ABELQA, ovejasninta kinraypi michisharqa. Chantá ichá karupi uj lliphipejta rikorqa. Yacharqataj chay lliphipej uj laurashaj espada kasqanta, chaytaj Edén huertaman ni pipis yaykunanpaj muyusharqa. Tatasnin chay huertapi tiyakorqanku, kunantaj ni paykuna, ni pipis chay huertaman yaykuyta atinkuñachu. Imaynachus Abel kashasqanpi tʼukuriy, ichapis Ruwajninpi tʼukurispa cielo qhawarisqa kashan, wayrataj chujchanta sayarachishan. Runas, ¿maykʼajllapis Dioswan allinyakunkumanchu karqa? Abelqa, runas Dioswan allinyakunankuta munarqa.

Abelqa, parlashawanchej, ¿qan uyarinkichu? Ichá chay mana atikusqanta niwaj. Imaraykuchus Abelqa may unayña wañuporqa, payqa Adanpa wawan, Cainpa sullkʼantaj karqa. Wañupusqanmanta sojta waranqa watas jinaña kasqanrayku manañachá tullusninpis kanñachu. Bibliaqa, wañusqasmanta nin: “Mana imatapis yachankuchu”, nispa (Eclesiastés 9:5, 10). Chantapis Bibliapeqa, Abelpa ni ima parlasqan kanchu. Jina kajtin, ¿imaynatá Abel parlawasunman?

Apóstol Pabloqa, Diospa yuyaychasqanman jina Abelmanta kayta nerqa: “Wañusqaña kaspapis, chay creesqannejta parlashallampuni”, nispa (Hebreos 11:4). ¿Pinejtataj parlashallanpuni? Creeyninnejta. Payqa tukuy runasmanta creeyninta ñaupajta rikucherqa, chay creeyninmantataj kunanpis yachakusunman. Creeyninmanta yachakullasunpuni, pay kikintaj ruwasun chayqa, Abel parlashawasunman jina kanqa.

Chaywanpis, ¿imatá Abelmanta, creeyninmanta ima yachakusunman, Biblia pisillata parlajtinpis? Qhawarina.

Abelqa, kay pachapi kinsa runas kashajtillanraj nacekorqa. Jesús “kay pachaj qallariyninmanta[...]” parlashaspa, Abelpa tiemponmanta parlasharqa (Lucas 11:50, 51). Arí. Jesusqa, juchamanta kacharichisqa kayta suyakoj runasmanta parlasharqa. Abelqa, kay Jallpʼapi tawa kaj runa karqa, paytajsina ñaupaj kaj runa juchamanta kacharichisqa karqa. * Cheqamanta nisunman Abelpa tiemponpi mana pi runapis Diosta kasukoj karqachu, paymanta yachakunanpaj.

Runasqa, manaraj unaytachu kausashaspapis, llakiypiña kasharqanku. Abelpa tatasnenqa, kallpasniyoj, juntʼa runas kaspapis, yachashaspa jatun juchaman urmarqanku. Paykunaqa, juntʼa runas karqanku, wiñaypajtaj kausayta aterqanku. Diospa contranpi juchallikusqankurayku Edén huertamanta wijchʼuchikamorqanku. Munaynillankuta maskʼasqankurayku, juntʼa kausayninkuta, wiñay  kausayta ima chinkacherqanku, jinallataj mirayninkojtapis (Génesis 2:15–3:24).

Edén huertamanta wijchʼuchikamuytawantaj kausay may llakiy kasqanta rikorqanku. Ñaupaj kaj wawanku nacekojtintaj, Caín sutiwan suticharqanku, chay suteqa, “Qosqa” niyta munan, Evataj nerqa: “Tiyapuwan uj qhari wawa; kaytaqa Tata Dios qowan”, nispa. Chayta nispaqa, Jehová Dios Edén huertapi uj warmi mirayniyoj kananta nisqanpichá yuyasharqa, pichus Supayta chinkachinan karqa (Génesis 3:15; 4:1). Evaqa, chayta nispa profeciamanta warmi pay kasqanta, Caintaj “miraynin” kasqantachá yuyasharqa.

