Ashkha watasta publicacionesninchej sutʼincharqa, Satanás kay pachaman wijchʼuchikamusqantawan ‘Magogmanta Gog’ sutiwan rejsisqa kasqanta. Ajinata sutʼincharqa, imaraykuchus Satanasmanta parlaspa Apocalipsis libro nin Diospa llajtanpa contranpi maqanakuyta umachaj kasqanta (Apo. 12:1-17). Chayraykutaj nej kanchej Gogqa, Satanaspa waj sutin kasqanta.

Kunantaj kayta uj jinamanta sutʼinchakonqa. ¿Imaraykutaj? Uj kaj, Gog chinkachisqa kananmanta parlaspa, Jehovaqa Gogta “aycha mikhu tukuy phawajkunaman, [...] kʼita phiña animalesmantaj” qaraykunanta nerqa (Eze. 39:4). Chantá nillarqataj: “Chay pʼunchaykunapi Gogman uj cheqata Israelpi qosaj [...], imaraykuchus chaynejpi Gogtaqa pʼampanqanku”, nispa (Eze. 39:11). Satanás uj espíritu kasqanrayku aycha mikhu animales payta mana mikhuykunkumanchu, nillataj Jallpʼapipis pʼampasqa kayta atinchu. Bibliaqa sutʼita nin Satanás chinkay chinkay ukhuman waranqa watasta wijchʼuykusqa kananta (Apo. 20:1, 2).

Iskay kaj, Bibliaqa nin waranqa watas tukukuyta Satanás chinkay chinkay ukhumanta llojsimunanta, “nacionesta chʼawkiyaj, kay pachaj tawantin kʼuchupi kashanku, chaykunata, Gogta, Magogtawan. Chaykunatataj wañuchinaku maqanakupaj tantanqa” (Apo. 20:8). ¿Imaynatá Satanás Gogta chʼaukiyanman payllataj Gog kajtin? Rikunchej jina Ezequiel libro, Apocalipsis libro ima Gogmanta parlaspaqa, mana Satanasmantachu parlashan.

Ajina kajtin, pichus Magogmanta Gog kasqanta, pichus Diospa llajtanpa contranpi oqharikunanta ima yachanapajqa Bibliata ukhunchana tiyan. Bibliaqa nin, Diospa llajtanpa contranpi “Magog jallpʼaman[ta Gog]”, “wichay ladomanta kaj” rey, kay pachamanta reykuna ima sayaykunankuta (Eze. 38:2, 10-13; Dan. 11:40, 44, 45; Apo. 17:14; 19:19). ¿Chay ninayanchu kinsa kutita Diospa llajtanpa contranpi sayaykunankuta? Chayqa manasina ajinachu. Imaraykuchus Bibliaqa uj sayaykuyllamanta parlaspa ashkha sutista oqharin. ¿Imaraykú chayta ninchej? Imaraykuchus Biblia niwanchej, Jallpʼantinmanta naciones Diospa llajtanpa contranpi sayaykunankuta, ajinamantataj Armagedón qallarinanta (Apo. 16:14, 16).

Diospa llajtanpa contranpi sayaykunankumanta parlaj versiculosta kikinchaspaqa, sutʼita rikunchej Magogmanta Gogqa mana Satanaschu kasqanta. Manaqa uj qotu ujchasqa  naciones kasqankuta. Chantá, ¿“wichay ladomanta kaj” reychu chay maqanakuta ñaupajman apanqa? Mana yachanchejchu. Ichapis paypuni kanqa, imaraykuchus Jehová Gogman nerqa: “Wichaynejpi kaj karu jallpʼasniykimanta llojsimuspa, ashkha nacionespa soldadosninkuwan khuska puririmunki. Paykunaqa caballospi lloqʼasqa may atiyniyoj ashkha soldados kanqanku”, nispa (Eze. 38:6, 15).

Profeta Danielpis wichay ladomanta kaj reymanta, kikillantataj nerqa: “Inti llojsimuynejmanta, wichaynejmantawan willaykuna chayamonqanku. Chayta uyarispa, wichay ladomanta kaj reyqa mancharisqa qhepakonqa. Chaymanta may phiñasqa llojsenqa, ashkhasta wañurachiyta yuyaspa. Chay reyqa toldosninta sayaykuchenqa Jatun Qochawan, Diospaj tʼaqasqa may uyarisqa orqowan, chay chawpipi. Chaypi wañunan hora chayamonqa, manataj pipis payta yanaparej kanqachu”, nispa (Dan. 11:44, 45). Danielpa nisqanqa, Ezequiel Gogmanta nisqanman rijchʼakun (Eze. 38:8-12, 16).

¿Imataj kanqa Diospa llajtanpa contranpi sayaykusqankumanta qhepaman? Daniel 12:1 nin: “Chaypacha nacionniykita qhawaj kuraj kaj ángel Miguelqa rikhurimonqa. Chaypachaqa llakiy kanqa. Chay jina llakeyqa manapuni jaykʼajpis karqachu runas kasqankumantapacha”, nispa. Kaytaj manchay ñakʼariy tiempomanta parlashan. Chay versiculoj tukukuyninpi nillantaj: “Aylluykimantaqa sutisninku qhelqasqa kajkunalla salvasqa kanqanku”, nispa. Kayqa Jesucristo, Armagedonpi jarkʼanawanchejrayku maqanakunanpaj 1914 watamantapacha rey jina churasqa kasqanta niyta munan. Apocalipsis 19:11-21 versiculospis, Diospa llajtanpa contranpi sayaykusqankumanta qhepaman Jesucristo imatachus ruwananta sutʼinchallantaj.

Apocalipsis 20:8 versiculopi Gogmanta, Magogmanta ima parlan. ¿Pikunataj kanku? Waranqa watas tukukusqantawan Jehovaj contranpi oqharikoj runas kanku, pikunachus jatun pruebapi Diospa kamachisninman sayaykonqanku. Chay runasqa Magogmanta Gog jina Diospa llajtanta chejnikonqanku. Diostaj imaynatachus Magogmanta Gogta Armagedonpi chinkachenqa, ajinallatataj wiñaypaj chinkachenqa (Apo. 19:20, 21; 20:9). Chayraykuchá Bibliaqa, waranqa watas tukukusqantawan Diospa contranpi oqharikojkunata Gog, Magog nispa sutichan.

Mayta yachayta munashanchej pichus ‘wichaynejmanta rey’ kananta. Diospa llajtanpa contranpi sayaykunankupaj nacionesta pipis ñaupajman apajtin, kay imasqa kanqapuni: Uj kaj, Magogmanta Gog, soldadosnin ima atipasqas, chinkachisqas ima kanqanku. Iskay kaj, reyninchej Jesucristo salvawasunchej, mosoj pachapitaj kausakojta saqewasunchej, maypichus cheqamanta allin kausaylla kanqa (Apo. 7:14-17).