grosellamantataj vinota ruwarqa. Chantapis Europaj inti llojsimuynin ladomanta, Centro Americamanta, Africamanta hermanos qhatiykachasqas, guerraspi kashaspapis chay tantakuyta ruwarqanku. Maypi tiyakuspapis, imayna kashaspapis Jesuspa Wañuyninta Yuyarinapaj tiempopeqa Jehovata, Jesusta ima jatunchanchej.