Ajinata yuyaspaqa mayta pantasharqa. Pay, Adán ima, Cainta wiñasqanman jina chay miray kasqanta yuyachispaqa, jatunchakunanpajchá tanqarqanku. Tiemponmantaj Abelta nacechikorqa, chay wawamantaqa mana Caín nacekojtin jinachu nerqa. Abel sutitataj churarqanku, chay suteqa ichá “Samay”, chayri “Qhasi mana kaj” niyta munan (Génesis 4:2). Chayta sutichaspataj, ¿Cainpichu astawan suyakuyninkuta churarqanku? Chaytaqa, mana yachanchejchu.

Kunanpis tatasqa, Adanmanta, Evamantawan yachakunkuman. Tatas ruwasqasniykichejwan, nisqasniykichejwan, wawasniykichejta, ¿jatunchakunankupajchu, munapayanankupajchu, paykunallapi yuyanankupajchu tanqashankichej? Chayri, ¿Jehová Diosta munakunankupajchu, Paywan masichakunankupajchu? Llakikunapaj jina ñaupa tatasqa ruwayninkuta mana juntʼarqankuchu. Chaywanpis mirayninpaj uj suyakuy karqa.

Adanqa, wawasninman wiñasqankuman jina llankʼayta yachacherqachá. Cainqa, jallpʼata llankʼajman tukorqa, Abeltaj ovejasta michejman.

Abelqa, tiempo pasasqanman jina Diospi creeyninta wiñachillarqataj, chay creeyninmantataj aswan qhepaman Pablo qhelqarqa. Abelqa, mana pi runamantapis Diospi creeyninta wiñachinanpaj yachakuyta aterqachu. Chantá, ¿imaynatá creeyninta wiñacherqa? Creeynin wiñananpaj kinsa imas yanaparqa, chaykunatataj ukhuncharina.

Jehovaj ruwasqasnin.

Cheqamantapuni Jehovaqa, jallpʼata maldecirqa, khishkasta, tukuy sajra qhorasta ima wiñachispa, mana chajrachayta atinapaj jina kananpaj. Jina kajtinpis jallpʼaqa, Abel, familian ima mikhunanpaj poqorqa. Jehová Diosqa, pʼesqosta, challwasta, mayusta, qochasta, Intita, Killata, chʼaskasta, waj imasta ima mana maldecirqachu. Abelqa, tukuynejta qhawarispa Diospa munakuyninta, atiyninta, kʼacha kayninta ima rikorqa (Romanos 1:20). Diospa ruwasqasninpi, kʼacha kaykunasninpi sapa kuti tʼukurispataj creeyninta kallpacharqa.

Abelqa, Jehová Diospi tʼukurinanpaj tiempochakoj. Kunantaj Abel ovejasninta michishasqanpi  tʼukuriy. Michejkunaqa, mayta purej kanku, ovejasninkuta, mayu kantusman, orqosman, maypichus sumaj pastos kaj chayman, jarkʼasqa chʼiji pampasman samarichinankupaj ima qhatej kanku. Diospa tukuy ruwasqasninmanta ovejasqa, runa jarkʼananpaj, michinanpaj jina ruwasqas kashanku. ¿Abel paymanta aswan atiyniyojpa jarkʼayninta necesitasqanta repararqachu? Cheqamanta nisunman Diosmanta mañakuyninpi chayta rikuchisqanta, chaytaj creeyninta astawan wiñacherqa.

Jehovaj nisqasnin.

Adán, Eva ima, wawasninkuman Edén huertamanta imaraykuchus wijchʼuchikamusqankuta willarqankuchá. Abelqa, chay imaspi tʼukuriyta aterqa.

