1. 1) ¿Imaraykutaj Satanasman churanakunanchej tiyan? 2) ¿Imaynatá yachanchej Satanasta atipayta atisqanchejta?

SATANASQA ajllasqa cristianoswan, “waj ovejas[manta]” kajkunawan ima maqanakushan (Juan 10:16). Pisi tiempollaña paypaj kasqanta yachasqanraykutaj, Jehovaj kamachisninpa creeyninkuta chinkachiyta munan (Apocalipsis 12:9, 12 leey). Chayrayku payta atipanapajqa, payman churanakunallanchejpuni tiyan. Biblia nin: “Kuraj Supaypa contranta sinchʼita sayaychej, paytaj qankunamanta ayqenqa”, nispa (Sant. 4:7).

2, 3. 1) ¿Imaraykutaj Satanás mana munanchu pay kasqantapuni runas yuyanankuta? 2) ¿Imaynatá yachanchej Satanás kasqantapuni?

² Ashkha runas Satanás mana kasqanta creenku. Paykunapajqa Satanás, supaykuna ima, librospi, manchachikunapaj jina peliculaspi, videojuegospi ima rikhurej runaslla kanku. Chantapis mana yuyayniyojkunalla sajra espirituspi creesqankuta ninku. Satanasqa munan runas ajinata yuyanankuta. ¿Imaraykutaj? Imaraykuchus ajinata yuyajtinku runasta chʼaukiyayta atillan (2 Cor. 4:3, 4). Chayraykutaj Satanasqa ajinata yuyanankupaj runasta tanqan.

³ Chaywanpis noqanchejtaqa mana chʼaukiyachikunchejchu, imaraykuchus yachanchej Satanás kasqantapuni. Yachallanchejtaj pay, uj katarinejta Evawan parlasqanta, Job interesraykulla Diosta yupaychan nisqanta, Jesusta kinsa kutirayku juchaman  urmachiyta munasqanta, Jesús 1914 watapi rey jina churasqa kasqantawan, Jallpʼapiraj kaj ajllasqa cristianoswan ‘maqanakusqanta’ ima (Gén. 3:1-5; Job 1:9-12; Mat. 4:1-10; Apo. 12:17). Kunankamapis Satanasqa Diospa tukuy kamachisninwan maqanakushallanpuni. Payta atipanapajtaj, contranpi maqanakunallapuni tiyan, creeyninchejpis may sinchʼi kanan tiyan. Kay yachaqanapi yachakusunchej imaynatachus Satanaspa kinsa tojllasninmanta jarkʼakunata.

4. ¿Imaraykutaj Satanás jatunchakusqanta ninchej?

⁴ Satanasqa maytapuni jatunchakun. ¿Imaraykutaj chayta ninchej? Imaraykuchus Jehová mana kamachinawanchejpaj jinachu kasqanta nerqa. Chantapis tukuy runaswan yupaychachikuyta munarqa. Rikunchej jina Satanasqa maytapuni jatunchakun, chayrayku payta atipanapajqa mana jatunchakoj runaschu kananchej tiyan, manaqa “kʼumuykukoj sonqoyoj” kananchej tiyan (1 Pedro 5:5 leey).

5, 6. 1) Imatapis allinta ruwasqanchejmanta kusikunanchej, ¿sajrachu? Sutʼinchay. 2) ¿Pikunataj jatunchakorqanku?

⁵ Mana sajrachu noqanchejpi atienekunanchej chayri allinta ruwasqanchejmanta kusikunanchej. Nillataj sajrachu wajkuna imatapis allinta ruwasqankumanta chayri imachus tiyapusqanmanta kusikunanchej. Apóstol Pablo nerqa: “Noqaykoqa Diospa iglesiasnimpi may kusiywan parlayku qankunamanta, imaraykuchus tukuy creeywan pacienciakorqankichej chejniywan qhatiykachasqa, ñakʼarichisqa kashaspapis”, nispa (2 Tes. 1:4). Rikunchej jina wajkuna allinta ruwasqankumanta, noqanchej imatapis ruwasqanchejmanta ima kusikoyqa yanapawasunman. Chayrayku familianchejmanta, llajtanchejmanta, nacekusqanchej llajtamanta ima mana pʼenqakunanchejchu tiyan (Hech. 21:39).

