TAPANMANTA | ¿SATANÁS KANPUNICHU?
¿Satanasta manchikunachu?
Satanasqa uj gas jina, mana rikuyta atikullanchu, may sajrataj
Monóxido de carbono nisqaqa uj gas jina, mana rikukunchu nitaj tumpitallapis qʼapanchu. Runasqa mana reparankumanchu chay gaswan venenakushasqankuta. Jallpʼantinpi venenasqa runas wañojkunamanta khuskan jina chay gasta samaspa wañupunku. Jinapis mana mancharinachu tiyan. Imajtinchus chay gasmanta jarkʼakunapaj alarmas tiyan, chaytataj ashkha runas wasisninkuman churachinku chay sonajtintaj usqhayllata ayqenku.
Satanasqa chay gas jina, mana rikuyta atikullanchu, runasta sajra ruwaykunaman tanqashasqanpis mana reparayta atikullanchu. Jinapis mana manchachikunanchejchu tiyan. Diosqa Satanasmanta jarkʼakunapaj ashkha yanapasta qowanchej. Chaykunamanta parlarina.
Ajllayta atinchej. Santiago 4:7 nin: “Kuraj Supaypa contranta sinchʼita sayaychej, paytaj qankunamanta ayqenqa”, nispa. Satanás atiyniyoj kajtinpis munayninta mana ruwachillawasunmanchu. Sinchʼita sayajtinchejqa, pay noqanchejmanta karunchakonqa (1 Pedro 5:9). Jesús kinsa kutita pruebaman churasqa kajtinpis sinchʼita sayarqa, Satanastaj paymanta karunchakorqa (Mateo 4:11). Noqanchejpis Jesús jina ruwasunman.
Diosman qayllaykuyta atinchej. Santiago 4:8 nin: “Diosman astawan qayllaykuychej”, nispa. Arí, Jehovaqa payman qayllaykunanchejta munan, chaypajtaj Bibliata leerina tiyan (Juan 17:3). Diosmanta astawan yachakuspa, astawan munakusun, astawantaj sirviyta munasun. (1 Juan 5:3). Jehová chay kallpachakusqanchejta rikuspa, Santiago 4:8 versiculoj tukukuyninpi nisqanman jina ‘Dios qayllamuwasunchej’.
Jehovaqa Satanasmanta jarkʼakunapaj ashkha yanapasta qowanchej
Dios jarkʼayta munawanchej. Proverbios 18:10 nin: “[Jehovaj] sutenqa uj jarkʼachasqa torre jina; cheqan runasqa chaypi pakakuspa, waqaychasqa kanku”, nispa. Chayqa mana niyta munanchu Diospa sutinta oqharejtinchej, ima llakiyninchej chinkapunanta, astawanqa niyta munan sutinta jatunpaj qhawajkuna, ima ratollapis jarkʼananta mañakuyta atisqankuta.
Bibliaj sumaj yachachiynin. Hechos 19:19 versiculopi uj sumaj yachachiyta tarinchej chaypi nin: “Ashkha yatiristaj librosninkuta tantaykuspa apamorqanku, tukuypa rikunantataj ruphaykucherqanku. Chay ruphachisqankutaj phishqa chunka waranqa qolqe valesqa”, nispa. * Éfeso llajtamanta runasqa cristiano kayta munaspa, ni ima layqa ruwaykunawan chhapukuyta munarqankuchu. Chayrayku may valorniyoj yatiri librosninkuta kanaykorqanku. Chay ruwasqankutaj mayta yachachiwanchej. Imajtinchus Jallpʼaqa layqa ruwaykunawan juntʼa kashan. Wakin imasqa allillan rijchʼakojtinpis, layqa ruwaykunawan chajrusqa kasqankurayku supaykunata wajyanman. Chayrayku chay tukuy ima may valorniyoj kajtinpis, ni imarayku jallchʼakunachu tiyan (Deuteronomio 18:10-12).
Kay revistaj ñaupaj kaj yachaqananpi Rogeliomanta parlarqanchej. Payqa 50 watasniyoj kashaspaña Satanás kasqantapuni cuentata qokorqa, ¿imaynapí chayta yacharqa? Pay nin: “Bibliata leeyta qallarerqani, repararqanitaj Satanás kasqantapuni. Chaytaj Satanasmanta jarkʼakunaypaj yanapawarqa”, nispa.
“Bibliata leeyta qallarerqani, repararqanitaj Satanás kasqantapuni. Chaytaj Satanasmanta jarkʼakunaypaj yanapawarqa”
¿Satanaspa sajra ruwaykunasnin chinkananta munawajchu? Bibliaqa Satanás tumpamantawan “azufrewan larwashaj nina qochaman wijchʼuykusqa” kananta nin (Apocalipsis 20:10). Kay azufrewan larwashaj nina qochaqa, mana uj larwashaj nina qochapunichu. Ninaqa Satanasta mana ruphayta atinmanchu, payqa uj espíritu. Chayrayku azufrewan larwashaj nina qochaqa Satanás wiñaypaj chinkaynillanwan ninakun. Arí, Satanás wiñaypaj chinkanqa, Diosta munakojkunapajtaj may kusiy kanqa.
Chay tiempo chayamunankama Jehovamanta, munayninmanta ima yachakullaypuni. * Ajinata ruwaspaqa, uj pʼunchay “¡Satanás manaña kanchu niyta atisun!”.
^ párrafo 8 Chay qolqe romanospa denario qolqen karqa chayqa, ashkha qolqechá karqa. Uj runa chay qolqeta ganakunanpaj 50.000 pʼunchaykunata llankʼanan karqa.
^ párrafo 11 Satanasmanta, chantá imatachus Dios layqa ruwaykunamanta yuyasqanta astawan yachakuyta munaspaqa, ¿Imatapunitaq Biblia yachachin? libroj 10 yachaqananta leey. Jehovaj testigosnin chay librota qosunkuman.
