¿Imaraykú Edén huertamanta yachakunayki tiyan?

WAKIN yachayniyuq runasqa Biblia Edén huertamanta juk chiqallanpi parlasqanta ninku, manataq tukuynin Bibliapichu. Religionmanta yachachiq Paul Morris sutiyuq nin: “Bibliap qallariynillanpi, Edén huertamanta parlakun”. Wakin Bibliamanta yachaq runaspis ichá jinapuni kasqanta ninku, chaywanpis kayjinata yuyasqankuqa llulla kasqanta reparasunchik.

Bibliaqa Adanmanta, Evamanta, katarimanta, Edén huertamanta ima achkhata parlan. * Jina kaptinpis kay yachayniyuq runas nisqankumanjina, llulla religionesta apaykachaqkuna astawan pantasqata yachachisqankumanta jatun juchata tarikunku, qhallallaq Edén huerta juk cuentolla kasqanta yachachisqankurayku. Arí, chayta nispaqa, Bibliap yachachiykunasnin pantasqa kasqanta nichkanku.

Imachus Edén huertapi pasasqanta mana chiqata yachaspaqa, Diospa Palabranta manallataq sutʼita entiendeyta atisunmanchu. Qhawarina imaynatachus Biblia kawsaymanta mana kutichiy atina tapuykunasman kutichiwanchik, chaykunastaq imachus Edén huertapi pasasqanmanta sutʼinchawanchik.

● ¿Imaraykutaq machuyanchik, wañunchik ima? Adán, Eva ima Jehovata kasukunkuman karqa chayqa, wiñaypaq kawsankuman karqa. Juchachakusqankumantapacha manaña juntʼa runaschu karqanku, wañuytataq qallarirqanku (Génesis 2:16, 17; 3:19). Chaymantapacha tukuyninchik pantanchik, juchachakunchik ima. Chayrayku Biblia nin: “Uj runanejta jucha kay pachaman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku” (Romanos 5:12).

● ¿Imaraykutaq Dios ñakʼariykuna kananta saqin? Satanasqa Edén huertapi Jehová llulla kasqanta, chantapis allin kaqta runasman pakachkasqanta nirqa (Génesis 3:3-5). Chaywanqa, mana allin kamachiq kasqanta nichkarqa. Adán, Eva ima Kuraq Supayta kasuspa Jehovap kamachiyninta qhisacharqanku,  jinamanta runasqa imachus allin imataqchus mana allin kasqanta sapallanku akllayta atisqankuta rikuchirqanku. Jehová chayta rikuspa, ¿imatá ruwarqa? Yachayninwan chiqa kayninwan ima, runas juk tiempollata sapallanku kamachikunankuta saqirqa. Kay tiempopi ñakʼariykuna pachantinpi rikukusqanqa —Satanás kay pachata kamachisqanrayku— mana Diospa yanapayninwanqa runas mana kamachikuyta atisqankuta sutʼita rikuchinku (Jeremías 10:23).

● ¿Imapaqtaq Dios kay Pachata ruwarqa? Dios, Edén huertata ruwasqanwanqa, kay pacha tʼikapachaman tukunanta munasqanta yachachiwanchik. Chantapis Jehovaqa Adantawan Evatawan kay pachata mirayninkuwan juntʼachinankuta, tukuy Jallpʼata tʼikapachaman tukuchinankuta ima, kamachirqa (Génesis 1:28). Chayrayku Diosqa kay Pacha tʼikapachaman tukunanta, Adanpa Evap mirayninku juntʼa runasman tukunankuta, jukchasqas kusisqastaq kawsanankuta ima, munallantaq. Yaqha tukuynin Bibliapi, Diospa kay munaynin, imaynatachus juntʼakunanta willawanchik.

● ¿Imaraykutaq Jesucristo kay Pachaman jamurqa? Edén huertapi Diospa contranpi uqharikusqankumantapacha qhipaman, Adán, Eva, mirayninku ima, wañuyta qallarirqanku. Diosninchik mayta munakuwasqanchikrayku, Churinta kay Pachaman kachamurqa, wañuyninwan rantinawanchikpaq (Mateo 20:28). ¿Imataq kay rantiyrí? Bibliapi Jesús ‘qhipa kaq Adán’ kasqanta yachachiwanchik, ñawpa kaq runamanta nisqaqa, pay tukuy imapi Jehovata kasukurqapuni. Chayrayku juntʼa kawsayninta mana chinkachirqachu. Pay kawsayninta qurqa tukuy runas juchamanta kacharichisqa kanankupaq. Jinamanta chiqa sunqu runaspa juchasninkuta, Dios pampachayta atinman, wiñaypaqtaq kawsayta atinkuman, imaynatachus Adán, Eva ima, manaraq juchachakuchkaptinku kawsarqankujina (1 Corintios 15:22, 45; Juan 3:16). Chayraykutaq Jesús, kay Pachaman Diospa munaynin juntʼakunanpaqpuni jamurqa. *

