JEHOVÁ DIOS, ¿cheqamantachu kamachisninta munakun? Jina kajtin, ¿imaynapuni chay munakuynin? Chayta yachanapajqa, imatachus Diosllataj nisqanta ukhuncharina. Jehová Diosqa, Biblianejta munakuwasqanchejta rikuchin. Sutʼincharinapaj, Isaías 49:15 nisqanta qhawarina.

Imaynatapunichus Jehová kamachisninta munakusqanta rikuchinanpaj, Isaías libronejta munakuynin may jatun kasqanta rikuchiwanchej. Pay kikin kayta nin: “Uj warmeqa wawitanta qonqarparinmanchu? Wijsanmanta llojsej wawanta manachu munakunman?”, nispa. Uj mama wijsanmanta llojsej wawitanta qonqapunantaqa, mana yuyallasunmanpischu. Imajtinchus wawitaqa, tuta pʼunchay maman qhawananta, munakunanta ima necesitan. Chayrayku Jehovaqa, mana chayllamantachu parlasharqa.

¿Imaraykutaj uj mama wawitanta ñuñuchin, qhawan ima? ¿Manaña waqananpajchu? Mana. Tukuy mamas ‘wijsankumanta llojsej wawitasninkuta mayta munakunkuʼ (Isaías 54:10). Ajinata mamas uña wawitasninkuta mayta munakusqankoqa, mana ni imawan kikinchakunchu.

Llakikunapaj jina, mana tukuy mamaschu wawitasninku yarqhaymanta waqajtinku llakikunku. Chay mamasqa, “qonqapunman” nispa nin Jehová Dios. Sajra pachapi mana sonqoyojkunaj chaupinpi kausakunchej (2 Timoteo 3:1-5). Sapa kuti, mamas uña wawitasninkuta saqerparisqankuta, maqasqankuta, mana allinta qhawasqankuta ima uyarinchej. Bibliamanta yachaj uj runa Isaías 49:15 versiculomanta nin: “Mamasqa juchasapa kasqankurayku, wakin kutispi munakuyninkuta mana rikuchiyta atillankuchu. Runaj munakuynin may jatun kajtinpis, chiriyapunman”, nispa.

Chaywanpis Jehovaqa, “noqaqa ni jaykʼaj qonqasqaykichu”, nispa nin. Chayta nisqanwan, imatachus Isaías 49:15 versiculopi niyta munasqanta aswan sutʼita entiendenchej. Jehová Diosqa, kay versiculopi uj juchasapa mamamanta nisqaqa, jatun munakuyniyoj kasqanta sutʼinchasharqa. Chayrayku Payqa, kamachisninman necesitajtinku khuyakuyninta rikuchillanqapuni. Chayraykutaj Bibliamanta yachaj runa nerqa: “Ñaupa Testamentomanta ichá Isaías 49:15 versiculolla Diospa aswan jatun munakuyninta rikuchin”, nispa.

Jehová, “jatun khuyakuyni[yoj]” Dios kasqanmanta mayta kusikunchej (Lucas 1:78). Payllataj nin: “Mana wijchʼurparisqaykichu, nitaj saqerparisqaykichu”, nispa (Hebreos 13:5). Imaynatachus Diosman astawan qayllaykuna kasqanta, ¿manachu yachakuyta munanki?