⁶ Jatunchakoj runas kaspaqa, amigosninchejwan mana allintachu kausakusunman, nitaj Jehovamanpis astawan qayllaykuyta atisunmanchu. Nillataj wajkuna yuyaychawasqanchejtapis japʼikuyta munasunmanchu (Sal. 141:5). Jatunchakoj runasqa may kasqankuta, wajkunamanta nisqataj aswan sumaj runas kasqankuta ima yuyanku. Ajinata yuyaj runastataj Jehová chejnikun (Eze. 33:28; Amós 6:8). Satanastajrí, munan runas pay jina jatunchakunankuta. Chayrayku maytachá kusikorqa Nimrod, Faraón, Absalón ima jatunchakojtinku (Gén. 10:8, 9; Éxo. 5:1, 2; 2 Sam. 15:4-6). Cainpis jatunchakullarqataj. Uj kuti Jehovaj yuyaychasqanta mana japʼikorqachu. Kʼullukusqanraykutaj Jehovaj contranpi juchallikuyta mana sajrapajchu qhawarqa. Chayrayku manaña Diospa amigonchu karqa (Gén. 4:6-8).

7, 8. 1) ¿Imaraykutaj wakin runas waj runasta llajtankurayku, rijchʼayninkurayku chejnikunku? 2) ¿Imaraykutaj qotuchakuypi jatunchakuy mana kananchu tiyan?

⁷ Kunanpis runasqa tukuy imaymanamanta jatunchakusqankuta rikuchinku. Wakin kutisqa chayta rikuchinku waj rijchʼayniyoj chayri waj llajtayoj runasta chejnikuspa. ¿Imaraykutaj chejnikunku? Wajkunamanta nisqa paykunaj rijchʼayninku chayri llajtanku aswan sumaj kasqanta yuyasqankurayku. Chayraykutaj ashkhas maqanakunku, guerraspi wañuchinakunku chayri uj qotu runasta wañuchinku.

⁸ Chaykunataj qotuchakuypeqa mana kananchu tiyan. Ichapis jatunchakusqanchejrayku siminakuspa uj jatun chʼampaypi rikukusunman. Ñaupa tiempomanta cristianos ajinapi rikukorqanku. Chayrayku apóstol Santiago nerqa: “Imaraykutaj  qankuna ukhupi tiyan chʼajwas, maqanakus ima?”, nispa (Sant. 4:1). Wajkunata chejnikunchej chayri aswan sumaj kasqanchejta yuyakunchej chayqa, ichapis sonqonkuta nanachinapaj jina imatapis ruwarparisunman chayri parlarparisunman (Pro. 12:18). Rikunchej jina jatunchakoyqa qotuchakuyta tʼaqanachinman.

9. ¿Imaynatá Biblia yanapawanchej mana jatunchakunapaj nitaj wajkunamanta nisqa aswan sumaj kasqanchejta yuyanapaj? (14 paginapi dibujota qhawariy.)

⁹ Bibliaqa yanapawanchej mana jatunchakunapaj, nitaj wajkunamanta nisqa aswan sumaj kasqanchejta yuyanapaj. Sutʼincharinapaj, Proverbios 16:5 versículo nin: “Diosqa runaykachajkunata millachikun”, nispa. Hechos 17:26 versículo nillantaj Jehová “uj runallamanta tukuy [laya] runasta” mirachisqanta. Chayrayku nisunman uj laya runaslla kasqanchejta imaraykuchus tukuypis Adanmanta jamunchej. Arí, Diosninchej wakin runasta astawan sumajta ruwasqanta yuyayqa, mana allinchu. Chayrayku tapurikuna: “¿Waj laya runasmanta, waj llajtayoj runasmanta nisqa aswan sumaj kasqaytachu yuyani?”, nispa. Ajinata yuyaspaqa, Satanás qotuchakuypi munakuyta chinkachinanta, qotuchakuyta tʼaqanachinanta ima saqeshasunman (Juan 13:35). Satanasta atipanapajqa, mana jatunchakunapaj mayta kallpachakuna tiyan (Pro. 16:18).

10, 11. 1) ¿Imatataj Satanás ruwan kay pachaj imasninta munakunapaj? 2) ¿Imataj karqa Demaswan kay pachaj imasninta munakusqanrayku?

¹⁰ Satanás kay pachata kamachishasqanrayku, tukuy ima atiyninpi kashan (Juan 12:31; 1 Juan 5:19). Kay pachapeqa tukuy ima tiyan, chaywanpis mana tukuy imapunichu allin imas kanku. Satanastaj chaykunata apaykachan munayninchejwan atipachikuspa Jehovata mana kasukunapaj. Kay pachaj imasninta munakunapaj, Jehovata mana tukuy sonqochu sirvinapaj imataj tanqawasunman (1 Juan 2:15, 16 leey).

