Salomón Jerusalenpi ruwasqan temploqa uj loma patapi kasharqa. Iskay ladosninpi astawan pampachanankupaj, patiosniyojtaj kananpaj uramantapacha rakhu perqasta ruwarqanku. Herodesqa templon aswan jatun kananta munarqa Salomonpa templonmanta nisqaqa. Chayrayku Salomonpa templonta allincharqa, jatunyacherqataj.

Ingenierosnenqa astawan waj ladosninman pampacharqanku chaypipis patiosta ruwanankupaj. Uj ladomanqa 32 metrosta yaparqanku. Chaypajqa rumimanta arcosta jina, rakhu perqastawan ruwarqanku. Wakenqa sayayninman 50 metrosniyoj karqa.

Herodesqa templon ruwakunanta munarqa mana judiosta phiñachinanpaj jinalla, nitaj jaywanasninkuta pantachinanpaj jina. Unay tiempomanta qhelqaj judío Josefo nisqanman jina, Herodesqa sacerdotesta yachacherqa albañiles, carpinterostaj kanankupaj, santo kaj cheqapi allinchanankupaj.

Herodesqa niraj templo allinchakuyta tukukushajtin wañuporqa. Kay 30 watapajqa 46 watastaña allinchakusharqa (Juan 2:20). Herodespa qallarisqantaqa allchhinpa wawan Herodes Agripa II tukucharqa, kay 50 watas chaynejta.

Malta churumanta wakin runasqa griegospa costumbresninkuman jina kausakorqanku. Hechos libroqa nin Pablo viajashajtin Malta churu chaynejpi barco chinkaykusqanta. Jinamanta Pablo barcomanta waj runaspiwan qʼoñikunankupaj ninata japʼicherqanku. Pablo uj marqʼa llantʼata ninaman churashajtintaj uj katari makinmanta khaniykuspa warkhuykukorqa. Malta churumanta runastaj nerqanku: “Cay runaka runa-wañuchicharí, pitachus jatun kochamanta salvacujtin, justiciaka mana causajta sakenchu”, nispa (Hechos 28:4, Mosoj Testamento [MT, 1956]).

Kay versiculopi griego parlaypi “justicia” palabrapaj dike palabrata churakorqa. Chay palabraqa justiciamanta parlashan, chantapis Dike chayri Dicea uj china diospa sutin, mayqentachus griegos yupaychaj kanku. Creej kanku chay china dios runaj ruwasqanta qhawashasqanta, Zeus diosmantaj pakasqa imasta willasqanta castigananpaj. Bibliamanta parlaj libro nisqanman jinaqa, Malta churumanta kajkuna ichapis yuyarqanku qochapi Pablo mana wañuspapis, justiciaj diosnenqa taripasqanta, katarinejtataj castigasqanta. Malta churumanta kajkunaqa, Pablota katari mana imanasqanta rikuspa manaña ñaupajta jinachu yuyarqanku.