Jehová Diosqa, jallpʼa maldecisqa kananta nerqa. Abeltajrí, Diospa nisqan juntʼakushasqanta rikorqa, jallpʼapi khishkasta, tukuy sajra qhorasta wiñajta rikuspa. Chantá Diosqa, Evaman nerqa: “Nanayniykita aswan ashkhata yapasaj wijsayoj kashajtiyki, nanaywantaj nacechikunki wawasniykita”, nispa. Chayta juntʼakojta Abel rikullarqataj hermanosnin nacekushajtinku. Chantapis Jehovaqa, Evaman nillarqataj: “Munasqaykitaj qosaykiman apasonqa, paytaj qanta kamachisonqa”, nispa. Chaytataj Abel tatasninpi rikorqa. Chayraykutaj, Diospa nisqasnin atienekunapaj jina kasqanta yacharqa. Ajinamanta Abelqa, Edenpi chʼampay rikhurisqanta Dios uj ‘miraynejta’ chinkachinanpi creerqa (Génesis 3:15-19).

Jehovaj kamachisnin.

Abelqa, mana pi runamantapis Diosta kasukunanpaj yachakuyta aterqachu, chaywanpis chay tiempopeqa, mana runasllachu Jallpʼapi karqanku manaqa ángeles kashallarqankutaj. Jehová Dios, Adanta, Evatawan, Edén huertamanta wijchʼumuytawan, manaña paykunata nitaj wawasninkutapis yaykojta saqerqachu. Querubín nisqa angelestataj churarqa, Edén huertaman uj laurashaj espadatawan amapuni pipis yaykunanpaj (Génesis 3:24).

Abel wawallaraj kashaspa chay querubinesta qhawarishasqanpi tʼukuriy. Chay angelesqa runaman jina tukorqanku, chaytaj may atiyniyoj kasqankuta rikucherqa. Espada lauraspallapuni muyusqanqa, Jehovata jatunpaj qhawananpaj Abelta yanaparqa. Wiñasqanman jinataj ni jaykʼaj rikorqachu chay querubines Edén huertata qhawaspa, saykʼusqankuta chayri saqesqankuta. Chay angelesqa, watasta, tuta pʼunchay, chay lugarpi qhepakorqanku. Chayrayku Abel yacharqa, Jehová Dios cheqa sonqo, mana saykʼoj kamachisniyoj kasqanta. Chantapis chay querubines cheqa sonqos, kasukoj kasqankuta ima rikorqa, chaytataj familianpi mana rikorqachu. Chaytaj creeyninta kallpacharqa.

Abelqa, Jehová Diospa ruwasqasninpi, nisqasninpi, cheqa sonqo angelespi ima tʼukurispa, creeyninta astawan kallpacharqa. Abelpa ruwasqasnenqa parlashawasunmanpis jina, maytataj chaymanta yachakusunman. Astawanraj waynas, sipaskuna ima, Jehovapi creeyninkuta wiñachinankupaj paymanta yachakunkuman, familiankupi chayta mana ruwajtinkupis. Noqanchejpis, tʼukunapaj jina Diospa ruwasqasninpi, Bibliapi, kamachisninpi ima tʼukurispaqa creeyninchejta wiñachillasunmantaj.

Abelqa, Jehovapi creeyninta ruwasqasninwan rikuchiyta munarqa. Chaywanpis, ¿imatá tukuy imata Ruwaj Diosman qoyta atinman karqa? Cheqamanta nisunman Jehovaqa, runamanta ni imata, ni yanapaynintapis necesitasqanta. Chaywanpis Abelqa, Jehová Diosman kapuyninmanta sumajninta tukuy sonqo qospa kusichinanta repararqa.

Chayrayku Jehovapaj, sumaj ovejasninta qʼolachinanpaj ajllarqa. Nisunman ñaupaj kaj uñasninta, ovejaj sumaj imasninta ima. Cainpis Jehovaj bendicionninta tarinanpaj, allin ñawiwan qhawananpaj ima, poqochisqasninmanta jaywallarqataj. Chaywanpis mana Abel jinachu tukuy sonqo ruwarqa. Chaytaj sutʼi rikukorqa jaywanasninkuta jaywashajtinku.