Yachakunchikjina, Diospa munayninqa, riqsiyta atinapaqjinalla, manataq pakasqachu. Edenpi imaynatachus huerta, runas, uywas ima karqankupuni, kikillantataq Dios kay pachapaq munayninta juntʼanqapuni. Kayta rikunapaqtaq, ¿imatá ruwananchik tiyan? Ñuqallanchikmantaña kachkan. Diosninchik tukuy runas salvasqa kanankuta munan, chantapis pikunachus Diosta saqirqanku paykunapis (1 Timoteo 2:3, 4). ¿Imaynatá kayta yachanchik?

Jesús manaraq wañuchkaptin, ladonpi kaq suwa runawan parlarqa. Chay runaqa juchanrayku wañunanta yacharqa, jinapis suyakuyta, sunquchayta ima Jesuspi maskʼarqa. Paytaq kutichirqa: “Noqawan Paraisopi kanki”, nispa (Lucas 23:43). Sichus Jesús juk suwa runa tʼikapacha huertapi kawsananta munan chayqa, ¿manachu chay huertapi kawsananchikta munallanmantaq? Arí. Tatanpis chayllatataq munan. Diospa nisqasninta juntʼakunantapuni rikuyta munaspaqa, allin kanman Paymanta yachakunallaykipuni, pichus Edén huertata ruwarqa.

[Sutʼinchaykunasnin]

 [10 paginapi recuadro, dibujos/fotos]

ÑAWPA KAQ PROFECÍA BIBLIAP YACHACHIYKUNASNINTA JUKCHAN

“Qantawan [katari], warmitawan chejninachisqaykichej. Jinallataj mirayniykiwan, mirayninwampis chejninakonqanku. Miraynin umaykita saruspa, pʼaltarparenqa, qantaj chaki talonninmanta khaninki.” (Génesis 3:15.)

Kayqa ñawpa kaq profecía Bibliamanta, mayqintachus Dios, Edén huertapi parlarqa. Chaywanpis warmi, katari, sapa jukpa miraynin ima, ¿pikunataq kanku? ¿Imaraykú puraqmanta chiqninakunku?

KATARI

Satanás (Apocalipsis 12:9).

WARMI

Janaqpachapi Jehovap llaqtan, chaykunataq ángeles kanku (Gálatas 4:26, 27). Profeta Isaiastaq, kay “warmi” juk espiritual llaqtata nacechikunanta willarqa (Isaías 54:1; 66:8).

KATARIP MIRAYNIN

Kuraq Supaypa munayninta ruwayta munaqkuna (Juan 8:44).

WARMIP MIRAYNIN

Jesucristo, janaqpachapi Jehovap llaqtanmanta jamun. Chantapis, Jesuspa akllasqa hermanosninpiwan. Paykunataq janaqpachapi Jesuswan khuska kamachinankupaq akllasqa kanku, espiritual llaqta kanankupaq, “Diospa nacionnin Israel” nisqa (Gálatas 3:16, 29; 6:16; Génesis 22:18).

CHAKI TALONNINMANTA KHANISQAN

Diospa churinta kay pachapi kachkaspa Satanás wañuchichirqa. Chaytaq mana unaypaqchu karqa, imaraykuchus Jesús watiqmanta kawsarimurqa.

UMANTA SARUSPA PʼALTARPANQA

Jesusqa Satanasta wañurparichinqa, wiñaypaq chinkachiptin. Manaraq kayta ruwachkaptin, Edén huertapi Kuraq Supaypa ruwasqasninta allinchanqa. (1 Juan 3:8; Apocalipsis 20:10).

¿Runasta Dios munakunchu? nisqa folletopi, kay profeciata Biblia astawan sutʼinchasqanmanta 8 rakʼiyninpi tarinki, kaytataq Jehovamanta sutʼinchaqkuna urqhunku.

[11 paginapi dibujo/foto]

Adán, Eva ima, juchachakusqankumanta mayta ñakʼarirqanku