¹¹ Ñaupa tiempomanta wakin cristianospis kay pachaj imasninta astawan munakorqanku. Sutʼincharinapaj, Pablo nerqa: “Demasqa saqerpariwaspa [...] ripun, kay pachaj imasninta munakusqanrayku”, nispa (2 Tim. 4:10). ¿Imatataj Demas munakorqa? Bibliaqa mana chayta ninchu. Ichapis payqa qolqeta munakorqa, astawan Diosta sirvinanmanta nisqaqa. Chayraykutaj Jehovata yupaychaypi sumaj imasta niña ruwayta aterqachu. ¿Chay ruwasqan allinchu karqa? Mana. Imaraykuchus payqa Pabloj yanapajnin jina llankʼayta atillanmanpuni karqa. Nitaj kay pachamanta imapis, Jehovaj qosqan ruwaywan kikinchakorqachu (Pro. 10:22).

12. ¿Imaynatá Satanás qolqeta munapayayman tanqawasunman?

¹² Cristianosqa familianchejta sumajta qhawanapaj trabajayta munanchej (1 Tim. 5:8). Jehovaqa kusisqa kausakunanchejta munan. Imaraykuchus Adanta, Evata ima uj kʼacha huertaman tiyakunankupaj churarqa (Gén. 2:9). Chaywanpis Satanasqa imatachus munasqanchejwan “qhapajyayta munapayay[man]” tanqawasunman (Mat. 13:22). Imaraykuchus ashkha qolqeta ganaspa, tukuy imata rantispa ima astawan kusisqas kananchejta yuyanata munan. Ajinata yuyaspaqa, Diospa ñaupaqenpi niña allinpajchu qhawasqa kasunchej. Chayrayku Jesús nerqa: “Mana pipis atinchu iskay patronesta ujllapi sirviyta, imaraykuchus ujninta chejnenqa, ujnintataj munakonqa; chayri, ujninman kʼaskakonqa, ujnintataj qhesachanqa. Mana atinkichejchu ujllapi sirviyta Diosta, qhapaj  kaytawan”, nispa (Mat. 6:24). Qolqellapi astawan yuyasunchej chayqa, qolqej wata runasninman tukusunchej. Nitaj Jehovata sirviyta atillasunchu. Satanastaj ajinapi rikukunanchejta munan. Chayrayku payta atipanapajqa, ni jaykʼaj yuyanachu ashkha qolqeyoj kay, tukuy imata rantiy ima, Jehovaj amigosnin kanamanta aswan sumaj kasqanta (1 Timoteo 6:6-10 leey).

13. ¿Imatataj ashkha runas qhariwarmi kausaymanta yuyanku?

¹³ Satanaspa waj tojllanqa khuchichakuy jucha. Ashkha runasqa yuyanku qosankuta chayri warminkuta mana wasanchay, casarakuy ima ñaupa tiempo runasllapaj kasqanta, mana tiempoyojta saqesqanta ima. Sutʼincharinapaj, peliculaspi rikhurej uj warmi nin: “Manapuni atikunmanchu, uj qharillawan chayri uj warmillawan kausayqa. Ni pita rejsinichu qosanta chayri warminta mana wasanchajtaqa”, nispa. Peliculaspi rikhurej qharitaj nin: “Ichapis noqanchejqa, mana uj warmillawan chayri uj qharillawan kausanapajchu ruwasqa kanchej”, nispa. Satanasqa maytachá kusikun may rejsisqa runas Diospa regalon qhariwarmi kausaypa contranpi parlajtinku. Payqa mana munanchu qhariwarmis allinta kausakunankuta. Chayrayku payta atipayta munanchej chayqa, qhariwarmi kausayta Jehová jina qhawananchej tiyan.

14, 15. ¿Khuchichakuypi mana urmanaykipaj imasta ruwawaj?

¹⁴ Solteros, casados ima khuchichakuypi mana urmanapaj mayta kallpachakuna tiyan. Chayta ruwaytaj mana atikullanchu. Sutʼincharinapaj, ashkha waynasqa compañerosninkuta uyarinku qhariwarmi jina pillawanpis puñuykusqankumanta, celularnejta qhariwarmi jina puñuykuymanta mensajesta, fotosta ima apachisqankumanta ima mayta jatunchakuspa parlasqankuta. Wakin suyuspeqa ajina mensajesta apachiy, wawasta khuchichachisqankumanta fotosta apachiywan ninakun. Chaywanpis Biblia nin: “Pichus khuchichakojrí cuerpompa contrampi juchallikun”, nispa (1 Cor. 6:18). Ashkha runasqa pillawanpis qhariwarmi jina puñuykuspa millay onqoykunawan chimpachikunku, chayraykutaj wañunku chayri mayta ñakʼarinku. Ashkha waynasqa mana casarakuspalla qhariwarmi jina puñuykunku, aswan qhepamantaj pesachikunku. Ashkha libros, películas, takiykunas imaqa, Diospa leyesninta pʼakejtinchej ni imapis kananta yuyachiwanchej. Chaytaj llulla. Ajinata yuyaymanta mana jarkʼakusunchu chayqa, juchaj chʼaukiyayninpi urmasunman (Heb. 3:13).