 Ichapis iskayninku, altarespi jaywanasninkuta ninawan qʼolachispa jaywarqanku. Chaytataj ichá querubinespa rikunankuta ruwarqanku, pikunachus chay tiempopi, Jehovaj sutinpi kasharqanku. Bibliaqa, Jehová Dios “allin ñawiwan Abelta qhawarerqa, jinallatataj jaywasqantapis”, nin (Génesis 4:4). Bibliaqa, mana ninchu Abelpa jaywananta imaynamantachus Dios allinpaj qhawasqanta. ¿Imaraykutaj Abelta allin ñawiwan qhawarqa?

¿Jaywasqanraykuchu? Abelqa, kausashaj ovejata yawarninta suruchispa jaywanata jina qorqa. ¿Abel jaywanan may valorniyoj kasqanta repararqachu? Abelpa tiemponmanta ashkha watasninmantaj, Jehová Diosqa, uj corderota mana iman imanasqata jaywanata jina qonankuta nerqa. Pay aswan qhepaman runaspa juchanrayku mana juchayoj Churinta —“Diospa Corderon[ta]”—qonanta rikuchinanpaj (Juan 1:29; Éxodo 12:5-7). Chaywanpis Abelqa, manasina imaynatachus chayta aswan qhepaman Jehová apaykachananta yacharqachu.

Abel kapuyninmanta sumaj kajta qosqanta yachanchej. Jehovaqa, payta, jaywananta ima allin ñawiwan qhawarqa. Imaraykuchus payqa, creeyninrayku, munakuyninrayku ima jaywarqa.

Caintatajrí Jehovaqa, “mana jinatachu qhawarerqa, nillataj jaywasqantapis” (Génesis 4:5). ¿Jaywanan mana allin kasqanraykuchu? Mana. Jehovaqa, aswan qhepaman Moisesman Leyta qosqanman jina jallpʼaj poqoyninta jaywanankuta saqerqa (Levítico 6:14, 15). Bibliataj, Cainpa “ruwasqasnin sajra karqa” nin (1 Juan 3:12). Cainqa, kay tiempomanta runas jinallataj, wajkuna rikunallankupaj imatapis Diosman qoy allillan kasqanta yuyarqa. Mana creeyniyoj kasqan, Diosta mana munakusqan ima ruwasqasninpi sutʼi rikukorqa.

Caín, jaywanasninta mana allin ñawiwan Dios qhawasqanta reparaspa, ¿Abel jinachu ruwarqa? Mana. Astawanqa hermanonta mayta chejnerqa. Jehová Diosqa, Cainpa sonqonpi imachus kasqanta yachaspa, munakuywan yuyaycharqa. Jinallapuni kanki chayqa, jucha atipaykusonqa nerqa, allinpaj qhawasqa kananpajtaj juchata atipananta yuyaycharqa (Génesis 4:6, 7).

Llakikunapaj jina Cainqa, Jehovaj nisqanta mana kasukorqachu. Astawanqa, Abelta puriykacharej campoman pusarqa, chaypitaj wañucherqa (Génesis 4:8). Ajinamanta Abelqa, creeyninrayku tukuymanta ñaupajta qhatiykachasqa karqa. Wañusqaña kaspapis, creeyninnejta parlashallawanchejpuni.

Abelpa yawarnenqa, jallpʼamantapacha Jehová Diosman qhaparikusharqa, cheqan kaj ruwakunanpaj, Diostaj cheqan kajta ruwarqa Cainta castigaspa (Génesis 4:9-12). Abelpa creeyninmanta qhelqasqaqa, parlashawasunmanpis jina. Chay tiempopi runasmanta nisqaqa, Abel ichá pachaj watasta jinalla kausarqa, chaywanpis Diosta kusichinanpaj jina kausarqa. Payqa, Jehová Dios, payta munakusqanta, allin ñawiwan qhawasqanta ima yachashaspa wañuporqa (Hebreos 11:4). Cheqamanta nisunman payqa, Jehovaj yuyayninpi kashasqanta, kay Jallpʼa uj paraisoman tukojtin kausarimunanta (Juan 5:28, 29). Abel kausarimojtin, ¿qan chaypichu kanki? Abel creesqannejta parlashasqanta uyarispa, pay kikin ruwaspa ima, kausarimojtin chaypi kanki.