PILLAPIS manaña jatuchaq llakiykuna kananta nisuptin, ¿imatá kutichiwaq? Ichapis ninkiman chayqa juk cuentolla kasqanta, imaraykuchus jatuchaq llakiykunaqa kanqapuni. Chayri turiyakuchkasusqanta yuyawaq.

Jatuchaq llakiykuna mana tukukuyniyuqjina kaptinpis, tukukunanpipuni atienekusunman. Chaywanpis mana runachu tukuchinqa. Imaraykuchus runaqa imaynatachus, imaraykuchus jatuchaq llakiykuna kasqanta mana sutʼita entiendenchu, chayraykutaq mana ni imata ruwayta atinchu, nitaq tukuchiytapis. May yachayniyuq, Israel llaqtamanta kamachiq Salomón jinata nirqa: “Cheqamanta runaqa mana yachanchu Diosqa imaynamantachus chay imasta kay pachapi ruwasqanta. May jinata maskʼashaspapis, runaqa manapuni waturiyta atinchu. Yachayniyoj runaqa nichumpis: Kay imasta entiendeniña, nispa; chaywampis manapuni chay imastaqa entiendeyta atinchu”, nispa (Eclesiastés 8:17).

Runa jatuchaq llakiykunata mana chinkachiyta atiptin, ¿pitaq chinkachinqarí? Bibliaqa, Ruwawaqninchik chinkachinanta nin. Imaraykuchus Payqa imaynachus Jallpʼa ruwasqa kachkasqanta, maymantachus yakupis jamusqanta sumaqta yachan (Eclesiastés 1:7). Runamanta nisqaqa, Diosqa may atiyniyuq. Chayrayku profeta Jeremías nirqa: “Qan, Tata Dios, chay jatun atiyniykiwan cielota, kay pachatapis ruwarqanki; qampajqa mana imapis mana atikojqa kanchu”, nispa (Jeremías 32:16, 17). Diosqa, Jallpʼata chaypi tukuy imata ruwasqanrayku, runa allin kawsaypi, kusisqas kawsakunankupaq ima, imaynatachus ruwananta yachan (Salmo 37:11; 115:16).

Jina kaptin, ¿imaynatá Jehová Dios tukuchinqa? Yuyarikunkichá, “Jatuchaq llakiykuna, ¿imaptintaq achkha tiyan?”, nisqa yachaqanapi kay tiempopi manchachikunapaqjina llakiykuna “kay pachaj tukukuyninmanta” juk “señal” kasqanta yachakurqanchik. Chaywanpis Jesús nirqa: “Chay tukuy imasta rikuspaqa, yachaychej Diospa reinon qayllapiña kasqanta”, nispa (Mateo 24:3; Lucas 21:31). Janaqpacha Reinoqa, Jallpʼapi tukuy imata allinchanqa, jatuchaq llakiykunata ima tukuchinqa. Chayta ruwananpaq Jehová atiyniyuq kaspapis, Churinta chayta ruwananpaq  kamachirqa, paymanta profeta Daniel nirqa: “Payman atiy qosqa karqa, jinallataj jatumpaj qhawasqa kay, reinopis, tukuy nacionesmanta kaj runas, tukuy parlaymanta kaj runas ima payta sirvinankupaj”, nispa (Daniel 7:14).

Diospa Churin Jesucristoqa, Jallpʼata juk paraisoman tukuchinanpaq atiyta japʼirqa, mayqinpichus mana manchachikuspa kawsakusun. Iskay waranqa wata ñawpaqta, Jesús kay Jallpʼapi kachkaspa, imaynachus kamachiynin kananta tumpata rikuchirqa, sinchi wayrata, quchata ima thañichispa. Sutʼincharinapaq; juk kuti Jesús discipulosninwan botepi Galilea quchapi kachkaptinku, “manchay sinchʼi wayra oqharikorqa; yakupis qhollchoqeyaspa, boteman juntʼaykusharqa. Chayrayku boteqa chinkaykusharqaña”. Discipulosqa chayta rikuspa mayta mancharikurqanku, wañunankuta yuyaspataq, Jesuspa yanapayninta mañakurqanku. ¿Imatá Jesús ruwarqa? “Wayrata kʼamerqa, qochatapis nerqa: Chʼin kay. Sayay, nispa. Wayrataj thañerqa, may chʼintaj karqa”. Chayta rikuspa discipulosqa ninakurqanku: “Pitaj kay runari? Wayrapis, qochapis payta kasunku”, nispa (Marcos 4:37-41).

