Sonqoman chayananpaj jina tijrachisqa
“Diospa Palabranqa kawsayniyoj.” (HEB. 4:12.)
1. 1) ¿Imatataj Jehová kamacherqa Adanman? 2) ¿Imatataj ruwayta atinchej parlayninchejwan?
JEHOVÁ DIOSQA parlayta atinanchejpaj jina ruwawarqanchej. Payqa Edén huertapi Adanman sapa uj animalman sutita churananta kamacherqa. Adantaj sumajta yuyaychakuspa sapa uj animalman imaynachus kasqanman jina suticharqa (Gén. 2:19, 20). Chaymantapachataj Diospa kamachisnenqa parlayninkuwan Jehovata jatunchanku, wajkunamanpis Diosmanta yachachinku. Kay qhepa wataspitaj chayta ruwanankupaj Bibliata waj parlaykunaman tijrachinku.
2. 1) ¿Imastataj Bibliata tijrachejkuna juntʼanankuta nerqanku? 2) ¿Imatá kay yachaqanapi yachakusunchej?
2 Bibliaqa ashkha qalluspi tiyan, chaywanpis wakin Bibliasqa sumaj tijrachisqas kanku, wakintaj mana. Traducción del Nuevo Mundo nisqa Bibliata Ruwaj Comisionpi llankʼaj hermanosqa, Bibliata cheqanta tijrachinankupaj kinsa imasta juntʼanankuta nerqanku. Ñaupaj kaj, Diospa sutin jatunchasqa kananpaj, ñaupa qhelqasqaspi jina Diospa sutin ashkha kutista rikhurinanpaj churaykapunanku karqa (Mateo 6:9 leey). Iskay kaj, atikusqanman jina sapa palabrata tijrachinanku karqa. Mana atikojtintaj imatachus niyta munasqanta tijrachinanku karqa. Kinsa kaj, leeyta, entiendeyta atinapaj jina palabrasta churananku karqa (Nehemías 8:8, 12 leey). * Jehovaj testigosnenqa kay kinsa imasman jina Bibliata 130 kuraj parlaykunaman tijracherqanku. Kay yachaqanapeqa yachakusunchej imaynatachus kay kinsa imasman jina inglés parlaypi Traducción del Nuevo Mundo nisqa Biblia allinchakusqanmanta, mayqenchus 2013 watapi llojserqa. Chantapis yachakullasuntaj waj qallusman tijrachejkuna kay kinsa imasman jina ruwasqankumanta.
DIOSPA SUTINTA JATUNCHAN
3, 4. 1) ¿Mayqen ñaupa qhelqasqaspitaj Diospa sutin rikhurerqa? 2) ¿Imatataj ruwanku Bibliata wakin tijrachejkuna?
3 Diospa sutenqa hebreo parlaypi 4 letraspi rikhurin. Chantá chay suteqa ñaupa hebreo ashkha qhelqasqaspi rikhurin, Wañusqa Qochapi tarikusqan qhelqasqaspi jina. Septuaginta nisqamanta wakin copiaspipis Diospa sutin rikhurillantaj. Chay copiastaj qhelqakuyta qallarerqa Jesús niraj jamushajtin iskay pachaj watas ñaupajta jina, Jesús jamusqanmanta 100 watasninman jinataj tukukorqa. Ashkha runasqa ñaupa qhelqasqaspi Diospa sutin ashkha kutista rikhurisqanmanta tʼukunku.
4 Diospa sutenqa Bibliapi rikhurinanpuni karqa. Jinapis ashkha Bibliaspi Diospa sutin mana rikhurinchu. Inglés parlaypi Traducción del Nuevo Mundo de las Escrituras Griegas nisqa Biblia llojsisqanmanta, iskay watasninman American Standard Version nisqa Biblia allinchasqa llojsillarqataj. Kay 1901 watapi American Standard Version nisqa Biblia llojsishajtin Diospa sutenqa rikhurerqa, 1952 watapi allinchakojtintaj chay Bibliapi Diospa sutin niña rikhurerqachu. ¿Imaraykú? Imaraykuchus chay Bibliata tijrachejkunaqa Diospa sutinta churay “mana allinchu” kasqanta yuyarqanku. Inglés parlayman ashkha tijrachejkuna, waj parlaykunaman tijrachejkuna ima kikillantataj ruwarqanku.
5. ¿Imaraykutaj Diospa sutin Bibliapi rikhurinanpuni tiyan?
