1 Corintios 9:1-27
9 ¿Manaku libri kaykä? ¿Manaku *apostolpis kaykä? ¿Manaku Señor Jesucristutapis rikashqä?* ¿Manaku qamkunapis wilapaptïraq Jesucristuta chaskikärishqanki?
2 Wakinkuna apóstol kashqäta mana tantiyaptinpis qamkunami itsanqa tantiyapäkunki. Tsaymi wilapashqäta criyir Jesucristuman yärakurkaykanki.
3 Apóstol kashqäta manakaqman churamaqkuna tantiyakärinanpaqmi tsayno nï.
4 Apóstol kapäkuptïmi wilakushqäpita mikunäpaq y upunäpaq noqakunapapis derëchükuna kan.
5 Wakin apostolkuna, Señor Jesucristupa wawqinkuna y Cefaspis* warminwan purishqannömi noqakunapapis warmïwan puripäkunäpaq derëchükuna kaykan.
6 ¿Imanirtaq yarpapäkunki Bernabétawan noqalata mana yanapamänaykipaq kashqanta?
7 ¿Mayqan soldädutaq kikinpa gastunwan soldädu kayman yaykun? ¿Pï runataq plantashqan üvapa wayuyninta mana mikuntsu? Tsaynöpis ¿pï runataq cabranpa o wäkanpa lëchinta mana upuntsu?*
8 Tsaytaqa manami kikïpa yarpayniläpitatsu niykä. *Moisés qelqashqan leykunachöpis tsaypitaqa qelqaraykanmi.
9 Tsaychömi kayno qelqaraykan: “Ëracho arutsir töruta ama shenqalwankitsu”.*
Tayta Dios tsayno nirqan ¿törukunapaqku
10 o noqantsipaqku? Tsayno qelqaraykan noqantsipaqmi. Töruwan arupakuqpis trïgu wirupakuqpis paylayta chaskinan raykumi arupakun.
11 Noqakunapis Jesucristupa wilakuyninta qamkunata wilapar muruta muruqnömi kashqä. Tsaymi cosëchacho paylayta chaskishqanno qamkunapita imalatapis chaskipäküman.
12 Wakintapis yanapaykarqa noqakunata masraqmi yanapamankiman.
Yanapamänaykipaq kaykaptinpis manami qamkunata manakärishqätsu. Tsaypa trukanqa Jesucristupa wilakuyninta chaskikärinaykita munar nakarpis upälakärishqä.
13 ¿Manaku musyapäkunki templucho y *altarcho aruqkunaqa templuman apashqan mikuypita mikupäkushqanta?*
14 Tsaynölami Jesucristupa wilakuyninta wilakuqkunapis wilakushqanpita chaskipäkunman. Tsayno kananpaqmi Señor Jesucristupis nirqan.*
15 Tsayno chaskinäpaq kaptinpis manami imaypis manakushqätsu ni kananpis manami manakuykätsu. Wilakushqäpita cobraptïqa mejor kawaykaqta pampamätsun. Mana manakushqäpita manami lakikütsu, sinöqa kushikümi.
16 Jesucristupa ali wilakuyninta imaykanöpapis wilakunä kaptin wilakushqäpita manami alabakütsu. Mana wilakuptï imaptïqa ¡Tayta Dios castigamätsun!*
17 Kikïpa yarpayläpita wilakurqa yanapamänaykipaq manakümanmi. Tayta Dios wilakunäpaq churamashqa kaptinmi mana manakuylapa wilakuykä.
18 [Jesucristupa] ali wilakuyninta wilakushqäpita qellayta mana chaskiptïpis jukmi pägü kaykan. Tsay pägüqa kaykan wilakushqäpita manakunäpaq derëchü kaykaptinpis mana manakuylapa wilakushqämi.
19 Noqa libri karpis runakuna tantiyakur salvakunanpaqmi lapan runakunapa ashmayninno kaykä.
20 Tsaymi Israel runakunawan juntakarqa paykuna kawashqanno noqapis kawaykä. Moisés qelqashqan leykunata paykuna cumplishqannömi noqapis cumpliykä. Tsay leykunapa munaynincho mana karpis tsayno kawä Israel runakuna tantiyakur Jesucristuta chaskikärinanpaqmi.
21 Tsaynölami Moisés qelqashqan leykunata mana cäsukuq runakunawan juntakar paykuna kawashqanno kawaykä. Tsayno kawaykä paykunapis Jesucristuta chaskikunanpaqmi. Paykunawan juntakar Moisés qelqashqan leykunata mana cumplirpis jutsata mana ruraypami Jesucristo munashqanno kawaykä.
22 Tsaynölami mana tantiyaqkunawan juntakar paykuna kawashqanno noqapis kawä.* Tsayno kawä Jesucristuman yärakunanpaqmi. Tsaynöpami runa imano kaptinpis tsay runano kawä. Tsayno kawä wakilanpis salvakunanpaqmi.
23 Lapantapis rurä Jesucristupa ali wilakuyninta runakuna chaskikunanpaqmi. Tsaynöpami Jesucristuta chaskikuqkuna kushikärishqanno noqapis kushikushaq.
24 Qamkuna musyapäkunkimi atskaq cörrirpis ali cörriq kaqla premiuta chaskishqanta. Qamkunapis Tayta Diospita premiuta chaskinaykipaq shumaq kawapäkuy.
25 Cörriqkuna shumaq kamarikushqanta tantiyakäriy. Paykuna tsayno kamarikärin gänar ushakaq corönata chaskinalanpaqmi. Noqantsimi itsanqa kamarikuykantsi mana ushakaq corönata chaskinantsipaq.
26 Tsaymi yalinakuycho pantakar juk lädupa cörriq runanötsu ni pelyacho wayralata kutaq runanötsu kawä.
27 Tsaypa trukanqa cörrinanpaq kamarikuq runa imano nakarpis kamarikushqannömi noqapis Tayta Dios munashqanno kawaykä. Tsayno mana kawarqa wakinta shumaq yacharkatsirpis Diospa nawpanman kikï mana chayaykümantsu.
Ichic wilacuycuna
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ 9.1 Hech. 9.3-6; 1Cor. 15.8.
^ 9.5 Cefasqa Simón Pedrupa jukaq jutinmi karqan.
^ 9.7 Pablo tsayno nirqan wilakushqanpita chaskinanpaq kashqanta tantiyatsinanpaqmi.
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 9.9 Deut. 25.4; 1Tim. 5.18.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 9.13 Deut. 18.1.
^ 9.14 Mat. 10.10; Luc. 10.7.
^ 9.16 Jer. 20.9; Amós 3.8.
^ 9.22 1Cor. 8.13.