¹⁵ Pillawanpis qhariwarmi jina puñuykuyta munanki chay, ¿imatá ruwawaj? “Jucha ruwayman” tanqasqa kayta atisqaykita ama qonqaychu (Rom. 7:22, 23). Jehovamanta kallpata mañakuy (Fili. 4:6, 7, 13). Amataj imatapis chay juchaman urmachisunanpaj jina ruwaychu (Pro. 22:3). Maykʼajllapis chay juchapi urmanaykipaj tanqasqa kashaspataj, usqhayllata qhesachay (Gén. 39:12).

16. 1) ¿Imatataj Jesús ruwarqa Satanás juchaman urmachiyta munajtin? 2) ¿Imatataj Jesusmanta yachakunchej?

¹⁶ ¿Imatá Jesús ruwarqa Satanás juchaman urmachiyta munajtin? Imatachus Satanás qonanta nisqanwan mana chʼaukiyachikorqachu. Nitaj imatachus nisqanpi tʼukurerqachu. Astawanpis usqhayllata “Diosmanta Qhelqasqapi nin”, nispa kuticherqa (Mateo 4:4-10 leey). ¿Imatá Jesusmanta yachakunchej? Payqa Diospa Palabranta sumajta rejserqa, chayraykutaj  Satanás juchaman urmachiyta munajtin, wakin versiculosta yuyarikorqa. Satanasta atipanapajqa, imaschá khuchichakuyman urmanapaj tanqawanchej chay imasta qhesachananchej tiyan (1 Cor. 6:9, 10).

17, 18. 1) ¿Ima tojllastawantaj Satanás apaykachan? 2) ¿Imaraykutaj Satanaspa tojllasnin mana tʼukuchiwanchejchu? 3) ¿Imataj Satanaswan kanqa? 4) ¿Imaraykutaj kallpachawanchej Satanás ni ima suyakuyniyoj kasqanta yachay?

¹⁷ Kay yachaqanapi yachakunchej jatunchakuy, kay pachaj imasninta, qhapajyayta ima munapayay, khuchichakuy ima, Satanaspa tojllasnin kasqanta. Chantapis waj tojllasnin kallantaj. Sutʼincharinapaj, wakin hermanosninchejpa familiaresninkoqa Jehovata yupaychayninkuman churanakunku. Wakintataj compañerosninku asipayanku. Wakin hermanosninchejtaj kamachejkuna mana willajta saqenkuchu chay suyuspi tiyakunku. Tukuy chaytaj mana tʼukunapajchu, imaraykuchus Jesús nerqaña: “Noqarayku tukuy runas chejnisonqachej. Pichus tukukuykama sumajta sayanqa, chay salvasqa kanqa”, nispa (Mat. 10:22).

¹⁸ ¿Imaynatá Satanasta atipasunman? Jesús nerqa: “Diospi japʼicuspapuni allinta sayaskayquichejwan wiñay causayta japʼinquichej”, nispa (Luc. 21:19, Dios Parlapawanchej). Ni pi wiñaypaj chinkachiwasunchu. Jehovaman cheqa sonqosllapuni kasunchej chayqa, ni pi Jehovamanta karunchawasunchu (Rom. 8:38, 39). Cheqa sonqos wañupusunchej chayqa, mana Satanás atipawasunchu, imaraykuchus Jehová kausarichimuwasunchej (Juan 5:28, 29). ¿Imataj kanqa Satanaswan? Dios kay sajra pachata chinkachisqantawan, Cristo waranqa watasta wataykonqa (Apo. 20:1-3). Chaymantataj kacharisqa kanqa, ashkha runastataj chʼaukiyanqa. Chaymantataj chinkachisqa kanqa (Apo. 20:7-10). Rikunchej jina Satanaspajqa mana ima suyakuypis kanchu. Chaywanpis qanqa uj suyakuyniyoj kanki. Chayrayku Satanaswan maqanakunaykipaj kallpachakullaypuni, creeypitaj sinchʼita sayallaypuni. Satanasta atipayta atisqaykimantataj ama iskayrayaychu.