5 Pillapis uj librota tijrachishaspaqa, chay librota qhelqaj imatachus munasqanta yachanan tiyan, chayman jinataj tijrachinan tiyan. Bibliata Qhelqachej Jehovaqa Bibliapi sutin rikhurinanta, runas rejsispa jatunchanankuta munan. Chay cheqa kasqantataj ashkha versículos rikuchiwanchej (Éxo. 3:15, NM; Sal. 83:18; 148:13; Isa. 42:8; 43:10, Quechua de Cuzce; Juan 17:6, 26; Hech. 15:13, 14). Jehová Bibliata qhelqajkunata yuyaycharqa sutinta qhelqanankupaj. Chayrayku ñaupa qhelqasqaspi ashkha kutista sutin rikhurin (Ezequiel 38:23 * leey). Bibliata tijrachejkuna Diospa sutinta orqhorparispaqa, Diosta pisipaj qhawasqankuta nisunman.
6. ¿Imaraykú inglés parlaypi Traducción del Nuevo Mundo nisqa Bibliapi Diospa sutin sojta kutispiwan rikhurin?
6 Kay tiempopi astawanraj rikunchej Diospa sutin Bibliapi rikhurinanpuni kasqanta. Kay 2013 watapi Traducción del Nuevo Mundo nisqa Biblia inglespi llojserqa, chay Bibliapeqa 7.216 kutista Diospa sutin rikhurin, nisunman 1984 watapi orqhokusqanmanta 6 kutispiwan. Chay sojtamanta phishqaqa 1 Samuel 2:25; 6:3; 10:26; 23:14, 16, versiculospi rikhurin. ¿Imaraykú? Imaraykuchus Wañusqa Qochapi kunallanraj tarikusqan qhelqasqaspi chay phishqa versiculospi Diospa sutin rikhurin. * Ujnintaj Jueces 19:18 versiculopi rikhurin, ñaupa qhelqasqasta ukhunchasqankuman jina.
7, 8. ¿Imataj Diospa sutin niyta munan?
7 Cheqa cristianosqa sumajta entiendenanchej tiyan, imatachus Diospa sutin niyta munasqanta. Diospa sutenqa “Pay Imachus Necesitakusqanman Tukun” niyta munan. * Ñaupaj wataspi publicacionesninchejqa Diospa sutin imachus niyta munasqanta Éxodo 3:14 versículo nisqanman jina sutʼinchaj, chay versiculopi nin: “Noqa kani pichus kani chay”, nispa. Kay 1984 watapi Traducción del Nuevo Mundo nisqa Biblia inglespi Jehová munayninta juntʼananpaj imamanpis tukuyta atisqanta sutʼincharqa. * Chaywanpis 2013 watapi Traducción del Nuevo Mundo nisqa Biblia inglespi allinchasqa jinata sutʼincharqa: “Diospa sutenqa mana imamanpis tukunallantachu niyta munan. Astawanqa munayninta juntʼananpaj imatapis chayri pillatapis imallamanpis tukuchiyta atisqanta niyta munan”, nispa. (Bibliata estudianapaj yanapa nisqa folletoj 5 paginanta leeriy.)
8 ¿Imaynatá Jehová munayninta juntʼananpaj imatapis chayri pillatapis imallamanpis tukuchiyta atin? Sutʼincharinapaj, Jehovaqa Noeta arcata ruwajman tukucherqa, Bezaleltataj uj sumaj herreroman. Chantapis Gedeonta sumaj maqanakoj runaman tukucherqa, Pablotataj mana manchachikoj misioneroman. Cheqamantapuni Diospa sutin imachus niyta munasqanqa may sumaj. Chayrayku Traducción del Nuevo Mundo nisqa Bibliata Ruwaj Comisionpi llankʼaj hermanosqa Diospa sutinta mana orqhorqankuchu.
9. ¿Imaraykú Diospa Llajtanta Kamachejkuna munanku tukuy runas parlayninkupi Bibliayoj kanankuta?
9 Traducción del Nuevo Mundo nisqa Biblia 130 kuraj parlaykunapi tiyan, chay Bibliaspi Diospa sutin rikhurisqanqa, Diospa sutinta jatunchan (Malaquías 3:16 * leey). Waj Bibliasta tijrachejkunaqa Diospa sutinta churanankumanta “Señor” palabrata chayri suyunkupi ima diostachus yupaychanku chaypa sutinta churanku. Chayrayku Diospa Llajtanta Kamachejkunaqa tukuy runas parlayninkupi Bibliayoj kanankuta munanku.