Aswan qhipamantaq Jesús janaqpachaman kutipurqa, astawan atiytataq japʼirqa. Kunanqa Diospa Reinonpi Reyña kachkan, runa allin kawsaypi, kusisqas kawsakunanpaqtaq tukuy imata ruwayta atin.

Rikunchikjina chʼampaykuna, jatuchaq llakiykuna ima astawan yapakun runas allinnillankuta maskʼasqankurayku. ¿Imatá Diospa Reinon chayjina runaswan ruwanqa? Biblia nin: “Janaj pachamanta Señor Jesús atiyniyoj angelesninwan jamojtin. Payqa nina larwaywan rikhurimonqa, juchachaspataj castiganqa sonqonkupi Diosta qhesachajkunata, pikunachus Señorninchej Jesucristoj evangeliontapis mana kasojkunata”, nispa. Chiqamantapuni payqa “kay pachata phirejkunatapis tukuchin[qa]” (2 Tesalonicenses 1:7, 8; Apocalipsis 11:18).

Chantá “Reykunaj Reynin” Jesucristoqa sinchi parata, sinchi wayrata, atiyninman churanqa (Apocalipsis 19:16). Chantapis kamachiyninpiqa, ni pi ñakʼarinqañachu. Atiyninwantaq qʼumir tiempo, chiri tiempo, maychus tiempopi kallanqataq. Ajinamanta Jehová llaqtanpaq imatachus nisqanta juntʼanqa: “Jallpʼaykichejman parachimusaj maychus tiempompi. Chajrasniykichejqa sumajta poqonqa, poqoy sachʼasniykichejpis sumajta poqollanqataj”, nispa (Levítico 26:3, 4). Paraisopi runasqa, wasista ruwakunqanku, manañataq jatuchaq llakiykunapi wasisninkuta chinkachinqankuchu. Bibliaqa nin: “Wasista ruwakuspa, tiyakonqanku. Uva huertasta churanqanku, poqoynintataj mikhonqanku”, nispa (Isaías 65:21).

Chiqamantachá qamqa, wakkunajina musuq pachapi tiyakuyta munanki, mayqinpichus manaña jatuchaq llakiykuna kanqañachu. ¿Imatá paraisopi kawsanaykipaq ruwanayki tiyan? Diosta ‘qhisachaqkuna, Señor Jesucristop evangelionta mana kasukuqkuna’ ima, paraisopi mana kawsakunqankuchu. Chayrayku allin kanman Diospa munaynin imachus kasqanmanta usqhayllata yachakunanchik, imatachus kay Jallpʼata kamachinanpaq ruwasqantapis allinpaq qhawananchik. Diosqa payta riqsinanchikta munan, chantapis Churinniqta sayachisqan Reinomanta allin willaykunata, kasunanchikta munan.

Chaykunata ruwanapaqqa Bibliata sumaqta ukhunchana tiyan, maypichus Diospa Reinonpa kamachiyninpi kusisqa kawsanapaq leyes tarikun. Jehovamanta sutʼinchaqkuna yachachisunankuta mañakuy, paykunaqa may kusiywan yachachisunqanku. Chantá Diosta riqsinaykipaq, payta kasukunaykipaq kallpachakunki chayqa, kay Proverbios 1:33 nisqan qampi juntʼakunqa, chaypi nin: “Pichus noqata uyariwajrí mana imamanta manchachikuspa tiyakonqa; kusisqa tiyakonqa”, nispa.