TAPANMANTA | ¿IMAYNATÁ DIOS GUERRASTA QHAWAN?
¿Imaynatá Dios guerrasta qhawarqa ñaupa tiempopi?
Israel llajtataqa, Egipto llajta mayta ñakʼaricherqa. Israelitasqa ashkha kutispi Diosmanta yanapata mañakorqanku, Diostaj mana chay ratochu uyarerqa. Chantapis Israel llajtaqa, Diospa ajllasqan llajta karqa (Éxodo 1:13, 14). Israelitasqa unayta suyakorqanku egipciospa atiyninmanta Dios kacharichinanta. Diostaj maychus tiemponpi uyarerqa (Éxodo 3:7-10). Bibliaqa nin egipcioswan Dios maqanakusqanta. Chunka ñakʼariykunata apachisqanta, Puka qochapitaj faraonta, soldadosninta ima wañuchisqanta (Salmo 136:15). Jehovaqa “tukuy maqanakupi atipaj” kasqanta rikucherqa llajtanta yanapaspa (Éxodo 15:3, 4).
Diosqa, egipcioswan maqanakuspa rikucherqa mana tukuy guerrastachu juchachasqanta. Chantapis wakin kuteqa Israel llajta waj llajtaswan maqanakunanta saqerqa. Uj kutipi Diosqa, israelitasta cananeoswan maqanakojta kacharqa, pikunachus sinchʼi sajras karqanku (Deuteronomio 9:5; 20:17, 18). Rey Davidtapis Diosqa nerqa filisteoswan maqanakamunanta, atipananpajtaj imatachus ruwananta (2 Samuel 5:17-25).
Bibliapi nin jina, Diosqa Israel llajta ñakʼarichisqa kashajtin, maqanakunankuta kamacherqa, israelitasta jarkʼananpaj, cheqa yupaychay kanallanpajpunitaj. Jinapis, ¿pitataj Dios guerraman kachaj, maykʼajtaj? ¿Munanchu runa wañunanta? Kunanqa chayta qhawarisun.
-
DIOSLLA KAMACHIYTA ATERQA PICHUS GUERRAMAN RINANTA. Uj kuti, Dios nerqa israelitasman: “Manamin qankunachu maqanakunkichej”, nispa. Imajtinchus Dios paykunarayku maqanakunan karqa (2 Crónicas 20:17; 32:7, 8). Diosqa, ashkha kutispi llajtanrayku maqanakorqa, kay yachaqanaj qallariyninpi rikorqanchej jina. Chantapis Diosqa llajtanta kacharqa maqanakojta Sumaj Jallpʼata japʼikapunankupaj, jarkʼanankupajtaj (Deuteronomio 7:1, 2; Josué 10:40).
-
DIOSLLA KAMACHIYTA ATERQA MAYKʼAJCHUS GUERRA QALLARINANTA. Diospa kamachisnenqa enemigosninkuwan maqanakunankupaj Dios kamachinanta suyakunanku karqa. Dios mana kamachejtenqa mana maqanakoj riyta aterqankuchu. Rejtinkoqa Dios mana yanapajchu. Chantapis Biblia nisqanman jinaqa paykunallamanta maqanakoj rispa atipachikoj kanku. *
-
Israelitas cananeoswan maqanakojtinkupis, Diosqa, Rahabta, familianta ima perdonarqa
DIOSQA MANA PI WAÑUNANTA MUNANCHU. Jehová Dios kausayta qoj, tukuy runastataj pay ruwarqa (Salmo 36:9). Diosqa ni pi wañunanta munanchu. Chaywanpis wakin runasqa wakichikunku, wajkunata ñakʼarichinankupaj, wañuchinankupaj ima (Salmo 37:12, 14). Diosqa, wakin kuti guerras kananta saqerqa sajra kausayta chinkachinanpaj. Jinapis chay jina maqanakuykunapi Diosqa, israelitaspa enemigosninkuwan pacienciakoj, paykunatataj khuyakoj (Salmo 86:15). Chayrayku Israel llajtaqa, Dios kamachisqanman jina, niraj uj llajtawan maqanakushaspa, “uj tratota” ruwanan karqa. ¿Imapaj? Chay llajtamanta runas sajra kausayninkuta saqenankupaj, ajinamanta manaña maqanakuy kananpaj (Deuteronomio 20:10-13). Chayrayku Diosqa jinata nerqa: “Mana munanichu juchasapa runa wañunanta, astawanqa munani sajra ruwanasninmanta kutirikamuspa kawsananta”, nispa (Ezequiel 33:11, 14-16). *
Yachakusqanchejman jina, Diosqa ñaupa tiempopi maqanakuykuna kananta saqellaj, sajra kausayta, ñakʼariyta ima chinkachinanpaj. Chaywanpis Dioslla niyta atej maykʼajchus guerraman rinankuta, pitajchus rinanta. Chantapis Diosqa mana sinchʼitachu ñakʼarichej. Kunanpis Diosqa sajra ruwayta chejnikun (Salmo 11:5). Jinapis, ¿imaynatataj Dios guerrasta qhawarqa Jesuspa tiemponpi?
^ párr. 7 Diosqa israelitasta kamacherqa amalecitaswan, cananeoswan ima mana maqanakoj rinankuta. Jinapis israelitasqa maqanakoj rispa atipachikorqanku (Números 14:41-45). Ashkha watasninman rey Josiaspis Diosta mana kasukusqanrayku maqanakoj rispa wañorqa (2 Crónicas 35:20-24).
^ párr. 8 Israelitasqa cananeoswan niraj maqanakushaspa, mana paykunawan uj tratota ruwajchu kanku. Imajtinchus cananeostaqa 400 watastaña sajra kausayninkuta saqenankupaj suyasqanku. Chantapis israelitas cananeoswan maqanakunankuña kashajtin, manaña tiempo karqachu cananeos sajra kausayninkuta saqenankupaj (Génesis 15:13-16). Chayrayku cananeosqa chinkachisqa kananku karqa. Jinapis wakin cananeosqa sajra kausayninkuta saqerqanku, salvakorqankutaj (Josué 6:25; 9:3-27).
Kaykunatapis qhawaykurillawajtaj
TORREMANTA QHAWAJ
“Cheqampaj qhawasqa karqa allinta ruwasqanrayku”
¿Imaynatá Rahabpa kausaynin Jehovapaj tukuy valesqanchejta rikuchiwanchej? ¿Imatá Rahabpa creeyninmanta yachakunchej?
TORREMANTA QHAWAJ
Diospa juiciosnin: ¿sajra kasqantachu rikuchin?
Kay tapuykunaman kutichinapajqa, iskay juiciosmanta parlarina: Noej tiemponpi jatun paramanta, cananeosta chinkachisqanmantawan