SUTʼI, ENTIENDEKUNANPAJ JINA
10, 11. ¿Imaraykutaj inglés parlaypi Traducción del Nuevo Mundo nisqa Biblia waj parlaykunaman mana tijrachikuyta atikullarqachu?
10 Inglespi Traducción del Nuevo Mundo nisqa Bibliata waj parlaykunaman tijrachiyqa mana atikullarqachu. Sutʼincharinapaj, Eclesiastés 9:10 versiculopi, waj versiculospi ima, 1984 watapi llojsej inglés Bibliapi “Seol” palabra rikhurerqa. Inglés parlaypi waj Bibliaspipis chay palabrallataj rikhurerqa. Chaywanpis ashkha parlaykunapi “Seol” palabraqa mana rejsisqachu, nitaj diccionariospipis rikhurinchu. Ashkha runastaj uj lugarpa sutin kasqanta yuyanku. Chayrayku hebreopi “Seol” palabrata, griegopitaj “Hades” palabrata, “sepultura” palabraman tijrachikorqa. Ajinata tijrachikusqantaj aswan sutʼi, entiendeyta atinapaj jina karqa.
11 Hebreopi, griegopi “alma” palabraqa mana waj parlaykunaman tijrachikuyta atikullantajchu. Imaraykuchus chay parlaykunapi “alma” palabra wañupojtinchej imallanchejpis kausashaj qhepakusqanta entiendekun. Chayrayku “alma” palabrata imamantachus uj versículo parlashan chayman jina tijrachikorqa. Traducción del Nuevo Mundo (con referencias) Bibliapi apéndice nisqa imaspajchus “alma” palabrata Bibliapi oqharikusqanta sutʼinchan. Chantá Bibliaj versiculosninta sutʼita entiendenapaj, hebreopi, griegopi palabras imachus niyta munasqanta, paginaj ura kantunpi chʼaskitaspi churakorqa.
12. ¿Imastataj 2013 watapi inglespi Biblia allinchakushajtin ruwakorqa? (“Traducción del Nuevo Mundo inglespi 2013 watapi allinchakun” nisqa yachaqanata leey.)
12 Bibliata waj parlaykunaman tijrachejkunaqa, Diospa Llajtanta Kamachejkunaman cartasta apacherqanku, Diospa Llajtanta Kamachejkunataj chay cartasta leespa repararqanku Bibliaj wakin versiculosninpis ichá mana allintachu entiendekushasqanta. Chayrayku septiembre de 2007 watapi Traducción del Nuevo Mundo nisqa Biblia inglespi allinchakunanta nerqanku. Chay Bibliata allinchashaspataj tijrachejkunaj cartasninkuta sumajta ukhuncharqanku. Mana entiendekoj palabrastataj orqhorqanku, sutʼi, entiendekunanpaj jina kananpajtaj kallpachakorqanku. Rikunchej jina Bibliata waj parlaykunaman tijrachejkunaqa, Traducción del Nuevo Mundo nisqa Biblia inglespi allinchakunanpaj yanaparqanku (Pro. 27:17).
MAY AGRADECESQAS KASHANKU
13. ¿Imatá wakin hermanos ninku Traducción del Nuevo Mundo nisqa Biblia allinchakusqanmanta?
13 Inglespi Traducción del Nuevo Mundo nisqa Biblia allinchakusqanmanta, ashkha hermanos Jehovaj testigosninpa centralninkuman cartasta apacherqanku may agradecesqas kashasqankuta rikuchinankupaj. Sutʼincharinapaj, uj hermana nerqa: “Bibliapeqa may sumaj yuyaychaykuna tiyan, chaytaj may valorniyoj rumisman rijchʼakun. Allinchasqa Bibliata leespaqa, leeyta, entiendeyta atinapaj jinalla kasqanta reparani. Chantapis chay Bibliaqa may kʼachitu, sutʼi, sonqoman chayananpaj jina. Parlayninchejpi jina kasqanraykutaj Jehovata astawan rejsinaypaj, uj munakuyniyoj tata jina munakuywan parlawasqanta, abrazaykuwasqanta ima reparanaypaj yanapawan”, nispa.
14, 15. ¿Imatá hermanos ninku Traducción del Nuevo Mundo nisqa Biblia parlayninkupi kasqanmanta?
