Nínive llajtaqa Asiriaj capitalnin karqa. Kay sumaj llajtaqa kamachina wasisniyoj, templosniyoj, jatuchaj callesniyoj, jatun perqasniyoj ima karqa. Profeta Nahumqa, Ninivemanta nerqa: “Runa chʼallpa, yawar jichʼaj llajta”, nispa (Nahúm 3:1).

Jinapunitaj karqa. Imajtinchus Ninivepi Senaqueribpa kamachina wasinpa perqasnenqa, asirios may sajras kasqankuta rikuchin. Uj cheqapeqa asirios presochasqa runaj qallunta orqhoshanku. Qhelqasqasninkutaj, presochasqa runasta senqamanta chayri simimanta ganchowan tʼojsispa aysasqankuta ninku. Kamachina wasipi llankʼajkunatataj, reyninkoj qholusqa umanta kunkankuman millayta warkhuykoj kanku.

Asiriosmanta yachaj Archibald Henry Sayceqa, uj llajtata atipasqankutawan imastachus ruwasqankuta nin: “Runa umasta qholuspa montonaj kanku, jovenesta kausashajta qʼolachej kanku chayri aswan sajra imasta ruwaj kanku. Qharistataj kʼaspiman warkhoj kanku, manaqa aycha qaranta, ñawisninta, makisninta, chakisninta, ninrisninta, chayri senqanta orqhoj kanku”.

Judiosta Dios kamacherqa: “Mosoj wasita ruwakuspaqa, techonta jarkʼachinayojta ruwankichej. Ajinamanta mana juchayojchu kankichej, pipis chay patamanta urmaykuspa wañojtin”, nispa (Deuteronomio 22:8). Chaytataj kasukunanku karqa. Imajtinchus judiosqa, ashkha imasta wasi patapi ruwaj kanku.

Israelpi casi tukuy wasis, pʼalta techosniyoj kaj. Chayrayku qʼoñikunapaj, wayrarakunapaj, waj ruwanaspaj ima, sumaj karqa. Qʼoñi tiempopipis chaypi puñoj kanku (1 Samuel 9:26). Tarpojkunataj niraj jakʼusqa granota, higosta, uvasta ima, chay patapi chʼakichej kanku (Josué 2:6).

Wasi patapeqa, Diosta chayri lantista yupaychaj kanku (Nehemías 8:16-18; Jeremías 19:13). Apóstol Pedropis, chaupi pʼunchayta chaypi Diosmanta mañakorqa (Hechos 10:9-16). Wasi patapi palmera laqhemanta chayri uva sachʼamanta llanthucha kajtintaj, samarikunapaj sumajchá karqa.

Uj libro nisqanman jina (The Land and the Book), israelitas wasi pataman wicharinankupaj “escalerankoqa, wasi patiopi kaj”. Chayrayku wasi ukhuman mana yaykuspalla techomanta uraqamuyta atej kanku. Chayraykuchá Jesús, llajta thuñikojtin usqhayllata ayqenankupaj kayta nerqa: “Chay pʼunchaypi pichus alto patapi kashajqa ama uraykʼamuchunchu wasinmanta imallatapis orqhoj”, nispa (Mateo 24:17).