14 Inglesta mana parlaj hermanospis may agradecesqas kashanku Traducción del Nuevo Mundo nisqa Biblia parlayninkupi kasqanmanta. Bulgariamanta uj kuraj runa nin: “Bibliata ashkha watasta leerqani. Ni jaykʼajtaj sonqoyman chayananpaj jina, entiendeyta atinaypaj jina uj Bibliata leerqanichu”, nispa. Albaniamanta uj hermana nin: “Albanés parlaypi Bibliaqa may kʼachitu. Jehová parlayninchejpi parlawasqachejqa ¡may sumajpuni!”, nispa.
15 Ashkha suyuspi pisi runaslla uj Bibliayoj kanku, tariyta mana atinapaj jina kasqanrayku chayri ashkha qolqe valesqanrayku. Sutʼincharinapaj, Ruandapi Jehovaj testigosninwan ashkha yachakojkuna, mana ñauparisharqankuchu, Biblianku mana kasqanrayku. Suyunkupi kaj iglesias vendesqanku Bibliasqa mana entiendekojchu, ashkhataj valej. Parlayninkupi Traducción del Nuevo Mundo nisqa Biblia llojsejtintaj tawa wawasniyoj uj familia, Jehovaman, allin kamachi yuyayniyojman ima mayta agradecekorqa. Chay familiaqa Traducción del Nuevo Mundo nisqa Biblia niraj llojsishajtin mana sapa ujninkupaj uj Bibliata rantiyta aterqankuchu, kunantaj sapa ujninku Bibliayoj kanku. Jehovaman may agradecesqa kasqankuta rikuchinankupajtaj familia jina sapa pʼunchay Bibliata leenku.
16, 17. 1) ¿Imatataj Jehová tukuy kamachisninpaj munan? 2) ¿Imatataj ruwayta munanchej?
16 Traducción del Nuevo Mundo nisqa Bibliaqa waj parlaykunapipis orqhokullanqataj. Satanasqa mana munanchu orqhokunanta, Jehovatajrí tukuy kamachisnin leenankupaj jina Palabran sutʼi, entiendekunanpaj jina kananta munan (Isaías 30:21 leey). Tumpamantawantaj “tukuy jallpʼaqa Tata Diosta rejsiywan juntʼa kanqa, imaynatachus mama qochaman yaku juntʼaykun, ajinata” (Isa. 11:9).
17 Tukuy ima yanapasta Jehová qowasqanchejwan yanapachikuna, kay Traducción del Nuevo Mundo nisqa Bibliawan jina, mayqenchus Diospa sutinta jatunchan. Jehovaqa sapa pʼunchay Biblianejta parlawanchej, chayrayku imatachus niwasqanchejta uyarina. Mañakuyninchejtapis uyariyta atin, chayrayku paymanta mañakunapuni. Chayta ruwasunchej chayqa Jehovata astawan rejsisunchej, astawantaj munakusunchej (Juan 17:3).
“Jehová parlayninchejpi parlawasqanchejqa ¡may sumajpuni!”
^ párrafo 2 Kay 1 de julio de 2008 Torremanta Qhawaj revistapi “Imaynatá sumaq Bibliata akllasunman”, nisqa yachaqanata leey.
^ párrafo 5 Ezequiel 38:23 (NM): “Ajinamanta sutʼinchasaj jatun kayniyta, may santo kaj Dios kasqayta ima. Rejsisqa kasaj tukuy runaspa ñaupaqenkupi, yachanqankutaj noqa Jehová Dios kasqayta.”
^ párrafo 6 Wañusqa Qochapi tarikusqan qhelqasqasqa ñaupa hebreo qhelqasqasmanta nisqa 1.000 watasmanta aswan unayniyoj. Chay ñaupa hebreo qhelqasqasmanta Traducción del Nuevo Mundo nisqa Biblia tijrachikuyta qallarerqa.
^ párrafo 7 Wakin yachayniyoj runasqa kikillantataj ninku.
^ párrafo 7 El apéndice 1A de la Biblia con referencias nisqapi “El nombre divino en las Escrituras Hebreas”, nisqata 1559 paginapi leey.
^ párrafo 9 Malaquías 3:16 (NM): “Chaypacha Jehovata manchachikojkuna parlanakorqanku, Jehovataj sumajta uyarerqa imatachus nisqankuta. Chantá Jehovaj ñaupaqenpi uj libro qhelqakorqa, payta manchachikojkuna, paypa sutinta jatunchajkunataj chay libroman jina yuyarisqa kanankupaj.”
